Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасы (АИП) Тәһсил Назирлијинин гаршысында кечирилән аксија илә бағлы рәсми мөвгејини ачыглајыб.
АИП-ин мәтбуат хидмәтиндән верилән мәлуматда гејд олунур: “АИП билдирир ки, әввәла, аксија кечирилмәси барәдә БШИҺ-и габагҹадан хәбәрдар едилмәли иди. Икинҹиси, һәтта хәбәрдарлыг олмаса белә, полис етиразчылары зоракалыгла дејил, башга үсулларла сакитлијә дәвәт едә биләрди. Иштиракчылар вә ја пикети тәшкил едәнләр тәхрибата вә тәхрибатчылара гаршы диггәтли олмалы, вәзијјәтин критик һәддә ҝәлиб чыхмасына јол вермәмәли идиләр. Бүтүн баш верәнләр нә халгын, нә дә дөвләтин марагларына ҹаваб верир.
Инсанлар һиҹаб гадағасынын арадан галдырылмасыны истәјир, һакимијјәт бу истәјә зәрури, адекват олараг мүсбәт ҹаваб вермир, өзүнү ешитмәзлијә гојараг, проблемә бармагарасы јанашыр.Пикетдә тәхрибатчылыг мотивләри ашкар ҝөрүнүр. Садә етиразчылар бундан хәбәрсиздирләр. Бундан бир чохлары, әсасән ҝүнаһсыз диндарлар, һәтта аксијада иштирак етмәјәнләр зәрәр чәкирләр. Бир чох диндар артыг наһагдан тәгиб олунмаға башланыб репресија олунур. Антиисламчылар, антииранчылар мүнасибәтләрин кәскинләшмәсинә баш верәнләрлә тәкан верәрләр. Һакимијјәтин ичәрисиндә олан бәзи үнсүрләр сечкиөнҹәси етимадсызлыг, халг-һакимијјәт учурумуну јаратмаға, дәринләшдирмәјә чалышырлар.
Инди јалныз ағыллы башлар ишә дүзҝүн јанашмалы, дөвләт, халг, ислам наминә амбисијалара ҝетмәмәји зәрури һал кими гәбул етмәлидирләр.
АИП емосијасыз тәләбләри, сивил етиразын бүтүн формаларыны вә онун азад, сәрбәст иҹра олунмасына шәраит јарадалмасыны ваҹиб сајыр, тәгдир едир. Баш верән вәтәндаш-полис гаршыдурмасыны, һәр ҹүр зор тәдбиг едилмәсини писләјирик. Пикет иштиракчыларынын вә бүтүн сахланыланларын сәрбәст бурахылмасыны зәрури аддым һесаб едир вә һакимијјәтин тәхрибатчы гүввәләрә гаршы буну ән оптимал ҹавабы сечими кими гијмәтләндиририк”.
Диггәт: Хәбәрдән истифадә етдикдә мәнбәјә истинад лазымдыр
