Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасы илә “алтылыг” өлкәләри арасында нүвә мүзакирәләри бу ҝүн ҝүнорта радәләриндә баша чатыб. Данышыглар апрелин 8-9-да БМТ-нин Вјанадакы офисиндә мүбаһисәли мәсәләләрин һәлли мәгсәдилә баш тутуб.
Ики ҝүн сүрән мүзакирәләрдән сонра тәрәфләр јекун разылашма лајиһәсинин һазырланмасы мәрһәләсинә дахил олублар. Мүзакирәләрдә Әрак ағыр су нүвә реактору, уранын зәнҝинләшдирилмәсинин сәвијјәси, санксијаларын арадан галдырылмасы, динҹмәгсәдли нүвә технолоҝијасы саһәсиндә бејнәлхалг әмәкдашлыг, Ҹеневрә разылашмасына ујғун олараг Бирҝә Фәалијјәт Програмындакы аддымлар кими мәсәләләр әсас мүзакирә мөвзусу олуб. Данышыглар Иран Ислам Республикасынын хариҹи ишләр назири Мәһәммәд Ҹавад Зәриф вә Авропа Бирлијинин (АБ) хариҹи ишләр вә тәһлүкәсизлик сијасәти үзрә али нүмајәндәси Кетрин Ештонун рәһбәрлији алтында өз ишинә башлајыб, даһа сонра мүавинләр сәвијјәсиндә давам етдирилиб. Бундан бир ҝүн әввәл М.Ҹ.Зәриф вә К.Ештон ишҝүзар шам јемәјиндә бир араја ҝәләрәк икиҝүнлүк данышыгларын әсас мөвзуларыны тәјин едибләр.
Ејни заманда Иран Ислам Республикасынын хариҹи ишләр назиринин бејнәлхалг вә һүгуги мәсәләләр үзрә мүавини, баш нүвә мүзакирәчиси Сејид Аббас Әрагчы, АБШ дөвләт катибинин мүавини Венди Шерман, һәмчинин Русија вә Чин нүмајәндәләри илә ҝөрүшүб. Бундан башга, Иран Ислам Республикасы илә Инҝилтәрә арасында да икитәрәфли нүвә мүзакирәләри кечирилиб. Ејни заманда Иран Ислам Республикасы илә “алтылыг” өлкәләри Ҹеневрә разылашмасынын гүввәјә минмәсинә манеә төрәдән амилләрин мүәјјәнләшдирилмәси вә арадан галдырылмасы мәгсәдилә мүштәрәк комиссија јарадыблар.
Даһа сонра Иран Ислам Республикасынын хариҹи ишләр назири Мәһәммәд Ҹавад Зәриф Авропа Бирлијинин (АБ) хариҹи ишләр вә тәһлүкәсизлик сијасәти үзрә али нүмајәндәси Кетрин Ештонла бирҝә кечирдији мәтбуат конфрансында билдириб ки, тәрәфләр јекун разылашманын әлдә олунмасы истигамәтиндә данышыглар апармаг үчүн мајын 13-14-дә Вјанада бир араја ҝәләҹәкләр.
АБНА- Хәбәр Аҝентлији ИРНА вә Меһр аҝентликләринә истинадла
Диггәт: Хәбәрдән истифадә етдикдә мәнбәјә истинад лазымдыр
