Әһли Бејт -АБНА- хәбәр аҝентлијинин вердији хәбәрә әсасән Авропа Инсан Һүгуглары Мәһкәмәси 10 нәфәр Азәрбајҹан вәтәндашынын иши үзрә гәрарыны ачыглајыб. Мәлуматы вәкил Әсабәли Мустафајев вериб.
Вәкил билдириб ки, чыхарылан гәрарлар 2003-ҹү илдә президент сечкисиндән сонра, октјабрын 16-да Бакыда кечирилән митингдә иштиракына ҝөрә һәбс олунан шәхсләрин шикајәтләри илә бағлыдыр. Сөһбәт Мүсават Партијасынын үзвләри Бәһруз Әсәдбәјли, Һәсән Мәммәдов, Елшад Мәммәдов, Емин Һүсејнли, Ширәли Һәмидов, Салеһ Әлијев, Рамиз Гулијев, Садиг Дашдәмирли, Дини Етигад вә Виҹдан Азадлыгларыны Мүдафиә Мәркәзинин рәһбәри Һаҹы Илгар Ибраһимли вә һәрби експерт Јашар Ҹәфәрлидән ҝедир.
Авропа Мәһкәмәси адычәкилән шәхсләрин әдаләтли мәһкәмә арашдырмасы, вәкиллә тәмин едилмә вә башга бир сыра һүгугларынын позулдуғуну таныјыб.
Авропа Мәһкәмәсинин гәрарына әсасән, Азәрбајҹан дөвләти ајры-ајрылыгда Бәһруз Әсәдбәјли, Һәсән Мәммәдов, Емин Һүсејнли, Ширәли Һәмидов, Салеһ Әлијев, Рамиз Гулијев, Садиг Дашдәмирли вә Јашар Ҹәфәрлијә 10 мин авро (ҹәми 80 мин авро), Елшад Мәммәдова 12 мин авро, Һаҹы Илгар Ибраһимоғлуна исә 12 мин 400 авро тәзминат өдәмәлидир. Беләликлә, мәһкәмә адычәкилән 10 нәфәрин иши үзрә Азәрбајҹан дөвләтини үмумиликдә 104 мин 400 авро ҹәримәләјиб.
Әсабәли Мустафајевин сөзләринә ҝөрә, Авропа Мәһкәмәси Елшад Мәммәдовун ишини диҝәрләриндән она ҝөрә фәргләндириб ки, Елшад Мәммәдов ејни әмәлә ҝөрә ики дәфә ҹәзаландырылыб: “О, әввәлҹә инзибати гајдада һәбс олунуб, сонра исә барәсиндә ҹинајәт иши галдырылараг ҹинајәт мәсулијјәтинә ҹәлб олунуб вә мәһкум едилиб. Авропа Инсан Һүгуглары Конвенсијасы ејни әмәлә ҝөрә ики дәфә ҹәза алмағы инсан һүгугларынын позунтусу сајыр. Һазырда Азәрбајҹанда ејни әмәлә ҝөрә ики дәфә ҹәзаландырылма һалы ҝениш јајылыб. Бу хүсусән сијаси характерли ишләрдә өзүнү ҝөстәрир. Һүгуг мүдафиәчиси Видади Исҝәндәрли, АХҸП үзвү Дәјанәт Бабајев, Мүсават Партијасы Ҝәнҹләр Тәшкилатынын сәдр мүавини Әһәд Мәммәдли вә диҝәрләри ејни әмәлә ҝөрә ики дәфә ҹәзаландырылыблар. Һесаб едирәм ки, Азәрбајҹан мәһкәмәләри Авропа Мәһкәмәсинин бу гәрарындан нәтиҹә чыхармалы вә ҝәләҹәк фәалијјәтләриндә ону нәзәрә алмалыдырлар”.
Диггәт: Хәбәрдән истифадә етдикдә мәнбәјә истинад лазымдыр
