Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Хызы рајонунда јерләшән орта мәктәбдәки Һиҹаблы шаҝирдләрлә бағлы проблем јашаныб.
Мөвзу илә әлагәдар Һиҹаблы шаҝирдләрин валидејнләри мәлумат верибләр.
Онларын сөзләринә ҝөрә, јени мәктәб илиндә директор хәбәрдарлыг едиб ки, өвладларыныз Һиҹабла мәктәбә ҝәлмәсин: “Арада проблем бир гәдәр сакитләшмишди. Инди јенә ханымыма зәнҝ вуруб дејибләр ки, ушағыныз Һиҹабла мәктәбә ҝәлмәсин. Башыны ачыб ҝөндәрин. Сәбәб исә Рајон Иҹра башчысы Хәзәр Аслановун мәктәб директорлары, идарә рәһбәрләри илә бирҝә кечирдији иҹласда Һиҹаблыларын мәктәбә ҝәлмәси илә бағлы директорлара хәбәрдарлыг етмәсидир. Инди бизә мараглы олан мәктәбдахили ишләрә директор дејил, иҹра башчысынын мүдахилә етмәсидир. Һарада ҝөрүнүб ки, иҹра башчысы мәктәбин дахили ишләринә гарышсын.“
Валидејнләр ону да билдирди ки, мәктәбдән чағырараг өвладлары илә бағлы нөвбәти дәфә хәбәрдарлыг алыблар: “Мәнә билдирдиләр ки, өвладларыныз мәктәбә башы ачыг ҝәлсин, әкс һалда мәктәбә бурахылмајаҹаг. Лакин мән етираз едәрәк, өвладымын мәктәбә бурахылмамасы илә бағлы рәсми сәнәд тәләб еләдим. Ҹавабларында исә “јох биз ону јаза билмәрик”,-дејә билдирдиләр. Әҝәр Һиҹабла мәктәбә ҝәлмәк гејри-ганунидирсә, онда нә үчүн буну сәнәдләшдирә билмирсиз?”
Мәсәләјә ајдынлыг ҝәтирмәк үчүн Хызы Рајон Иҹра Һакимијјәти илә әлагә сахладыг. АзадХебер.аз-а ачыглама верән иҹра һакимијјәтинин Сәнәдләрлә Вәтәндашлара Мүраҹиәтләрлә Иш шөбәсинин мүдири Намиг Гулијев билдирди ки, иҹра башчысы Хәзәр Асланов орта мәктәб директорларына Һиҹабын гадаған едилмәси илә бағлы шәхсән ҝөстәриш вериб.
“Бу гадағаны неҹә әсасландыра биләрсиниз”, - суалынын ҹавабында исә Намиг Гулијев билдирди ки, Азәрбајҹан ганунвериҹилијинә ҝөрә дин дөвләтдән ајрыдыр: “Әҝәр моллалыг еләмәк истәјирләрсә, ҝедиб молла мәктәбләриндә охусунлар. Азәрбајҹан дүнјәви дөвләтдир вә Һиҹабла мәктәбә ҝәлмәк олмаз.”
“Ганунвериҹиликдә Һиҹабын гадаған едилмәси илә бағлы һәр һансы ҝөстәришы вармы” – суалыны да ҹавабландыран иҹра һакимијјәти рәсмиси, бизи сују буландырмагда иттиһам етди: “Бир кәлмә илә олмаз. Әҝәр кимсә ушағыны диндар еләмәк истәјирсә, апарыб Иранда, Түркијәдә охутдурсун. Орада молла мәктәбләри вар. Биздә иҹазә верилмир.”
Гејд едәк ки, өлкә башчысы Илһам Әлијев өтән ил хариҹи медиа органларындан биринә мүсаһибәси заманы Азәрбајҹанда Һиҹаб гадағасынын олмадығыны билдирмишди. Ејни һалда медиа органларынын Тәһсил Назирлијинә Һиҹаб гадағасы илә бағлы ҝөндәрдији сорғуларда, назирлик рәсми олараг орта мәктәбләрдә Һиҹабын гадаған едилмәдијинә даир ачыглама вермишди.
Хатырладаг ки, өлкә конститусијасына ҝөрә, һәр бир вәтәндашын тәһсил алмаг, дин вә виҹдан азадлығы һүгугу вар. Ејни һалда һәр бир гурум, идарә вә тәһсил оҹағы дахили низамнамә гајдасы һазырлајаркән өлкә конститусијасыны әсас ҝөтүрмәлидир. Әҝәр һазырланан дахили низамнамә өлкә конститусијасынын һәр һансы бир бәндинә зидди оларса, онда һәмин низамнамә әсассыз сајылыр.
Диггәт: Хәбәрдән истифадә етдикдә мәнбәјә истинад лазымдыр
