Әһли Бејт (әлејһимус сәлам) -АБНА- Хәбәр Аҝентлији- Бу бөјүк сәһабәнин шәһадәт хәбәри Әмирәлмө’мининә (ә) јетишдикдә һәзрәт гәм-гүссә ичиндә бујурду: “Һәгигәтән, мән Аллаһын рәсулу үчүн неҹә идимсә, Малик мәним үчүн елә иди.”
Имамын бу дәрин мәналы бујуруғундан мәлум олур ки, Әли (ә) ҝирами пејғәмбәр мәктәбинин ән бөјүк, ән лајигли вә ән камил шаҝирди олдуғу кими Малик Әштәр һәзрәт Әли (ә) мәктәбинин ән бөјүк, ән лајигли вә ән камил шаҝирди олмушдур. Ҝирами пејғәмбәрә кимсә Әмирәл-мө’минин (ә) гәдәр јахын олмамышдыр.
Имамын бу тәбири Малик Әштәри ән дәјәрли шәкилдә вәсф едир, онун уҹа мәгамда олдуғуну билдирир. Белә ки, артыг кимсәни онунла бир мәгама галдырмаг олмур. Чүнки һәзрәт Әли дә икинҹи бир шәхс һаггында ујғун тә’бирләри ишләтмәмишдир.
Һәзрәт Әли (ә) диҝәр бир мәктубда Мисир әһлинә хитабән Малик Әштәри белә танытдырыр: “Һәмд олсун Аллаһа. Мән сизин јаныныза елә бир Аллаһ бәндәсини ҝөндәрдим ки, дәһшәтли ҝүнләрдә јатмаз, горхулу мәгамларда дүшмәнә арха чевирмәз, ҝүнаһкарлара оддан да түнддүр. О Һарис Мәзһәҹинин оғлу Маликдир.
Нә гәдәр ки һагдыр, ону ешидин вә итаәт един. О, күтләшмәјән вә зәрбәси боша чыхмајан Аллаһ гылынҹларындандыр. Сизә көчмәји әмр етдикдә көчүн, дајанмағы әмр етдикдә дајанын. О мәним ҝөстәришим олмадан һүҹум етмәз, ҝеријә чәкилмәз.
Еј Мисир әһли! Мән сизи өзүмүнки билиб ону ҝөндәрдим. Чүнки ону сизә хејирхаһ ҝөрдүм вә дүшмәнләринизә гаршы сәртлијини бәјәндим.”
ДҮШМӘН ДИЛИНДӘН
Мүавијә Маликин шәһадәт хәбәрини ешитдији вахт дәрһал минбәрә галхды ки, өзү кимиләринә бу хош хәбәри чатдырсын! О бу хүтбәсиндә белә деди: “Еј ҹамаат, билин ки, Әли (ә) ибн Әби-Талибин ики әли варды. Бу ҝүн онун һәр ики әли кәсилиб вә әлсиз галыб. Онун бир әли Әммар Јасәр иди. Әммар Сиффејн савашында өлдүрүлдү. Әлинин (ә) диҝәр әли Малик Әштәр иди. Бу ҝүн онун өлүм хәбәрини алдым. Севинин, Әли әлсиз галды!”
Бәли, Мүавијә наданлыг сәбәбиндән Малик Әштәри елә вәсф едир ки, онун сөзләри Маликин мәгам вә шәхсијјәтини ашкарлајыр. Мүавијәнин Малики “Әлинин (ә) икинҹи әли” адландырмасындан мә’лум олур ки, алчаг дүшмәнләр дә Малик Әштәрин Әлинин (ә) ән јахын вә лајигли көмәкчиси олдуғуну билирдиләр.
Һәзрәт Әлинин (ә) Малик Әштәрә мәктубунун шәрһи
Ајәтуллаһ-үзма Мәһәммәд Фазил Ләнкәрани
Диггәт: Хәбәрдән истифадә етдикдә мәнбәјә истинад лазымдыр
