Әһлибејт (ә) Хәбәр Аҝентилијинин вердији мәлумата ҝөрә-Бакынын Нардаран гәсәбәсиндә баш вермиш һадисәдән сонра сахланылан илаһијјатчылар Һаҹы Зүлфүгар Микајылов, Сејид Елман Ағајев вә диҝәр 10 нәфәрин ҹинајәт иши үзрә мәһкәмә просеси башлајыб. Һаким Зејнал Ағајевин сәдрлији илә кечирилән һазырлыг иҹласында тәгсирләндирилән шәхсләрин анкет мәлуматлары дәгигләшдирилиб. Тәгсирләндирилән шәхсләрин бәзиләринин һүгугларыны мүдафиә едән вәкилләр олмадыглары үчүн просес тәхирә салыныб. Һазырлыг иҹласы јанварын 30-да давам етдириләҹәк.
Гејд едәк ки, 2015-ҹи ил нојабрын 26-да Баш Мүтәшәккил Ҹинајәткарлыгла Мүбаризә Идарәсинин әмәкдашлары Нардаран гәсәбәсиндә кечирдији әмәлијјат нәтиҹәсиндә “Мүсәлман Бирлији” һәрәкатынын рәһбәри Талеһ Камил оғлу Бағыров вә бир нечә нәфәр сахланылыб. Даһа сонра Ләнкәранда Елман Сејдәмир оғлу Ағајев, хырдаланда исә Зүлфүгар Сәдрәддин оғлу сахланылыб. Әмәлијјат заманы 2 полис әмәкдашы, 4 гәсәбә сакини һәлак олуб. Нардаран һадисәләри илә бағлы сахланылан шәхсләрин ҹинајәт иши үзрә истинтаг бир нечә јерә ајрылыб. Онлардан Талеһ Бағыров вә диҝәр 18 нәфәрин ҹинајәт иши үзрә һазырда Бакы Ағыр Ҹинајәтләр Мәһкәмәсиндә просес кечирилир. Талеһ Бағыровун мүавини олан Елчин Гасымов вә диҝәр 12 нәфәрин ҹинајәт иши үзрә истинтаг исә бир мүддәт әввәл јекунлашыб.
Диггәт! Хәбәрдән истифадә етдикдә мәнбәјә истинад лазымдыр!
