Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Австралиjанын Брисбен шәһәриндә кечирилән Ҝ20 зирвәсиндә лидерләрин Украjна бөһраны сәбәби илә Русиjаны сәрт шәкилдә тәнгид етмәси Русиjа Президенти Владимир Путини чәтинә салыб.
Путин икитәрәфли ҝөрүшләрдә Украjна проблеми илә бағлы Русиjанын дүзҝүн аддым атдығыны изаһ етмәjә чалышса да ону ешидән олмаjыб.
Путинә "соjуг душ" еффекти өнҹә Канада Баш назири Стефан Һарпердән ҝәлиб. Баш назир Путинлә ҝөрүшәр-ҝөрүшмәз “Сизин әлинизи сыхырам, анҹаг сизә бир шеj сөjләмәк истәjирәм. Украjнадан чыхманыз лазымдыр“, - деjиб. Әвәзиндә исә Путин “Тәәссүф ки, буну едә билмәjәҹәjик. Чүнки биз орада деjилик”, - ҹавабыны вериб.
Путинин ҹаныны сыхан диҝәр бир атмаҹа исә АБШ Президенти Барак Обамадан ҝәлиб. Обама Русиjаны Ебола вирусу илә мүгаjисә едиб.
Алманиjа канслери Анҝела Меркел дә Путинин кефинә соған доғраjыб. Меркел Авропа Бирлиjинин (АБ) Русиjаjа гаршы jени санксиjалар дүшүндүjүнү, jахын вахтларда ирәлиләjиш олмаjаҹағы тәгдирдә бу санксиjаларын ишә дүшәҹәjини деjиб.
Путини Австралиjада украjналы етиразчыларын гаршыламасы, Инҝилтәрә Баш назири Девид Кемеронун бүтүн нитгини Украjнаjа һәср етмәси зирвә ҝөрүшүнүн ҝәрҝин кечдиjинә әсас верир.
Бүтүн бу тәнгидләрин гаршысында Путин дә сәссиз галмаjыб
Алманиjа телевизиjасына вердиjи ачыгламада өлкәсинин Украjна һөкумәтинин мүхалифәти вә рәгибләрини jох етмәjинә имкан вермәjәҹәjини деjиб.
Даһа сонра Путин Франса Президенти Франсуа Олландла ҝөрүшүб. Ҝөрүш заманы Путин Франса нефт ширкәти “Тотал”ын президенти Кристоф де Маржерин фаҹиәли өлүмүнә ҝөрә Олланда башсағлығы вериб.
Франсыз һәмкары илә дә Украjна проблеми әтрафында ҝәрҝин мүзакирәләр апаран Путин нәдәнсә Франсанын вермәли олдуғу ҝәмиләрдән сөз ачмаjыб.
Бу илки Ҝ20 зирвәсинин Русиjа үчүн һәддиндән зиjадә ҝәрҝин кечдиjи барәдә jаjылан хәбәрләрә Кремлдән ҹаваб ҝәлиб.
Кремл сөзчүсү Дмитри Песков Путинин зирвә топлантысыны jарымчыг гоjараг Русиjаjа гаjыдаҹағы барәдә jаjылан иддиалара ҹаваб вериб:
“Бу ҹәфәнҝиjатдыр. Путин сабаһ кечириләҹәк топлантылардан сонра Русиjаjа гаjыдаҹаг. Дүздүр, ҝөрүш заманы тез-тез Украjна мөвзусу мүзакирә олунду. Бу нормал вә ади бир проседурдур. Анҹаг киминсә тәзjиг етдиjини деjә билмәрәм”.
Диггәт: Хәбәрдән истифадә етдикдә мәнбәjә истинад лазымдыр
