Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Илһам Әлијев Рамиз Меһдијевә “Шәрәф” ордени верди. Бу, сөзүн һәгиги мәнасында һадисәдир. Илһам Әлијевин бу аддымы атмасыны бир нечә истигамәтдә шәрһ етмәк олар. Режим дахилиндә бу аддым һансы шәрһләрә јол ачаҹаг? Рамиз Меһдијев бу ордендән неҹә истифадә едәҹәк? Беләликлә, еһтимал олунан вариантлар...
“Боз кардинал”ла сағоллашырлар?
Белә бир илкин еһтимал вар ки, узун мүддәтдир ҝүндәмә ҝәтирилән просесә һазырлыг ҝедир. Јәни, медианын тәгдим етдији кими, Илһам Әлијев Рамиз Меһдијеви хидмәтләринә ҝөрә тәлтиф едир вә онунла инзибати апаратда сағоллашыр.
Бу вариантын һәгигәтә јахын олуб-олмамасы барәдә мүлаһизә јүрүдәркән бәзи мәсәләләри нәзәрә алмалыјыг:
1. Илһам Әлијев Рамиз Меһдијеви постундан узаглашдырмаг үчүн рискә о һалда разылыг верәр ки, индијә кими һакимијјәтин үзәриндә галан бир сыра мүһүм ағыр ҹинајәтләр онун үстүнә атылсын;
2. Рамиз Меһдијев һансыса сарајдахили чеврилишдә иттиһам едилсин вә јени шоу илә топлумун һәјәҹаныны азалтмаг мәгсәди ҝүдүлсүн.
Јухарыда ҝөстәрилән һәр ики вариантда ону орденлә тәлтиф етмәк елә дә мәнтигли ҝөрүнмүр. Демәли, биз башга вариант барәдә дүшүнмәлијик.
Илһам Әлијев месаж верир...
Ҝөрүнүр, Илһам Әлијев бу аддымы илә ҹидди месажлар верир. Бу месажлар тәкҹә өлкәнин дахилинә һесабланмајыб, һәм дә дүнјанын бәзи мәркәзләринә јөнәлиб. Беләликлә, кимә вә неҹә?
1. Бу, илк нөвбәдә һакимијјәтин дахилиндәки бәзи груплара месаждыр. Илһам Әлијев демәк истәјир ки, депутат мандатлары, мүһүм дөвләт вәзифәләри јенә дә пулла сатылаҹаг вә алынаҹаг;
2. Илһам Әлијев ислаһат ҝөзләјән јерли вә бејнәлхалг оптимистләрә деди ки, ондан белә аддымлар ҝөзләмәк јерсиздир. О, сијаси апараты ҹәза механизми кими ишләдән адамлары тәгдир вә тәлтиф едир. Бунунла о, һәм дә 2013-ҹү илдә просесләрин һансы гајдаларла идарә олунаҹағына ишарә вурмуш олду;
3. Нәһајәт, Илһам Әлијев “Русија илә арамыза кимсә ҝирә билмәз” бәјанатындан сонра белә бир аддым атмагла арадакы адамын хидмәтләрини гијмәтләндирди. Бу мәнада, һәм дә Рамиз Меһдијеви ислаһатларын гаршысында манеә кими ҝөрән, Әлијевин Гәрбә үз тутаҹағыны дүшүнән бејнәлхалг даирәләр ҹавабларыны алмыш олдулар.
Беләликлә, Илһам Әлијев асан бир диллә деди ки, о, ојун гајдаларыны дәјишмәк фикриндә дејил, бүтүн әнәнәләринә садигдир. Бу һәм дә өлкәнин вә өзүнүн ҝәләҹәјинә даир ачыг мөвге ифадәси иди.
Диггәт: Хәбәрдән истифадә етдикдә мәнбәјә истинад лазымдыр
