Әһли Бејт -АБНА- хәбәр аҝентлијинин вердији хәбәрә әсасән Иран Ислам Шура Мәҹлисинин Милли Тәһлүкәсизлик вә Хариҹи Сијасәт Комиссијасынын сәдр мүавини доктор Мәнсур Һәгигәтпур Азәрбајҹан Милли Мәҹлисинә мәктуб үнванлајараг Азәрбајҹан Республикасы вә Иран Ислам Республикасы вәтәндашларынын садәләшдирилмиш гајдада сәрһәди кечмәләри һаггында меморандумун ләғв едилмәсинә етиразыны билдирмишдир. Мәктубун мәтни ашағыдакы кимидир:
Аллаһын ады илә
Салам, Азәрбајҹан Парламентиндәки достлар, баҹы вә гардашлар!
Хәбәрләрдән өјрәндим ки, кечмиш тарихи, мәдәни ортаглыглардан истифадә етмәклә вә ики өлкә рәсмиләринин диггәт вә сәји нәтиҹәсиндә Азәрбајҹан вә Иран һөкумәтләри арасында сәрһәдјаны рајонларда јашајан һәр ики өлкә вәтәндашларынын садәләшдирилмиш гајдада сәрһәди кечмәләри һаггында меморандуму ләғв етмәклә шәрафәтли, нәҹиб вә әзиз Азәрбајҹан халгыны бу имкандан мәһрум етмиш вә ики халгын тарихи интизары олан мәдәни вә игтисади инкишафына манечилик јаратмысыныз.
Әлбәттә, Иран тәрәфиндән виза режими ләғв олундуғундан бизим гәдим һәмвәтәнләримизин һамысы јенә дә өз ана вәтәнләри Ирана ҝәлә биләрләр вә шүбһәсиз ки, Ислами Иран халгы вә мәсуллары онлары өз исти ағушуна алаҹагдыр.
Бадкубә Парламентиндәки достлар!
Ики өлкә халгынын мәдәни, иҹтимаи вә игтисади бағлылығы сизин үчүн бу гәдәр дөзүлмәз олуб ки, Парламентин бүтүн имканларыны топлајараг вә вахт сәрф едәрәк ҝедиш-ҝәлиши ләғв едән гәрар гәбул едирсиниз?!
Мәним Бадкубәли достларым!
Билирсинизми, кечмиш совет һөкумәти ики јерә парчаланмыш бу милләтин әлагәләринин ҝенишләнмәсиндән сиздән дә артыг ниҝаран иди, лакин бу әлагәни гыра билмәди?
Совет һөкумәти дағыландан сонра Аразын шималындакы әһалинин Ирандакы гардашларына говушмаг үчүн тәлашлары нәдән хәбәр верир?
Халгын бу мәдәни вә һәгиги еһтијаҹынын гаршысыны бу јолла ала биләҹәксиниз?!
Елә билирсиниз, гејри-дини либерал мәдәнијјәт мејдан вермәклә халгы диндарлыгдан вә адәт-әнәнәләриндән ајыра биләҹәксиниз?!
Азәрбајҹан Парламентинин нүмајәндәләри!
Сизин бу гәрарыныз мәнтәгә әһалисинин истәк вә бахышлары илә ујғундурму? Унутмајын ки, сиз халгын нүмајәндәсисиниз. Бу мүсәлман халгын мүгәддәсликләринә анд ичмисиниз ки, онларын арзуларыны реаллашдыраҹагсыныз. Сиз сионист вә гәрб јөнлү бахышлары өзүнүзә јол сечмәмәлисиниз. Јадда сахлајын ки, сонда јенә халгын ағушуна гајытмалысыныз. О вахт халг сизи онун тәмсилчиси олмадығыныз үчүн рәдд едәҹәк вә халг арасында јериниз олмајаҹаг. Әҝәр Аллаһа вә Гијамәтә етигадыныз варса, јадынызда галсын ки, гәбул етдијиниз һәр бир ганун үчүн ахирәтдә Бөјүк Аллаһ гаршысында ҹаваб вермәли олаҹагсыныз.
Мәним Бадкубәли достларым!
Өз мәнтәгәнизин имкансыз ҹамаатынын хејринә нечә гәрар гәбул етмисиниз?
Мәним Бадкубәли достларым!
Гарабағын азад олунмасы вә гачгынларын өз јурдларына гајытмасы үчүн бир гәрар гәбул етмисинизми?
Азәрбајҹанда әдаләтин бәрпасына көмәк едән бир гәрарыныз вармы?
Бәзиләринин ағласығмаз ганунсуз ҝәлирләр әлдә етмәси, бунун мүгабилиндә халгы мөвҹуд имканлардан мәһрум едән чиркли пулјума илә мүбаризә үчүн бир гәрар гәбул етмисинизми?
Азәрбајҹан Парламентинин нүмајәндәләри!
Индијә кими дүнја мәзлумларынын мүдафиәси мәгсәдилә бир бәјанат, јахуд гәрар гәбул етмисинизми? Мәсәлән, Фәләстин, Сурија, Мјанмар мәзлумларынын мүдафиәси үчүн нә етмисиниз? Әҝәр бу барәдә бир иш ҝөрмүсүнүзсә, Аллаһ гүввәт версин. Онун бир нүсхәсини Теһран Парламентинә ҝөндәрин ки, истифадә едилсин. Әҝәр бир иш ҝөрмәмисинизсә, нә үчүн?
Мәним достларым, билин! Дүнја Аллаһын мәһзәридир. Сиз Аллаһын һүзурундасыныз вә О сизин бүтүн әмәлләринизи ҝөрүр. Бөјүк Аллаһ халгын һаггыны гәсб едән залым вә тәҹавүзкарлары Гијамәт ҝүнү мүтләг ҹәзаландыраҹаг.
Инсанлары өз идеоложи вә иҹтимаи мәгсәдләринә чатмагдан мәһрум етмәк онлара бөјүк зүлмдүр.
Мәнсур Һәгигәтпур
Диггәт: Хәбәрдән истифадә етдикдә мәнбәјә истинад лазымдыр
