Әһли Бејт -АБНА- хәбәр аҝентлији- Адынын чәкилмәсини истәмәјән Исмајыллы сакинләринин фикринҹә, инди рајонда һамы тутуланлардан, онлара верилән ишҝәнҹәләрдән горха-горха данышыр.
«СИНӘМӘ ВУРУЛАН ЗӘРБӘЛӘРДӘН СОНРА ЧӘТИН НӘФӘС АЛЫРАМ»
29 јашлы Исмајыллы сакини Турал Умудлунун дедијинә ҝөрә, ону јанварын 24-дә јолда тутублар. Даһа сонра полис бөлмәсинә апарыблар:
«Мәни дөјә-дөјә полис бөлмәсинә апардылар. Бизи бир отаға салдылар. 10 нәфәр идик. Чевик Полис Алајынын әмәкдашлары төкүлдүләр үстүмүзә. Бир-бир һамымызы вәһшиҹәсинә дөјдүләр. Јерли полисдән бизә әл галдыран олмады. Бизи дөјән, ишҝәнҹә верән Чевик Полис Алајынын әмәкдашлары иди. Резин дәјәнәк, јумруг, тәпик... Онлар јетишдирилмиш идманчылар иди. Онларын неҹә дөјмәсини тәсәввүр един. Ахшам саат 9-дәк бизи полисдә сахладылар. 9-дан сонра полис шөбәсинин арха гапысындан чыхарыб УАЗ маркалы полис машынына долдурдулар. 9 нәфәри ајаг үстә, әјилмиш вәзијјәтдә Ҝөјчај КПЗ-ә апардылар. Синәмә вурулан чохсајлы јумруг зәрбәләри нәтиҹәсиндә бу дәгигә нәфәс алмагда чәтинлик чәкирәм».
Турал Умудлу 400 манат ҹәримә олунандан сонра бурахылыб.
Исмајыллы сакини Рәһим Фактијев дә јанварын 24-дә тутулубмуш. Ахшам ону бурахыблар. Рәһим дејир ки, јерли полисдә ону инҹитмәјибләр. Анҹаг јолда вурублар:
«Мәни гапымын ағзында тутмушдулар. Ушағын ардынҹа күчәјә чыхмышдым. Ҝөзјашардыҹы газдан истифадә едирдиләр. Апаранда мәнә ишҝәнҹә вердиләр, вурдулар. Анҹаг полисдә инҹитмәдиләр. Мәни вуран ҝәлмә полисләр иди. Өз рајонумузун полисләри һеч нә етмирдиләр».
Һүгуг Маарифчилији Ҹәмијјәтинин сәдри Интигам Әлијев билдирир ки, онлара Исмајыллыда тутуланлара ишҝәнҹә верилмәси һаггында мәлуматлар ҝәлир:
«Мәлуматларын нә дәрәҹәдә доғру олуб-олмадығыны ајдынлашдырмаға еһтијаҹ вар. Үмумијјәтлә, ДИН-ин Мүтәшәккил Ҹинајәткарлыға Гаршы Мүбаризә Идарәсиндә белә тәҹрүбә ҝениш јајылыб. Тутуланларын бир һиссәсинин дә һәмин идарәдә сахланмасы һаггында мәлумат вар. Тәәссүф ки, онларын нә јахынларына, нә дә вәкилләринә мәлумат верилмир. Она ҝөрә һесаб еләдик ки, бир груп иҹтимаијјәт нүмајәндәси бу мәсәләләри јериндә арашдыраг».
ДИН: «ДӨЈҮЛӘН ВАРСА, МҮРАҸИӘТ ЕТСИН»
Дахили Ишләр Назирлији мәтбуат хидмәтинин әмәкдашы Еһсан Заһидов полисин тутуланлара ишҝәнҹә вермәсини јаланлајыр: «Полис адамлары нијә дөјмәлидир ки? Полис иҹтимаи асајиши мүһафизә едиб, горујуб. Бир груп адамын асајиши позмаға јөнәлмиш ҹәһдинин гаршысы алыныб. Дөјүлмәни тәкзиб едирәм. Кимләринсә орада полис тәрәфиндән дөјүлмәси барәдә һәр һансы бир мүраҹиәт дахил олмајыб. Дөјүлән адам варса, мүраҹиәт етсин, арашдыраг».
Турал Умудлу дөјүлмәси һаггында мәһкәмәјә, прокурорлуг органларына мәлумат вердијини сөјләјир, анҹаг шикајәтинин арашдырылаҹағына инанмыр.
Исмајыллы һадисәләриндә сахлананларын сајы һаггында мүхтәлиф рәгәмләр сәсләнир. Јерли иҹра органларынын нүмајәндәләри ән чоху 30 адамын тутулдуғуну дејир. Гејри-рәсми мәлуматлар ҝөрә, азы 100 адам сахланыб. Баш Прокурорлуғун мәтбуат хидмәтиндән билдирдиләр ки, Республика Прокурорлуғунун Ағыр Ҹинајәтләрә Даир Ишләр үзрә Истинтаг Идарәсиндә сорушдурма апарылыр. Сахлананлар һаггында јени мәлумат јајаҹаглар.
Диггәт: Хәбәрдән истифадә етдикдә мәнбәјә истинад лазымдыр
