Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, “Тһе Nеw Yоrk Times” гәзети адынын чәкилмәсини истәмәjән мәнбәjә истинадән jазыб ки, АБШ администрасиjасы санксиjалар васитәсилә Русиjа игтисадиjjатына ҹидди зәрбә вура биләҹәjи гәнаәтинә ҝәлиб. Русиjадакы аjры-аjры шәхсләрин банк активләринин дондурулмасы илә jанашы, Вашингтон Русиjа банкларына гаршы да санксиjалар тәтбиг едә вә бу өлкәни доллар системиндән тәҹрид едә биләр.
Нүфузлу “Тһе Wаll Street Jоurnal” гәзетинин хәбәринә әсасән АБШ-ын илк санксиjалары бир нечә ҝүндән сонра елан олунаҹаг. Бу санксиjалар Кремлин Крымы илһаг ҹәһдләриндә иштирак едән русиjалы вә украjналы мәмурлара гаршы тәтбиг едиләҹәк. “Малиjjә Назирлиjи артыг Крымын илһагында рол оjнаjан аjры-аjры Русиjа вә Украjна вәтәндашларына гаршы санксиjалар тәтбиг етмәк үчүн сәлаһиjjәтә маликдир. Биз “гара сиjаһы”jа дахил едиләҹәк шәхсләрин фәал ахтарышыны апарырыг”, - деjә адынын чәкилмәсини истәмәjән jүксәк вәзифәли америкалы дөвләт мәмуру сөjләjиб. АБШ-да гәбул олунан “Магнитски Акты” Путин һөкумәтиндә вә тәһлүкәсизлик структурларында вәзифә тутан чохлу саjда шәхсә дә шамил олуна биләр. Бундан башга, Обама администрасиjасы 11 сентjабр террорундан сонра силаһ гачагмалчылығы вә чиркли пулларын jуjулмасы илә мүбаризә мәгсәдилә һазырланан һүгуги васитәләрдән Москваjа гаршы да истифадә етмәjә һазырлашыр. АБШ Малиjjә Назирлиjи Русиjаны ҝизли глобал силаһ тиҹарәти вә мүтәшәккил ҹинаjәткар груплашмаларла әлагәли ганунсуз бизнесин мәркәзләриндән бири кими ҝөрүр.“Тһе Nеw Yоrk Тimеs”ын jаздығына ҝөрә, АБШ рәһбәрлиjини нараһат едән мәгамлардан бири дә будур ки, Путин Крымы әлә кечирмәклә кифаjәтләнмәjә биләр, чүнки Крым jарымадасынын Русиjа илә гуру сәрһәди jохдур вә бу реҝиону су, електрик енержиси вә диҝәр зәрури еһтиjатларла Украjна тәмин едир. Бу исә о демәкдир ки, Москва Крым анклавынын нормал һәjатыны тәмин етмәк үчүн башга Украjна әразиләрини дә әлә кечирә биләр.
Диггәт: Хәбәрдән истифадә етдикдә мәнбәjә истинад лазымдыр
