Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Зијалылар Форумунун јарадыҹыларындан олан јазычы, Русија Азәрбајҹан Тәшкилатлары Иттифагынын Координасија Шурасынын үзвү Рүстәм Ибраһимбәјов декабрын 30-да мүсаһибә вериб. Илк суал баш назирин сабиг биринҹи мүавини, Русија Азәрбајҹан Тәшкилатлары Иттифагы Координасија Шурасынын сәдри Аббас Аббасовун бу јахынларда Бакыда президент Илһам Әлијевлә кечирдији ҝөрүш һагда олуб:
- Ики ҝүн әввәл Аббас Аббасовла ҝөрүшдүм. Аббас Аббасов бир нечә ҝүн әввәл Бакыда президент Илһам Әлијевлә ҝөрүшүб. Ҝөрүшдән разыдыр. Мән дә һесаб едирәм ки, чох дәјәрли вә фајдалы ҝөрүш олуб. Чүнки бундан әввәл президент Аббас Аббасову гәбул етмәк истәмирди. Она ҝөрә дә сонунҹу аддым јахшы һадисәдир.
- Аббас Аббасовун президент Илһам Әлијевлә ҝөрүшүндә һансы мәсәләләр мүзакирә олунуб?
- Бир нечә мәсәлә, о ҹүмләдән јени јарадылан Русија Азәрбајҹан Тәшкилатлары Иттифагынын фәалијјәти мүзакирә олунуб. Азәрбајҹанда бу тәшкилата “Милјардерләр иттифагы” дејирләр. Амма тәшкилатын тәсисчиләри арасында касыб адамлар да вар. Мән дә онлардан биријәм. Иттифаг бундан сонра да фәалијјәт ҝөстәрәҹәк. Аббас Аббасов исә сәдр кими галаҹаг. Мәсәлә ондадыр ки, Аббас Аббасов Русија Азәрбајҹан Тәшкилатлары Иттифагынын тәсисчиси дејил. Тәсисчиләр једди-сәккиз гурум вә шәхсдир. Биз ону сәдр сечмишик. Аббас Аббасовун тәшкилатын фәалијјәтинә хитам вермәјә сәлаһијјәти јохдур. Һәр шеј тәсисчиләрдән асылыдыр. Буну президентә дә дејиб. Аббас Аббасовун мәнә дедикләриндән белә баша дүшдүм ки, дөвләт башчысы бунлары гәбул едиб вә һәр һансы етираз билдирмәјиб.
Бурада бир мәсәлә дә вар. Русија Азәрбајҹанлыларынын Федерал Милли-Мәдәни Мухтаријјәти – “АзәрРос”ун президенти Сөјүн Садыгов сијаси фәалијјәтлә мәшғул олаҹаг. О, Русијада јени сијаси партија јарадыр. Амма Русија Конститусијасы “АзәрРос” типли тәшкилатларын рәһбәри олан шәхсләрә сијаси фәалијјәтлә мәшғул олмағы гадаған едир. Индики һалда Сөјүн Садыгов сијаси фәалијјәт ҝөстәрә билмәз. Она ҝөрә дә “АзәрРос”ун президенти вәзифәсиндән ҝетмәлидир. Мәсәләни мүзакирә етмишик вә һамымыз белә гәрара ҝәлмишик ки, “АзәрРос”ун президенти вәзифәсинә Аббас Аббасовдан јахшы намизәд јохдур. Јанвар ајында “АзәрРос”ун президенти вәзифәсиндә Аббас Аббасов ҝәләҹәк. Буну белә планлашдырмышыг. Амма бу, Русија Азәрбајҹан Тәшкилатлары Иттифагынын ләғв олунаҹағы, фәалијјәт ҝөстәрмәјәҹәји анламына ҝәлмир. Һәр шеј әввәлки гајдасында ҝедәҹәк.
Бүтүн бунлара бахмајараг Бакыда бәзи рәсмиләр һәлә дә Русија Азәрбајҹан Тәшкилатлары Иттифагынын әлејһинә бәјанатлар верирләр. Мәнә зәнҝ едиб дедиләр ки, Диаспорла Иш үзрә Дөвләт Комитәсинин сәдри Назим Ибраһимов јенә дә бизим тәшкилата һүҹум едиб. Бу, бөјүк сәһвдир. Чүнки бу тәшкилатын Азәрбајҹанын дахили сијасәти илә һеч бир бағлылығы, фәалијјәти јохдур. Биз Русија Азәрбајҹан Тәшкилатлары Иттифагыны бир мәгсәдлә јаратмышыг - бу да Русијада јашајан азәрбајҹанлылара көмәк етмәкдир. Мәгсәдимизә садигик. Инди азәрбајҹанлыларын көмәјә даһа чох еһтијаҹы вар. Чүнки Русијада јени ганунлар гәбул олунуб. Инди сојдашларымыза көмәк етмәк лазымдыр, проблем бөјүкдүр.
