Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Гырғызыстан Дини Ишләр Үзрә Дөвләт Комиссијасы, бәзи Мәсҹидләрдә вәтәндашларын Суријадакы һәрби әмәлијјатлара гатылмаг үчүн тәһрик едилдији илә бағлы иддиалары арашдырыр.
Гырғызыстанын ҹәнубундакы Баткән әјаләтинә бағлы Гызыл-Гија шәһәринин сакинләри өлкәнин Дини Ишләр Үзрә Комиссијасына мүраҹиәт едибләр. Мүраҹиәтдә Түркијәдә олан гырғыз ҝәнҹләринин ҝери гајтарылмасыны тәләб едилир, чүнки бу ҝәнҹләрин валидејнләри өвладларынын Суријаја һөкумәт ордусу илә дөјүшә ҝөндәрилә биләҹәкләриндән нараһатдырлар .
Дөвләт Комиссијасы вәтәндашларынын Түркијәдә олдуглары јерин мүәјјән едилмәси вә өлкәјә ҝери ҝәтирилмәләри үчүн Гырғызыстан Хариҹи Ишләр Назирлијинә көмәк үчүн мүраҹиәт едиб.
Бундан башга Дөвләт Комиссијасынын нүмајәндәләри валидејнләрлә данышыглар апарыр вә ҝәнҹләрин Суријаја ҝөндәрилмәси илә бағлы бәзи мәсҹидләрин ролу олдуғуна даир мәлуматлары деталлы шәкилдә арашдырырлар.
Өлкәнин тәһлүкәсизлик органлары Гызыл-Гија шәһәриндән бир груп ҝәнҹин Суријада һәрби әмәлијјатлара гатылмаг үчүн ҝетдијини тәсдиг едиб. Ҝәнҹләр дини тәһсил алмаг ады алтында ораја ҝөндәрилирләр.
Әлдә едилән мәлуматлара ҝөрә, Гырғызыстандан Түркијәјә, орадан да Суријаја ҝедәнләр арасында гырғыз, өзбәк вә таҹик әсилли јараглылар вар.
Диггәт: Хәбәрдән истифадә етдикдә мәнбәјә истинад лазымдыр
