Әһли Бејт -АБНА- хәбәр аҝентлијинин вердији хәбәрә әсасән Тарихчи алим Пәрвиз Заре Шаһмирзәнин “Гарабағнамә: гәдим дөврдән мүасир дөврәдәк” елми әсәри Теһранда фарс дилиндә тәкрар нәшр олунуб.
Мүһүм тарихи фактлар вә архив сәнәдләри әсасында јазылмыш 625 сәһифәлик китабда Азәрбајҹан Республикасынын Гарабағ бөлҝәсинин тарихи, мүасирлији, реаллыглары, гәдим мәдәнијјәти, ел адәтләри вә с. мәсәләләрдән бәһс олунур. Дағлыг Гарабағ вә она битишик әразиләрин тәҹавүзкар Ермәнистан тәрәфиндән зәбт олунмасы вә бу ҝүн дә ишғалда сахланылмасынын сијаси сәбәб вә мәгсәдләрини тәһлил едән мүәллиф јазыр ки, ермәниләрин бу бөлҝәјә көчүрүлмәсинин әсасыны бөјүк дөвләтләрин реҝиондакы сәнҝимәјән мараглары тәшкил едиб.
Һәмчинин Ермәнистан-Азәрбајҹан, Дағлыг Гарабағ мүнагишәсинин Азәрбајҹан тәрәфинин сәј ҝөстәрдији сүлһ јолу илә һәлл олунмасына мане олан әсас амил Ермәнистанын тәҹавүзкар сијасәтиндән әл чәкмәмәси вә бөлҝәдә тоггушан сијаси мараглардыр.
Китабда Гарабағ бөлҝәсиндә доғулмуш азәрбајҹанлы тарихи шәхсијјәтләрин, Азәрбајҹан ордусунун һәрбчиләринин, бурадакы гәдим мәдәнијјәт абидәләринин вә с. фотошәкилләри дә јер алыб.
Әсәрин јазылмасында беш јүздән чох тарихи мәнбәдән вә рәсми сәнәддән истифадә олунуб. Китабдакы бүтүн мәгамлар Дағлыг Гарабағын тарихи Азәрбајҹан торпағы олдуғуну тәсдиг едир вә тәдгигатчылар үчүн мүһүм мәнбәдир.
Диггәт: Хәбәрдән истифадә етдикдә мәнбәјә истинад лазымдыр