Бүтөвлүкдә мүхтәлиф анлашылмазлыглар варды вә президентлә ҝөрүшдән сонра бунлар арадан ҝөтүрүлдү. Амма иттифаг Русијанын иҹтимаи тәшкилатыдыр. Она ҝөрә дә Азәрбајҹан президенти һәр һансы мәсләһәт, төвсијә верә биләр, амма иттифагын фәалијјәти Русијанын дахили ишидир. Иттифагын ишинә белә ачыг формада, кобуд мүдахилә етмәк, буну јајмаг олмаз. Чүнки бу, Русијадакы ишимизә зијан вура биләр.
- Үмумрусија Азәрбајҹанлылары Конгресинин ҝәләҹәјини неҹә ҝөрүрсүнүз? Русија Азәрбајҹан Тәшкилатлары Иттифагында тәмсил олунанларын јенидән бу тәшкилата гајытмасы мүмкүндүрмү?
- Биз Үмумрусија Азәрбајҹанлылары Конгресини чохдан јаратмышыг. Конгрес чох ҝөзәл ишләјирди. Амма тәхминән ики ил әввәл Азәрбајҹандан Москваја бир нечә нәфәр ҝетди вә конгресин фәалијјәтини поздулар. Орада кимисә ишдән чыхардылар, кимисә ишә ҝәтирдиләр. Артыг ики илдир ки, Үмумрусија Азәрбајҹанлылары Конгреси гејдијјатдан кечә билмир. Она ҝөрә дә биз јени иттифагы јаратдыг. Әҝәр конгрес гејдијјатдан кечә, лазыми ислаһатлар кечирилсә вә фәалијјәтини бәрпа етсә, биз мәмнунијјәтлә Үмумрусија Азәрбајҹанлылары Конгресинин ишиндә иштирак едәрик. Амма биринҹиси, һәләлик конгрес гејдијјатдан кечмәјиб. Икинҹиси, конгресин “АзәрРос”ла мүнасибәтләри чох писдир. Аббас Аббасовун мәнә дедикләриндән ајдын олду ки, президент бу ики тәшкилатл арасында мүнасибәтләрин дүзәлмәсинин, бу тәшкилатларын бирҝә фәалијјәт ҝөстәрмәсинин ваҹиб олдуғуну сөјләјиб. Дөвләт башчысы ики тәшкилатын мүнасибәтләрини нормаллашдырмағы Аббас Аббасова тапшырыб.
- Јәни президент Илһам Әлијев Русија Азәрбајҹан Тәшкилатлары Иттифагынын фәалијјәт ҝөстәрмәсинә разыдыр? Әҝәр Аббас Аббасов “АзәрРос”ун президенти олса, иттифага јени сәдр сечиләҹәк?
- Хејр, Аббас Аббасов иттифагын сәдри постунда да галаҹаг. Онун өзүнүн дедијиндән дә ајдын олду ки, президент буна разылыг вериб.
- Рүстәм мүәллим, фәалијјәти дајандырылан Азәрбајҹан Бејнәлхалг Университетинин ректору Елшад Абдуллајев мүхтәлиф видеолар јајыр. Бу видеолардан ҝөрүнүр ки, оғурланмыш гардашы Маһир Абдуллајевин гајтарылмасы, өзүнүн депутат сечилмәси үчүн ондан күлли мигдарда пул алыблар. Видеоларда чох јүксәк вәзифәли мәмурларын ады чәкилир. Бир нечә ҝүн әввәл исә галмагалларын фигурларындан олан Севинҹ Бабајева Түркијәдә дүнјасыны дәјишиб. Бунлары неҹә гијмәтләндирирсиниз? Сизҹә, ҹәмијјәт буна неҹә реаксија вермәлидир?
- Чох мүһүм мәсәләдир. Видеоларда чох ваҹиб, конкрет информасијалар вар. Ҹәмијјәт Елшад Абдуллајевин сөзләринә мараг ҝөстәрмәли, һәр шејин тез бир заманда дәгиг арашдырылмасыны, нәтиҹәләр барәдә халга ајдын ҹаваблар верилмәсини тәләб етмәлидир.
Һакимијјәт ҹаваб вермәлидир ки, ҝөрәк Севинҹ Бабајева үзәриндә ҹинајәт иши ола-ола хариҹи өлкәјә неҹә ҝедиб? Неҹә олду ки, дүнјасыны дәјишди? Бунларын һамысы чох шүбһәли мәсәләләрдир.
Диггәт: Хәбәрдән истифадә етдикдә мәнбәјә истинад лазымдыр
