Ону илк дәфә шәһид Фәрид Әһмәдовун 40 мәрасиминдә ҝөрмүшдүм. Онунла илк вә һәлә ки, сон ҝөрүшүм о заман олуб. Сејјид Мүбаризин, Шәһид Фәрид вә Әһмәдин шәрәфинә кечирилән мәрасимдә чыхыш етди. Гыса амма мәналы. Шәһадәтин маһијјәтини сөјләди вә шәһидләримизин уҹа мәгамындан данышды. Сонда исә һиҹаб мәсәләсинә тохунду. Јанымдакылардан онун кимлији барәдә сорушдум. Руһанидир. Һаҹы Илгардыр. Танымырсан? Ҹавабыны алдым. Лакин сонрадан онун һәбси бу уҹа мәгамлы инсаны даһа јахындан танымағыма сәбәб олду. Һәр мәһкәмәсиндә етдији чыхышлар вә нүмајиш етдирдији әсл Имам Һүсејн (ә) ашиги нүмунәси бу инсан һаггында дүшүнмәјә вадар етди мәни.
Онун “Мәним шаһидим дә, һакимим дә, вәкилим дә Аллаһдыр" сөзү бәлкә дә бу инсанын бүтүн дахили аләмини ортаја гојан бир ифадәдир. Атдығы һәр бир аддымы Аллаһ хатиринә олан бир инсан бу сөзләри дејә биләр. Аллаһы өзүнә вәкил едән бири үчүн зиндан әлбәттә ки, мәғлубијјәт дејил. Амма бу ҹәсарәтли инсанын бир ҹүмләси онун өзүнә һаким вә вәкил гәрар вердији Аллаһ гаршысында нә гәдәр тәвәзүкар оолдуғуну сүбут етди. “Мәним үчүн сизин ганунларыныз әсас дејил. Мәним үчүн әсас Аллаһын ганунларыдыр. Мән она риајјәт едирәм. Мән һәмишә Аллаһын һөкмләрини бу милләтә чалышмышам чатдырам, бу мәним һаггымдыр"дејәрәк зүлмә мејдан охујан бу бөјүк инсанын "Мән һәбсә дүшән диндарлардан, Исламы дүзҝүн шәкилдә тәблиғ едиб 11 ил һәбс ҹәзасына мәһкум олунан Һаҹы Абҝүлүн ајағынын алтынын тозу да ола билмәрәм" демәси Һаҹы Илгарын нә гәдәр тәвәзүкар бир инсан олдуғунун сүбутудур.
"Ислама зәрбә дәјәндә Руһанијјәт суса билмәз" сөзләри илә һәбс олунмагдан горхараг ағызларына су алыб отуранлара хитаб едәрәк һаггы демәјин ваҹиб олдуғуну диггәтә чатдыран Һаҹы Илгар "Мән бөјүк зиндандан чыхыб кичик зиндана дүшмүшәм. Мән чөлдә раһатлыг ҝөрмәмишдим. Бурда чох раһатам" дејәрәк әдаләтсизлијин дүз ҝөзүнүн ичинә башы дик бахды.
P.S. 11 ај галды һәбсдә Һаҹы Илгар. Инди азадлыға чыхыр. Амма өзүнүн дедији кими инди дә кичик зиндандан бөјүк зиндана гајыдыр. Һаҹы Сәни јенидән арамызда ҝөрмәк бизим үчүн шәрәфдир. Сән бир даһа бизләрә һаггы мүдафиә етмәјин, зүлмә бојун әјмәмәјин неҹә олдуғуну әјани шәкилдә сүбут етдин. Һамымызын ҝөзү ајдын.
Әли Ҹәфәри
Диггәт: Хәбәрдән истифадә етдикдә мәнбәјә истинад лазымдыр
