Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, 2010-ҹу илдә Илһам Әлијевин бәрпа вә иншасына даир вердији сәрәнҹамы илә Гафгаз Мүсәлманлары Идарәсинин балансына кечәрәк, сөкүлмә гәрарыны ләғв етмиш Бакынын Јени Ҝүнәшли гәсәбәсиндә јерләшән "Фатимеји Зәһра (сәламуллаһи әлејһа)" Мәсҹиди јенидән сөкүлмә, әразисинин алынмасы тәһлүкәси илә үзләшиб.
Мәсәлә илә бағлы ачыглама верән вәкил Ҹавад Ҹавадов олајы иҹтимаиләшдирәҹәјини вә мүвафиг гурумлардан ҹаваб алмаға чалышаҹағыны билдириб.
Ҹ.Ҹавадов билдириб ки, Мәсҹидин әразисинин јенидән алынмасы чох пис һалдыр:
"Бу ганунсузлуглара гаршы чыхмаг илк олараг Мүсәлман кими өзүмә борҹ билирәм, сонра исә вәкил олараг. Бунунла бағлы Бакы шәһәр Иҹра Һакимијјәтинә вә Сураханы рајон Иҹра Һакимијјәтинә информасија сорғулары ҝөндәрирәм. Мәсҹидин әразиси онун мүлкијјәти вә ајрылмаз һиссәсидир. Ҹәнаб Президентин ҝөстәриши илә 2010-ҹу илдә Мәсҹидин сөкүлмәсинин гаршысы алыныб, сонрадан гануни гүввәјә минмиш мәһкәмә гәтнамәси илә бу һал мүбаһисәсиз олараг өз тәсдигини тапыб. Ганунла бу торпаг саһәсинин сәрәнҹамчысы ГМИ-дир. Әввәлки ганунсуз мәһкәмә гәрарларынын ләғв едилмәсинә ҝөрә мүраҹиәт едәнләр сырасында ГМИ олдуғундан, бу идарәнин Мәсҹидә гаршы нөвбәти ганунсузлуға нәинки ҝөз јумаҹағын, она гаршы јенидән мүбаризә апараҹағына там әминәм. Хүсәсән 2017-ҹи илдә - "Ислам Һәмрәјлик или"ндә һансыса мәмурларын белә нијјәтләринин олмасы дөвләт сијасәтинә гаршы зәннимҹә ачыг-ашкар тәхрибат ола биләр вә буна гаршы бүтүн һүгуги мүдафиә васитәләри илә гаршы чыхаҹам вә әминәм ки, мән тәк олмајаҹам".
Мәсәлә илә бағлы Дини Гурумларла иш үзрә Дөвләт Комитәсинин сәдр мүавини Ҝүндүз Исмајылов дејиб:
"Азәрбајҹанда 2165 мәсҹид вар. Бу мәсҹидләрин 306-сы тарихи, дини абидә кими дөвләт тәрәфиндән горунур. Амма бу о демәк дејил ки, онлар тарихи абидә кими горундуғу үчүн Мәдәнијјәт вә Туризм Назирлијинин балансындадыр. Мәдәнијјәт Назирлијинин балансында олан Мәсҹидләр о мәсҹидләрдир ки, онлар конкрет олараг горуг әразисиндә јерләширләр. Белә Мәсҹидләр Ҝәнҹәдә, Шәкидә , ејни заманда Ичәришәһәр горуг идарәсинин әразисиндә фәалијјәт ҝөстәрән Мәсҹидләрдир. Јердә галан Мәсҹидләрин мүтләг әксәријјәти, демәк олар ки, һамысы бәләдијјәләрин балансындадыр. Бәләдијјәләр исә бу Мәсҹидләрин тәмәннасыз, иҹарә һаггы аламдан Гафгаз Мүсәлманлары Идарәси (ГМИ) истифадәсинә верибләр. Амма бу о демәк дејил ки, Мәсҹидләр ГМИ-нин балансындадырлар. Баланс олараг бәләдијјәләрдәдир, бәләдијјәләр исә Мәсҹидләри ГМИ-нин истифадәсинә вериб.
Конкрет олараг ""Фатимеји Зәһра" Мәсҹидинә ҝәлинҹә, бу мәсәлә Комитә тәрәфиндән арашдырылаҹаг вә әртафлы мәлумат вериләҹәк".
Гејд едәк ки, Бакы шәһәр Иҹра Һакимијјәтинин 1179 сајлы, 21 август 1996-ҹы ил тарихли сәрәнҹамы илә Бакы шәһәринин Јени Ҝүнәшли гәсәбәсиндә “Фатимеји Зәһра” мәсҹиди диндарларынын дини иҹмасына 1,3 һа торпаг саһәси ајрылараг Мәсҹид вә Мәдрәсә комлексинин тикинтисинә иҹазә верилиб.
Сонрадан Мәсҹидин там олараг тикинтисинә имкан верилмәјиб. Бакы шәһәр Иҹра Һакимијјәтинин башчысы Һаҹыбала Абуталыбовун 31 октјабр 2002-ҹи ил тарихли сәрәнҹамы илә әввәлки - 1179 сајлы, 21 август 1996-ҹы ил тарихли сәрәнҹам етибарсыз һесаб едилиб.
Бундан сонра Мәсҹиди гејри-леҝитим һесаб едән Сураханы рајон Иҹра Һакимијјәти мәсҹиди гаршы мәһкәмәјә верәрәк, мәһкәмәдән торпағын гајтарылмасыны, Мәсҹидин сөкүлмәсини хаһиш едиб.
Ҹәмијјәтин тәбәгәләринин сәрт тәпкисинә бахмајараг 2 сајлы Бакы Јерли Игтисад Мәһкәмәси, Бакы Апеллјасија Мәһкәмәси вә Али Мәһкәмә торпаг саһәсинин ҝери алынараг Мәсҹидин сөкүлмәсинә гәрар вериб.
2009-ҹу илдә Мәсҹидин ганунсуз тикили кими сөкүлмәсинә даир мәһкәмә гәрар чыхарса да, 2010-ҹу илдә президент Илһам Әлијев Мәсҹиди Гафгаз Мүсәлманлары Идарәсинин балансына верәрәк, сөкүлмә гәрарыны ләғв етмишдир.
Мәһкәмә гәрарлары Али Мәһкәмәнин Пленумунда ләғв едилиб, Бакы Апеллјасија Мәһкәмәсиндә 29.12.2010-ҹу ил тарихли гәтнамәси илә Бакы шәһәр Иҹра Һакимијјәти башчысынын 613 сајлы 31 октјабр 2002-ҹи ил тарихли сәрәнҹамы етибарсыз һесаб олунуб, Сураханы рајон Иҹра Һакимијјәтинин иддиасы тәмин едилмәјиб, Бакы шәһәри Сураханы рајону, Јени Ҝүнәшли гәсәбәси мәркәзи массивиндә јерләшән 1,3 һа торпаг саһәси вә һәмин торпаг саһәсиндә инша едилмиш Мәсҹид комлекси Гафгаз Мүсалманлан Идарәсинин балансына верилиб.
Хатырладаг ки, гәтнамә гануни гүввәсини алыб вә 6 ил кечмәсинә бахмајараг мәсҹид натамам олараг галыб. Буна бахмарајаг мәсҹид фәалијјәт ҝөстәрир вә орада ибадәтләр едилир.
Диггәт: Хәбәрдән истифадә етдикдә мәнбәјә истинад лазымдыр
