Имам Садиг (ә) Сәфвана бујурур: “Ашура зијарәтини оху вә ону гору. Һәгигәтән, мән онун охуҹусуна бир нечә шеји зәманәт верирәм.
1. Зијарәти гәбул олар.
2. Сәј вә чалышмалары мүкафатландырылар.
3. Һаҹәти нә олурса-олсун, Аллаһ тәрәфиндән гәбул олар. Аллаһ дәрҝаһындан наүмид гајытмаз.
Сонра бујурур: “Еј Сәфван! О заман ки, Аллаһдан һаҹәт истәмәк истәсән, бу зијарәт васитәсилә о Һәзрәтә диггәт ет. Һәр һалда олурсан-ол, бу дуаны оху вә һаҹәтини Пәрвәрдиҝардан истә ки, јеринә јетәр. Аллаһ өз вәдәсинә садигдир”.
Бәли, о кәсин ки, һаҹәти бөјүк олар, 40 ҝүн бу зијарәти охумагла һаҹәти јеринә јетәр. Бир чох арифләрин тәҹрүбәси буну тәсдиг едир.
Шејх Әнсаринин нәвәси олан Мәрһум Шејх Муртәза һаггында дејирләр ки, ҝүндә ики дәфә бир сәһәр вә бир дә әср вахты ону охујарды. Вәфат едәндән сонра бир нәфәр ону јухуда ҝөрүр вә һалыны сорушур. О, үч дәфә бујурур: “Ашура, Ашура, Ашура”.
Мирзә Гуми бөјүк бир инсан иди. Һеч вахт ҝеҹә намазыны, Ашура зијарәтини вә ҹамаат намазыны тәрк етмәзди. Мәсҹидә ҝетмәдији заман исә һәјат јолдашы вә ушаглары илә ҹамаат намазы гыларды. Чох инсафлы бир инсан иди. Мүсәлманларын ислаһ едилмәсиндә гәрибә бир сәј ҝөстәрәрди. Шәһәрин һакими ҝөстәриш верир ки, она аид бир мәсҹид инша етсинләр. О, да һәмишә ҹүмә вә ҹамаат намазларыны бу мәсҹиддә гыларды.
Шәһид Ајәтуллаһ Гудуси исмәт вә тәһарәт нәслинә хүсуси ешг бәсләјәрди. Ашура зијарәтини вә тәвәссүлү тәрк етмәзди. Имам Һүсејнин (ә) әзадарлыг мәрасимләриндә чох фәал оларды. О, бујурурду: “Әлламә Тәбатәбаји Мәһәррәм-Сәфәр әјјамыны вә Ашура зијарәтини тәрк етмәмәјимизи вурғулајарды”.
Мәрһум Гудусинин достларындан бири јазыр: “О, Ашура зијарәтинә риајәт едәрди. О заман ки, вәзифә дашыјырды, мән јухуда ҝөрдүм ки, Ашура зијарәтини охумағын нәтиҹәсиндә она хүсуси бир елм верилмишди. Она бу мәсәләни дејәндә чох тәсирләнди вә бујурду: “Бир мүддәтдир ки, тофиг әлдә едә билмирәм”. Бу да онун ишләринин чох олмасына ҝөрә иди. Она ҝөрә бир мүддәт иди ки, бу зијарәти охумаға мүвәффәг олмамышды”.
Мәрһум Мирзә Мәһлати өмрүнүн сон 30 илиндә Ашура зијарәтини тәрк етмәзди. О заман ки, хәстә олур вә охуја билмирди, көмәкчи тутурду.
Шәһид Дәстиғејб јазыр: “Мәрһум Ајәтуллаһ Һаҹы Шејх Абдулкәрим Һајиридән нәгл едилир: "О заман ки, Самиррада дини елми тәһсил алырдым, Самиранын әһалиси вәба вә таун хәстәлијинә мүбтәла олурлар. Һәр ҝүн бир нечәси өлүрдү. Бир ҝүн мәнзилдә дајанмышдым. Бир нечә елм әһли топлашмышдылар. Бирдән Мәрһум Мирзә Муһәммәд Тәги Ширази тәшриф бујурду вә сөһбәт вәбадан дүшүр вә һамы бу хәстәлијә тутулмаг тәһлүкәсиндә иди. Мәрһум Мирзә деди: “Әҝәр мән бир һөкм десәм, әмәл едиләр, јохса јох?" Һамы деди ки, бәли. Бујурду: "Мән һөкм верирәм ки, Самиррада сакин олан Әһли-Бејт (ә) давамчылары бу ҝүндән башлајараг, он ҝүн мүддәтиндә Ашура зијарәтини охусун. Онун савабыны Һүҹҹәт ибни Һәсәнин (ә) анасы Нәрҹисә һәдијјә ҝөндәрсинләр ки, бу бәла онлардан узаг олсун". Мәҹлис әһли бу һөкмү һамыја чатдырдылар. Һамы Ашура зијарәтини охумаға башлады. Онун сабаһысы ҝүнү Әһли-Бејт (ә) давамчыларындан һеч ким өлмүр. Әһли-тәсәннүндән бәзиләри бунун сәбәбини өјрәнәндән сонра онлар да Ашура зиајрәтини охумаға башладылар. Бәла онлардан да әл чәкир.
Мирзә Ширазинин Ашура әјјамында Кәрбәладакы евиндә мәрсијә охунарды. Ашура ҝүнү исә тәләбә вә алимләрлә бир јердә Имам Һүсејнин (ә) вә Әбүлфәзл Аббасын (ә) зијарәтинә ҝедәрдиләр. Мирзә адәт етмишди ки, һәр ҝүн бу зијарәти охусун. Сонра әзадарлыг мәҹлисинә ҝедәрди. Алимләрдән бири дејир: “Бир ҝүн Мирзә гәмҝин вә гејри-ади бир һалла мәҹлисә дахил олур вә бујурур: "Бу ҝүн Һәзрәтин (ә) сусузлуғу мүсибәтиндән охујун”.
Диггәт: Хәбәрдән истифадә етдикдә мәнбәјә истинад лазымдыр
