Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Гарабағ газиси Вәли Дүнјамалыјев Салјан рајонунун Јолүстү кәндиндә јашајыр.
Көнүллү ҹәбһәјә јолландым
Гарабағ газиси 1 отагдан ибарәт дахмада јашајыр. О, Гарабаға көнүллү шәкилдә ҝедиб. Һәр ҝеҹәси ағрыларла кечән Вәли дејир ки, јардым истәјини һеч ким ешитмир.
Гарабағ дөјүшчүсүнүн мүалиҹәјә еһтијаҹы вар: "Бүтүн бу ағрылар, јарымҹан олмағым бәс дејилмиш кими, бөјрәјим дә артыг сырадан чыхыб. Һәкимә ҝетдим, дедиләр ки, ја мүалиҹә олунмалыјам, ја да бөјрәјими кәсиб, ҝөтүрәҹәкләр. Онсуз да өлүмлә мүбаризә апарырам, бөјрәјими дә ҝөтүрсәләр, неҹә јашајаҹам? Ондан сонра мәни басдырсалар, јахшыдыр".
Мадди вәзијјәти ағыр олан Вәлинин мүалиҹә алмаға ҝүҹү чатмыр. Дејир ки, бир јандан хәстәлик, бир јандан да диггәтсизлик ону һәр ҝүн бир аз да өлдүрүр: "Һеч бир көмәк алмырам. Һәкимә ҝедирәм, дәрман јазыр ки, "ҝет ал".
Мән о дәрманлары неҹә алым? Ади бир дәрман 32 манатдыр. Үмумиликдә 396 манат пул алырам. Башга ҝәлирим јох, ишим јох. Иш олса да ишләјәҹәк гүввәдә дејиләм. 396 манатла аилә сахлајым, јохса дәрманларымы алым? Бир дәрманы аланда диҝәрләрини ала билмирәм. Евлә бағлы чох мүраҹиәт етмишәм. Әмәк вә Әһалинин Сосиал Мүдафиәси Назирлији тәрәфиндән дахмамын јанында бизим үчүн ев тикилир. Сағ олсунлар. Сағламлығым олмајандан сонра..."
Јаваш-јаваш өлүрәм
Газинин сөзләринә ҝөрә, рајонун иҹра башчысы тәрәфиндән тәһгир едилиб: "Салјан рајонунун иҹра башчысы илә ҝөрүшә ҝетдим ки, ајағыма ҝөрә хүсуси тикилән ајаггабым ҹырылыб. Көмәк етсинләр, ону Бакыда тикдирим. Мәнә деди: "Сиз дә диләнчилик етмәјә јаман өјрәшмисиниз". Мәнә дејилән бу сөз һеч вахт јадымдан чыхмаз. Мән бу вәтән үчүн дөјүшмүшәм вә бу һала дүшмүшәм. Сағлам олсајдым, кимәсә еһтијаҹым оларды? Јох... 45 јашым вар. Јаваш-јаваш өлүрәм. Мән өзүмү јох, аиләми дүшүнүрәм. Онсуз да ҝеҹ-тез өләҹәјик. Амма инди өлсәм, онларын вәзијјәти даһа да бетәр олаҹаг. Диггәтсизлик, гајғысызлыг адама пис тәсир едир. Бири дејир, "Ҝетмәздин Гарабаға", о бири дејир ки, "Ҝет, Президент Апаратынын габағында өзүнү јандыр".
Мән буна лајиг дејиләм
- Сизә "Ҝет, Президент Апаратынын габағында өзүнү јандыр" сөзүнү ким дејиб?
- Кәндимизин Бәләдијјә сәдри Әлизадә Зејналов... Ҝөзүмүн ичинә баха-баха бу сөзләри деди. Мән буна лајиг дејиләм. Сағламлығымы вәтән үчүн гурбан вермишәм. Һеч олмаса, буну нәзәрә алсынлар.
Диггәт: Хәбәрдән истифадә етдикдә мәнбәјә истинад лазымдыр
