Әһли Беjт (әлеjһимус сәлам) -АБНА- Хәбәр Аҝентлиjи- Шәмкир заһирән Авропа шәһәрләринә бәнзәјир. Рајонун мәркәзи күчәләри сәлигәли вә үрәкачандыр. Амма бир аз Шәмкирин ашағы күчәләринә дөнәндә һисс едәҹәксән ки, иҹра башчысы Назим Вејисов рајону “үстү бәзәк, алты тәзәк” шүары алтында “абадлашдырыб”. Әслиндә Шәмкирин үзүнү ағ еләјән әһалинин Русија базарларында тиҹарәтдән газаныб аиләләрини доландырмасыдыр. Шәмкир рәһбәрлијинин үмидинә галса, рајон ҹамааты чохдан јохсуллуг вә сәфаләт ичиндә итиб-батмышды.
Н.Вејисов исә Русијадан доланан шәмкирлиләрин һесабына рајондакы абадлығы аналогсуз инкишаф кими тәгдим едир. Белә ки, иҹра башчысы шәмкирли саһибкарларын вә имканлы шәхсләрин ҝөрдүјү ишләри өз адына чыхыб, гүррәләнир. Иддиалара ҝөрә, Н.Вејисов Шәмкири саһибкарларын вәсаити илә тәмир етдириб, бүдҹә пулларыны ајры-ајры мәмурларла мүштәрәк чырпышдырыр.
Шүбһәсиз ки, Н.Вејисов Шәмкирин гејри-рәсми губернатору олан верҝиләр назири Фазил Мәммәдова архаланыб. Рајонда оларкән кимдән сорагласан, иҹра башчысынын Ф.Мәммәдовун сөзү илә отуруб-дурдуғуну иддиа едәҹәк. Шәмкирлиләр дејирләр ки, назир вәзифәсиндә галдығы мүддәтдә иҹра башчысы да креслосунда отураҹаг. “Назим Вејисов саһибкарлара ҝүн вериб-ишыг вермир. Бир саһибкар ондан разы галмајыб. Һансыса иш адамы рајонда иш ҝөрмәк истәјәндә, иҹра нүмајәндәләри ҝәлиб башынын үстүнү кәсдирир.
Ондан истәдијини алмајана гәдәр әл чәкмирләр. Бурада иш ҝөрмәјин өз “һаггы” вар. Иҹра рәһбәрлији өз гијмәт ҹәдвәлини тәртиб едиб. Саһибкар шикајәт етмәк истәјәндә дејирләр ки, бујур, гапы ачыгдыр, ҝет һара истәјирсән шикајәт ет. Амма унутма ки, иҹра башчысы ҹәнаб назирин ирадәсиндән кәнар аддым атмыр. Бу да саһибкара бир сигналдыр. Јәни, габағында верҝиләр назири кими бир сәдд вар. Сабаһ верҝини төкүб, бир јохлама илә објектини бағлаја биләрләр. Она ҝөрә дә Шәмкирдә ән чох шикајәтчи зүмрә саһибкарлардыр. Кәнардан елә ҝөрүнүр ки, бурда иш ҝөрмәк олар. Амма әлини ағдан-гараја вуран кими һәнҝамә башланыр “ дејә, бизимлә сөһбәтләшән јерли саһибкарлардан бири данышыр.
Јоллар палчыг, вә чала-чухур...
Саһибкарын сөзләринә ҝөрә, Шәмкир чох ҝөзәлләшиб, абадлыг ишләри ҝөрүлүб, мәркәзи јоллар асфалтланыб: “Шәмкир һамы билир ки, касыб бөлҝә дејил. Шәһәри ҝәзәндә ҝөрәҹәксиниз ки, баһалы машынлар һәр аддым башы дајаныб. Анҹаг ҝөрүлән ишләрин чохунда саһибкарларын әмәји вар. Шәмкирли оғланлар сағ олсунлар, рајону бахымсыз гојмурлар. Иҹра һакимијјәтиндән олса бир-ики күчәни дүзәлдәр, һејкәл гојар, ҝәнҹләр мәркәзини тикәр, иҹранын бинасыны тәмир етдириб, лентини кәсиб отурар. Анҹаг елә билмәјин ки, бурда һамы јағ-бал ичиндә јашајыр. Нә гәдәр хариҹи машын варса, елә о сајда да такси хидмәти вар. Ишсизлик, касыбчылыгдан такси ишләјирләр. Иш јери јохдур, завод, мүәссисәләр, сехләр фәалијјәт ҝөстәрмир. Истәјәнә дә имкан вермәзләр. Монополијадыр, мәмурлар өз арасында гәрар верирләр ки, завод ачмаг олар, ја олмаз”.
