Әһли Бејт -АБНА- хәбәр аҝентлијинин вердији хәбәрә әсасән 2011-ҹи ил мајын 6-да Бакыда кечирилмиш “Һиҹаба Азадлыг” аксијасына ҝөрә 1 ил 6 ај мүддәтинә азадлыгдан мәһрум олунмуш илаһијјатчы Тале Бағыров әлијевләр режиминин Раманадакы 16 сајлы Ҹәзачәкмә калонијасында сахланылыр. Талеһ Бағыров ачыглама вериб.
О јазыр: “Сон илләр Азәрбајҹанда ислами ојаныш сүрәтлә бөјүмәкдәдир. Хүсусилә ҝәнҹләримизин ислам дининә бағлылығы артдыгҹа һакимијјәтин динимизә гаршы өҝеј мүнасибәтинә етиразлар ҝенишләнир. 5 октјабр 2012-ҹи илдә инанҹлы инсанларын кечирдији нөвбәти “Һиҹаба азадлыг” аксијасы бир даһа сүбут етди ки, мүбаризә мејданына чыхан ҝәнҹләри һеч бир һәдә-горху илә кәнарлашдырмаг мүмкүн дејил. Һакимијјәтин ислам дининә вә онун атрибутларына лагејдлији, вердији әсассыз гәрарлар, милләтә зүлм вә рәзаләт инсанлары бездириб.
5 октјабр аксијасында һакимијјәт полисин ганунсуз һәрәкәтләринә инанҹлы инсанларын дирәнишинин шаһиди олду. Баш верән гаршыдурманын ҝөзләнилмәз нәтиҹәләри һакимијјәти тәшвишә салды, һаким режимин сүтунларыны силкәләди. Тәбии ки, һакимијјәт дүшдүјү сијаси бөһрандан чыхмаг үчүн баш верәнләрин архасында хариҹи гүввәләрин олдуғуну бәјан етди, нөвбәти дәфә иҹтимаијјәтә јалан мәлумат верди. Һакимијјәт аксијанын мәнбәји кими Суријанын үзәриндә дајанды.
Мәтбуатда јазылдығы кими, 5 октјабр аксијасы ҹидди шәкилдә һазырланса да, аксијанын өзүндә танынмыш илаһијјатчылар вә руһаниләр иштирак етмирдиләр. Белә бир вәзијјәтлә гаршылашдығындан һакимијјәт чыхыш јолу тапа билмирди. Әлаҹсыз галараг һәбс едиләнләрдән Маштаға сакини олан 4 нәфәри 5 октјабр аксијасынын тәшкилатчысы кими тәгдим едиләр. Лакин тезликлә мәлум олду ки, һәмин 4 нәфәрин һеч биринин дини тәһсили јохдур вә онларын һеч бири Суријада олмајыб.
Нөвбәти уғурсузлугдан сонра һакимијјәт мәнсублары өлкә вәтәндашлары арасында Суријада дини тәһсил алмыш илаһијјатчы ахтарышына башладылар. Суријада дини тәһсил алмыш илаһијјатчы Ҹавид Мәммәдов һәбс олунду. Белә бир нәтиҹә һәм һүгуг мүһафизә органларына сәрф едирди, һәм дә онлары һакимијјәт рәһбәрләри јанында үзүгаралыгдан гуртарырды. Амма бу ҹәһд дә уғурсузлугла нәтиҹәләнди. Чүнки тәһгигат заманы мәлум олду ки, 5 октјабр аксијасында Ҹавид Мәммәдов иштирак етмәјиб. Үмумијјәтлә, онун бу ҹүр аксијалара мүнасибәти фәрглидир. Мәлум олду ки, Ҹавид Мәммәдов гызынын тәһсилсиз галмамасы үчүн өвладынын мәктәбә башыачыг ҝетмәсинә дә разылыг вериб, өлкәдә һиҹаб проблеминин һүгуги мүстәвидә, динҹ данышыглар јолу илә һәлл едилмәсинә тәрәфдардыр.
Һакимијјәтә төвсијәмиз будур ки, бош јерә өзләрини јормасынлар. Бу аксијалар Азәрбајҹанын дахилиндән гајнагланыр, инанҹлы инсанларын Аллаһ-тәалаја, ислам пејғәмбәринә вә онун әһли-бејтинә олан севҝиләриндән, “Гурани-Кәрим”ә олан мәһәббәт вә рәғбәтләриндән јараныр. Јахшысы будур һакимијјәт өзүнү даһа да ағыр вәзијјәтә салмасын, әксинә, инсанларын еһтијаҹларына, тәләбләринә диггәтлә јанашараг онлары һәлл етсин, өлкәдә һагг-әдаләти бәргәрар етсин”.
Диггәт: Хәбәрдән истифадә етдикдә мәнбәјә истинад лазымдыр
