Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән 1992 илдә рәсми гејдијјатдан кечән Азәрбајҹан Ислам Партијасынын рәсми сајты “исламинсеси.аз”, Партијанын Рајон Комитәләри илә мүсаһибәләр апармагда давам едир. исламинсеси.аз хәбәр порталынын нөвбәти мүсаһиби Азәрбајҹан Ислам Партијасынын Бинәгәди Рајон Комитәсинин сәдри Һаҹы Рөвшән Нуридир.
- Һаҹы, Бинәгәди Рајон Комитәси нә вахт тәсис олунуб вә фәалијјәтиниз нә јердәдир?
- Бинәгәди Рајон Комитәси 1993-ҹи илдә тәсис олунуб. Партијамыз гејдијјатдан кечдикдән сонра Бинәгәди рајонунда өз комитәмизи тәсис етдик. Вә шүкүрләр олсун ки, јерли әһали бизи јүксәк сәвијјәдә гәбил етди вә бизим сыраларымыза гошулду. Мән бу ҝүн фәхрлә дејә биләрәм ки, бизим сыраларымызы зијалылар, ҝәнҹләр тәшкил едир.
Комитә јаранан ҝүндән јерли ҹамаата хидмәт едиб вә ислами сијаси шүурун ојанмасына јардымчы олуб.
- Иҹра һакимијјәти вә диҝәр дөвләт структурлары тәрәфиндән сизә тәзјигләр олурму ?
- Бәли, тәзјигләр олуб. Һаҹы Мөвсүм Сәмәдовун сон чыхышындан сонра мәни дә Дахили Ишләр Назирлијинә чағырыб сорғу-суал едиб, сонра сәрбәст бурахдылар. Һал-һазырда исә елә бөјүк бир тәзјиг јохдур.
- Һәбсләрдән сонра АИП-ин ҝетдији јолда даһа да мөһкәм олмасыны нә илә әлагәләндирисиниз?
- Биз тәгиб вә тәзјигләрдән сонра даһа да мөһкәм вә ирадәли олмушуг. Азәрбајҹан Ислам Партијасы (АИП) бүтүн ишләрини Аллаһа хатир ҝөрдүјүнә ҝөрә, һеч бир тәзјиг, тәгиб вә чәтинлијә маһал гојмајараг өз јолунда шүҹаәтлә аддымлајыр. Бундан сонра да аддымлајаҹаг. Бинәгәди Рајон Комитәси олараг биз Имам Һусејн(ә) мәктәбиндән фајдаланараг халга хидмәт ҝөстәрир вә халга хидмәт етмәји Аллаһа хидмәт һесаб едирик.
- Ислам Партијасы бу ил кечириләҹәк президент сечкиләриндә фәаллыг ҝөстәрәҹәјини бәјан етмишдир. Бунун перспективлијини нәдә ҝөрүрсүнүз?
- Сечкидә истәр партија үзвү ол, истәр олма, ама иштирак етмәк һәр бир вәтәндашын конститусион борҹудур. Сијаси бир партија кими биз дә бу сечкиләрә гошулаҹағыг. Перспективлијини өз сосиал базамыза ҝүвәнмәкдә ҝөрүрүк. Үмүд едирәм ки, бу сечкиләр Азәрбајҹан халгы үчүн уғурлу олаҹаг.
- Үмумијјәтлә сечки демократија, халгын һакимијјәти демәкдир. Сиз Азәрбајҹанда демократик сечки кечириләҹәјинә инанырсыныз?
- Баш верән сијаси просесләр ҝөстәрир ки, Азәрбјҹанда демократик сечкиләр кечирилмәјиб вә бу ил дә кечирилмәјәҹәк. Буна бахмајараг, биз сечкиләрдә иштирак едәҹәјик. Чүнки јухарыда гејд етдијим кими, бу, бизим конститусион һүгугумуз вә бир вәтәндаш кими борҹумуздур.
- Бир азәрбајҹанлы вә диндар кими әһалисинин 97 фаизи мүсәлман олан бир мәмләкәтин президентини рәһбәр кими неҹә ҝөрмәк истәрдиниз?
- Мән Азәрбајҹан Республикасынын президентини Ислам дәјәрләринә һөрмәт едән бир шәхс олмасыны истәјирәм. Биз исламчы олараг Азәрбајҹанда проблемләрин һәллини, һаггын вә әдаләтин бәрпа олмасыны Ислам дининдә вә Ислам дини илә ҝөрүрүк. Азәрбајҹан халгынын ҝәләҹәк сәадәтини гәрб аиләсинә үзв олмагда дејил, һагга вә мәнәвијјат јолуна хидмәт етмәкдә ҝөрүрүк. АИП-ин Бинәгәди комитәси кими сијаси-иҹтимаи вәзифәмизи дәрк едәрәк Имам Һүсејн мәктәбиндән фајдаланараг халга хидмәт ҝөстәрир вә бунунла фәхр едирик.
Диггәт: Хәбәрдән истифадә етдикдә мәнбәјә истинад лазымдыр