Диҝәр бир јерли сакин исә Шәмкирин сосиал проблемләринә тохунду. Онун дедијинә ҝөрә, мәркәздән аралы күчәләр палчыг ичиндәдир. Мәктәблиләр дәрсә ҝедә билмирләр. Нәглијјатын һәрәкәти мәһдуддур. Бу ара јолларда чала-чухурдан кечмәк әзаба чеврилиб. Үстәлик, Шәмкир-Күр гәсәбәси јолунун бәрпасына 3 милјон манат ајрылыб. Рајона һәмин вәсаитин јарысы ҝедиб чатыб. Бу пулла бүтүн јоллары тәмир етмәк оларды. Анҹаг пулун галан һиссәсиндән хәбәр јохдур.
Сакинләр шикајәтләнирләр ки, Шәмкир стадионуна апаран күчәләр виран ҝүндәдир. Рајонун мәркәзи әразиләри тәзә асфалт үзү ҝөрсә дә, азҹа кәнар јоллар буна һәсрәтдир.
Мәлаһәт Гасымова адлы шәмкирли дејир ки, иҹра һакимијјәти Русијадан ҝәлән имканлы шәхсләрә торпаглары сатыр: “Рајонда торпаг гојмајыблар. Москвадан ҝәлән пуллу адамлар һектарларла торпаг алыр. Шәмкир рәһбәрлији торпаг базары ачыб. Бурда торпағын соту 2000 манатдан ашағы дејил.
Һазырда Шәмкир стадиону илә үзбәүз евләри сөкүрләр. Кимсә әразини алыб тиҹарәт мәркәзи тикдирәҹәк".
Сосиал мүавинәтләр вә стадионун сатышы
М.Гасымова рајонун бәлаларыны садалады: “Шәмкирдә бизим әсас проблемләримиз торпагларын мәмурлар тәрәфиндән сатылмасы, јолларын бәрбад ҝүндә олмасы, ишсизликдән әһалинин Русијаја ҝетмәси, рајон рәһбәрлијинин дә Москвада пул газананларын һесабына ҝөрүлән ишләри өз адына чыхармасы, бүтүн вәзифәләрә, бәләдијјәләрә јахын адамларыны тәјин етдирмәси, ән нәһајәт сосиал үнванлы јардымын 6 ај принсипи илә верилмәсидир. Бүтүн реҝионларда беләдир. Шәмкирдә дә јохсул аиләләр сосиал мүавинәт ала билмирләр. Ҝәрәк ”6 ај сәнин, 6 ај мәним" шәрти илә разылашасан".
Һәмсөһбәт олдуғумуз диҝәр сакин - Видади Әсәдов рајондакы стадионун тәмирини вә футбол клубунун бәрпасыны тәләб едир: “Шәмкир Азәрбајҹан чемпиону олуб. Танынмыш футболчулар вериб республикаја. Авропада Шәмкир командасы мәрһәлә кечиб, гәләбә газаныб, миллинин ән јахшы ојунчулары бурда топ говуб, Ағасәлим Мирҹавадов кими адам командаја баш мәшгчилик едиб. Инди Шәмкир футболу хәритәдән силиниб. Аслан Асланов да (кәнд тәсәррүфаты назиринин кечмиш мүавини) стадиону сатыша чыхарыб”.
В.Әсәдов стадион әразисинин Шәмкир рајонунун “Клара Сеткин” совхозунун балансында олдуғуну билдирди: Шәмкирдә иҹра башчысы ишләјәндә Аслан Асланов бу јери гоһумунун адына өзәлләшдирди. Инди бу стадиону алан да јохдур. Һеч истәмирик дә алынсын. Кимсә алыб коммерсија мәгсәди илә иш ҝөрәҹәк. Президентдән, Рөвнәг Абдуллајевдән, еләҹә иҹра башчысы Назим мүәллимдән хаһиш едирик ки, бу мәсәләни диггәтдә сахласынлар. Шәмкир футболуну дирчәлтсинләр. Неҹә олур ки, Ләнкәран, Гәбәлә, Загатала командаларына спонсор тапылыр, амма Шәмкирә јох. Ҝедиб Франсада команда ала билирләр, ҝәлиб бура да сәрмајә гојсунлар дә". Һаглыдырлар...
Диггәт: Хәбәрдән истифадә етдикдә мәнбәjә истинад лазымдыр
