Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам ојанышы Һәрәкатынын Өндәри, Азәрбајҹан Ислам Партијасынын һәбсдә олан Лидери Мөвсүм Сәмәдов “Медиа форум” сајтынын суалларыны ҹавабландырыб.
Мөвсүм Сәмәдов 2011-ҹи илин јанварындан, Азәрбајҹана һаким кәсилмиш аилә режимини сәрт тәнгид етдијинә ҝөрә, һәбсдәдир. Әнәнәви олараг, режим структурлары, һәгигәтдән јајынмаг үчүн, Мөвсүм Сәмәдов ҹәнабларыны һакимијјәти зорла әлә кечирмә ҹәһди вә башга ҹинајәтләрлә ШӘРЛӘЈӘРӘК 12 ил мүддәтинә азадлыгдан мәһрум едиб. О, һазырда Бакыдакы 11 сајлы Ҹәзачәкмә Мүәссисәсиндә сахланыр.
- Сахландығыныз ҹәзачәкмә мүәссисәсинин шәраитиндән разысынызмы?
- Бу мүәссисә совет дөврүндә тикилмиш бир бинадыр. Тәсисатлары да ејнилә о дөврдән галмадыр, Авропа стандартларына һеч бир ујғунлуғу јохдур.
- Октјабр ајында президент сечкиси кечириләҹәк. Просесләри изләјә билирсинизми?
- Бура анҹаг игтидар гәзетләрини бурахырлар. Мүхалифәтә аид һеч нә јохдур. Телевизија да, радио да бу типдәдир. Елә бил мүасир Азәрбајҹанда, 21-ҹи әсрдә дејил, кечән әсрин 37-ҹи илиндә јашајырыг. Јалныз буҝүнләрдә өз истәјимлә аилә үзвләрим мәнә мүхалифәт гәзетләри ҝәтириб. Бу 2 илдә биринҹи дәфәдир һәмин гәзетләри ҝөрүрәм.
- Октјабрда кечириләҹәк президент сечкисиндә һансы намизәдә дәстәк верәҹәксиниз?
- Азәрбајҹанын һәгиги истиглалијјәти уғрунда өз сәјини әсирҝәмәјәнә. Бу шәхс илк нөвбәдә Гарабағ проблеминин һәлли јолунда ирадәсини ҝөстәрмәлидир. Белә кејфијјәтләри дашыјан шәхсин варлығыны билсәк, онун бу мүбаризә јолунда ахыра гәдәр давам ҝәтирәҹәјини ҝөрсәк, мүшаһидә етсәк, намизәдлијимизи дә ҝери ҝөтүрмәјә һазырыг. Бу намизәд һазыркы игтидар кими залым, әдаләтсиз јох, инсани кејфијјәтләри олан, әдаләтли, виҹданлы бири олмалыдыр. Һәр һансы ҹәрәјана гуллуг етмәмәлидир. Азәрбајҹанын азадлығыны Авропанын јанында ахтармамалыдыр. Милли-мәнәви мәсәләләрә диггәт јетирмәлидир.
Белә шәхсләр вар, 20 илдә өзләрини ҝөстәриб. Инанырам ки, халгымыз мәһз о адамлара етимад ҝөстәрәҹәк.
- Сизин намизәдлијиниз неҹә, ҝөзләнилирми?
- Лазым ҝәләрсә, намизәдлијими ирәли сүрмәјә һазырам. Бир шәртлә ки, достларымыз вә халгымыз буну истәсин, мәнә етимад ҝөстәрсин. Белә һалда буну өзүмә борҹ, вәзифә һесаб едәрәк сечкидә иштирак едәрәм.
Диггәт: Хәбәрдән истифадә етдикдә мәнбәјә истинад лазымдыр
