Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Сурија һөкумәти Түркијәдән ҝөндәрилән јардымлар башда олмагла, һөкумәтлә вә БМТ илә координасија олунмадан Һәләбә һуманитар јардым ҝөндәрилмәсини гәбул етмәдијини ачыглајыб.
САНА хәбәр аҝентлији Суријанын Хариҹи Ишләр Назирлији рәсмиләринә әсасланараг, вердији хәбәриндә белә гејд едиб: "Сурија Әрәб Республикасы һөкумәт вә Бирләшмиш Милләтләр Тәшкилаты илә координасија едилмәдән Һәләбә һуманитар јардымын дахил олмасыны, хүсусилә дә Түркијә режиминин ҝөндәрдији јардымы рәдд етдијини билдирир".
Түркијә баш назиринин мүавини Вејси Кајнак әрзаг, ушаг ҝејимләри вә ушаглара јардым аваданлыглары дашыјан, тәхминән 33 машынлыг карванын БМТ-нин нәзарәти алтында Һәләбә ҝөндәриләҹәјини гејд етмишдир. О, һуманитар јардым дашыјан 20 јүк машынынын Һәләбә ҝетмәк үчүн бу ҝүн сәһәр Һатај вилајәтинин Рејһанлы рајонундакы Ҹилвеҝөзү сәрһәд мәнтәгәсиндән кечдијини ачыгламышдыр.
Диггәт: Хәбәрдән истифадә етдикдә мәнбәјә истинад лазымдыр
