Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Бејнәлхалг Университетинин сабиг ректору, һазырда Франсада јашајан Елшад Абдуллајев ачыгламаларындан бириндә демишди ки, јајдығы видеоҝөрүнтү Ҝүләр Әһмәдова илә 5 саатлыг сөһбәтин кичик бир фрагментидир. Ҝөрүшүн там видеосу исә ҝениш иҹтимаијјәтә ачыгланмаса да, бир хејли адам орадакы сөһбәтләрдән хәбәрдардыр.
Чүнки видеојазы һәлә бир нечә ај әввәл һәм Ҝүләр Әһмәдованын өзүнә, һәм дә Баш Прокурорлуға вә Президент Администрасијасына ҝөндәрилиб. Бундан башга, Елшад Абдуллајевин васитәсилә сөзүҝедән кадрлара баханлар да кифајәт гәдәрдир. Онларын арасында Авропада јашајан сијаси фәаллар да вар.
Дахил олан мәлумата ҝөрә, сөзүҝедән сөһбәт әввәлҹә Елшад Абдуллајевлә Ҝүләр Әһмәдова арасында олуб. Јәни, Севинҹ Бабајева сонрадан ҝәлиб. Онун ҝәлишинә гәдәр исә сабиг ректор ханым депутатла әввәлҹә гардашы Маһир Абдуллајевин иткин дүшмәсиндән, онун тапылмасы үчүн һүгуг-мүһафизә органларында чалышан јүксәк вәзифәли шәхсләрә (онларын адыны да чәкиб - ред.) күлли мигдарда рүшвәт вермәсиндән данышыб. Дејиб ки, һәмин мәбләғ нотариал гајдада верилиб. Нотариат конторунда тәсдигләнмиш сәнәддә дә ачыг шәкилдә јазылыб ки, бу пул Маһир Абдуллајевин тапылыб ҝери гајтарылмасы үчүн алыныр. Буну ешидән Ҝүләр Әһмәдова Елшад Абдуллајеви гынајыб. Бунун башдан-ајаға ҹинајәт олдуғуну, онун өзүнүн дә рүшвәт вермәјә ҝөрә мәсулијјәт дашыдығыны сабиг ректорун нәзәринә чатдырыб. Абдуллајевин ҹавабы исә белә олуб: “Азәрбајҹан ҝерчәклијиндә һәр шеј мүмкүндүр!”
Севинҹ Бабајевин дә иштирак етдији сөһбәтдә исә Ҝүләр Әһмәдова Елшад Абдуллајевдән депутат оландан сонра һакимијјәтдәки диҝәр груплашмаларын тәрәфинә кечмәјәҹәјинә даир зәманәт истәјиб. Һәтта Муса Мусајев, Алгыш Һәсәноғлуну да мисал чәкиб, онларын ҹәзаландырылмасынын сәбәбини ачыглајыб. Тәхминән бу шәкилдә: “Алгышы, Мусаны депутат еләдик, сонра бири ҝетди Әли Ынсановла ишләди, о бири Һаҹыбалајла...”
Ҝөрүшдә һәмчинин һәлә сечкидән бир хејли әввәл конкрет сијаһы мүәјјәнләшдирилдији, кимин һансы даирәдән намизәд олаҹағына гәрар верилдији гејд олунуб. Илһам Әлијев, Рамиз Меһдијев, Кәмаләддин Һејдәров вә диҝәрләринин һәр биринин депутатларынын ајрыҹа сијаһысы олдуғу вурғуланыб. Сөһбәт әснасында, һәтта сабиг игтисади инкишаф назири Фәрһад Әлијевин дә ады чәкилиб. Гејд олунуб ки, Фәрһад Әлијев өзү һәбс олунса да, сијаһыда онун да адамларынын ады вар.
Хатырладаг ки, Фәрһад Әлијев вә Әли Инсанов 2005-ҹи илин октјабрында - парламент сечкиләринә тәхминән ијирми ҝүн галмыш һәбс олунмушду. Ҝүләр Әһмәдова, Севинҹ Бабајева вә Елшад Абдуллајев арасындакы сөһбәт дә сечки әрәфәсиндә баш тутуб. Һәлә бир мүддәт әввәл јајылмыш видеоҝөрүнтүдәки сөһбәтдән ајдын олурду ки, онлар сечкијә бир һәфтә галмыш ҝөрүшүбләр. Бу исә о демәкдир ки, һәмин ҝөрүш Фәрһад Әлијев вә Әли Инсановун һәбсиндән аз сонраја тәсадүф едиб.
Диггәт: Хәбәрдән истифадә етдикдә мәнбәјә истинад лазымдыр
