Әһли Бејт -АБНА- хәбәр аҝентлијинин вердији хәбәрә әсасән Азәрбајҹанын хариҹи ишләр назири Елмар Мәммәдјаров Иран Ислам Республикасында кечирилән Гошулмама Һәрәкатынын Зирвә топлантысында иштиракы чәрчивәсиндә ИИР Ислам Шурасы Мәҹлисинин сәдри Әли Лариҹани илә ҝөрүшүб.
Азәрбајҹан ХИН-ин мәтбуат хидмәтиндән верилән хәбәрә ҝөрә, ҝөрүш заманы ики өлкә арасындакы мүнасибәтләр, әмәкдашлыг перспективләри мүзакирә едилиб. Азәрбајҹанын сурәтлә инкишаф етдијини гејд едән Ә. Лариҹани, өлкәмизин ҝүҹлү дөвләтә чеврилдијини вурғулајыб. Ә. Лариҹани Иранын Азәрбајҹанла әмәкдашлыгда мараглы олдуғуну сөјләјиб, өлкәмизин әрази бүтөвлүјүнү вә мүстәгиллијини дәстәкләдијини билдириб.
Елмар Мәммәдјаров ИИР Парламентинин сәдринә Ермәнистан-Азәрбајҹан мүнагишәсинин тәнзимләнмәси просесинә даир сон дурум һаггында мәлумат вериб вә мүнагишәнин һәлли үчүн Ермәнистанын ишғалчы гүввәләринин Азәрбајҹан торпагларындан чыхарылмасынын зәрурилијини вурғулајыб. Азәрбајҹан үчүн ән мүһүм мәсәләнин торпагларымызын ишғал олмасы мәсәләси олдуғу Иранлы рәсминин диггәтинә чатдырылыб. Һәмчинин Е. Мәммәдјаров Азәрбајҹанын ҝеҹ-тез өз әрази бүтөвлүјүнү бәрпа едәҹәјини вурғулајыб.
Ҝөрүшдә Мәммәдјаров ики Азәрбајҹан вәтәндашы олан Шәһријар Һаҹызадә вә Фәрид Һүсејновун һәбс мәсәләсини галдырыб. Назир Азәрбајҹан шаирләринин һәбси мәсәләсинин дөвләтимиз вә халгымыз үчүн бөјүк нараһатчылыг доғурдуғуну гејд едәрәк, бу мәсәләнин тезликлә өз һәллини тапаҹағына үмидвар олдуғуну сөјләјиб.
Диггәт: Хәбәрдән истифадә етдијдә мәнбәјә истинад лазымдыр
