Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән вәкил Анар Гасымлы Азәрбајҹан Ислам Партијасынын лидери Доктор Мөвсүм Сәмәдовун Милли Шура барәдә сөјләдикләрини сосиал шәбәкәдә јајымлајыб:
"Сечки өнҹәси дөврдә Милли Шура адлы гурумун јаранмасы вә әтрафында мүхтәлиф сијаси партијаларын, ҹәрәјанларын рәһбәрләринин јығылмасы вә ваһид намизәдлә тәмсил олунмалары севиндириҹи һалдыр. Тәәссүф ки, сон 20 илдә белә бирлик мүшаһидә олунмајыб. Милли Шура нә вахтадәк Азәрбајан халгынын марагларына мүнасиб нәзәри вә практик аддымлар атаҹагса, биз ону дәстәкләјәҹәјик. Бахмајараг ки, бу ҝүн Азәрбајҹанда илк јаранмыш вә гејдијјатдан кечмиш вә 20 ил әрзиндә халгымызын иҹтимаи-сијаси сәһнәсиндә мүхтәлиф мүбаризәләрдән алны-ачыг чыхмыш вә бу јолда зинданларда әсир вә шәһадәт шәрбәтин ичмиш сијаси партија кими Азәрбајҹан Ислам Партијасынын бу һадисәләрә мүнасибәти бирмәналы олараг шәксиздир.
АИП даһа чох лајигдир ки, халгын проблемләринин һәллиндә өз миссијасыны һәјата кечирмәк үчүн халг тәрәфиндән лазымы һәддә дәстәкләнсин. Исламын өлкәмиздәки иҹтимаи-сијаси нүфузундан вә әдаләтсевәрлик руһијјәсиндән даим еһтијјатланан гүввәләрин фәалијјәтләринә бахмајараг, бу ҝүн халгымыз сијаси сәһнәдә дә ислами чеврәләрин ардынҹа олмасыны кифајәт гәдәр нүмајиш етдирибләр. Шәхсән мәним Милли Шурада тәмсил олунмағым онун фәалијјәтинә тәсир етмә нөгтеји нәзәриндән о гәдәр дә мәгбул дејил. Чүнки зинданда олмағымызла әлагәдар Милли Шуранын ишиндә јахындан иштиракым мүмкүн дејил. Һәм дә Азәрбајҹан Ислам Партијасынын сечки шурасында онун бир намизәди кими иштирак етдијимизә ҝөрә, Милли Шурада үзв олмағымызы лазым билмирик. Һәрчәнд ки, халгын хејринә атылан аддымлары, һәр һансы гурум тәрәфиндән атылмыш олса да, хүсусән Милли Шура тәрәфиндән, дәстәкләмәјимиз мүмкүн вә мәгсәдә мүвафигдир.
Мәним сечкиләрә намизәд кими гатылмағым өзүмүн истәјимдән даһа чох халгын истәјидир. Бу бахымдан мән өз намизәдлијимин ирәли сүрүлмәсинә разы олмушам вә бу сијаси сәһнәдә нә гәдәр ки, халг бизә етимад едәҹәк, нә гәдәр ки, ганун чәрчивәсиндә биз бу етимады лазымынҹа доғрулда биләҹәјик, өзүмүзү бу вәзифәни дашымаға мәсул билирик. Гаршыда ола биләҹәк мәһдудијјәтләрин мүгабилиндә јаранмыш һадисәләрдә өз илаһи вәзифәмизә ујғун олараг аддым атаҹағыг".
Диггәт: Хәбәрдән истифадә етдикдә мәнбәјә истинад лазымдыр
