Әһли Бејт -АБНА- хәбәр аҝентлији- Биләсуварда мәскунлашмыш Ҹәбрајыл көчкүнү Ирадә Мәммәдова «Гајнар хәтт»ә өвладынын һәрби һиссәдә ишҝәнҹә илә гәтлә јетирилдијини вә өлүм һадисәсинин интиһар кими гәләмә верилдијини дејиб:
«4 ај тамам дејилди әсҝәр апарылмышды. Пулумуз јох иди 4 ајда бир дәфә Нахчывана јанына ҝетмәјә. Гардашына зәнҝ едирмиш, дејирмиш бурда мәни инҹидирләр, гардашы да дејирмиш ки, биз дә әсҝәр олмушуг, әсҝәрликдә белә шејләр олур, дөз. Өлүмүндән бир нечә ҝүн әввәл јенә зәнҝ едиб, јенә шикајәт едиб, гардашы јенә ону сакитләшдириб, бизә дә һеч нә демәјиб ки, нараһат оларыг. Ушағын мејити ҝәләндән сонра билмишик буну».
Ирадә Мәммәдова данышыр ки, оғлу Исмајыл Ибајев 4 ај әввәл һәрби хидмәтә чағырылыб. Ијулун 31-дә исә бир нәфәр она зәнҝ вурараг әсҝәрин мејити илә кәндә јахынлашдығыны дејиб:
«Мејит јолда, анҹаг бизә сөз дејән јохдур. Һеч зәнҝ вуруб хәбәрдарлыг да етмәјибләр. Кәндә чатһачатда зәнҝ вурублар ки, мејити ҝәтиририк. Адам неҹә олар? Бир әсҝәр иди, бир дә машыны сүрән сүрүҹү, вәссалам. Мејити, бир дә онлара верилмиш бизә чатаҹаг кағызы атыб гачдылар. Басдырандан сонра һәмин әсҝәр јенә ҝәлди. Дедик бу ушағы ким вуруб, нә сәбәбә? Деди, о кағызда јазыланлардан башга һеч нә билмирәм».
«УШАҒЫМЫН БӘДӘНИНИ СИГАРЕТЛӘ КӨЗЛӘЈИБЛӘР»
Әсҝәрин «кағыз» дедији өлүм һаггында шәһадәтнамәдир. Орада јазылыб ки, Исмајыл Ибајевин өлүмүнә сәбәб кәлләни дәлиб кечән одлу силаһдан бир әдәд ҝүллә јараланмасыдыр. Анҹаг ана кағызда јазыланларла разылашмыр:
«Бир ҝүлләлик дејил, мәним ушағымын бәдәнини сигаретлә көзләјибләр. ишҝәнҹә верибләр. Дахили органларыны чыхарыблар».
Әсҝәр анасынын сөзләринә ҝөрә, она нәинки оғлунун өлүмүнүн сәбәбләриндән данышан јохдур, һеч бирҹә дәфә нә һәрби һиссәдән, нә дә Мүдафиә Назирлијиндән зәнҝ вуруб «кечмиш олсун» дејән дә олмајыб:
«Галмышыг Бакынын ортасында, бизи бир адам гәбул еләмир. Бу неҹә өлкәдир, бу гәдәр дәрәбәјилик олар? Президент Апаратына, Һејдәр Әлијев Фондуна, Республика Һәрби Прокурорлуғуна ҝетмишик. О ҝөндәрир бунун үстүнә, бу ҝөндәрир онун үстүнә. Ушағымын өлүсүнү ачдым, аз галдым һаваланам. Дејирләр өзүнү ҝүллә илә вуруб, анҹаг мејитин үстүндә о гәдәр хәсарәт варды ки. Һамысыны чәкдик. Чәкмәјимиздән нә фајда? Кимдир о шәкилләрә бахан? Һансы гапыја ҝедириксә, дејирәм, ушағымын мејитинин шәкилләринә бахын, ҝөрүн үстүндә нә гәдәр ишҝәнҹә изи вар. Бунлара ҝөрә ким ҹаваб верәҹәк. Ордан да ҝөндәрирләр башга гапыја. Бу да бунларын Азәрбајҹан әсҝәринин өлүсүнә вә аиләсинә ҝөстәрдикләри мүнасибәт».
РӘСМИ МӘЛУМАТ
Мүдафиә Назирлијинин мәтбуат хидмәти мәлумат јајыб ки, Милли Ордунун әсҝәри, 19 јашлы Исмајыл Рафиг оғлу Ибајев хидмәти силаһла башындан атәш ачараг өзүнү өлдүрүб вә әсҝәрин өлүмү илә бағлы арашдырма апарылыр.
Һәрби Прокурорлуғун мәтбуат хидмәти исә әсҝәр валидејнинин дедикләринә рәсми ҹаваб ҝөндәриб:
«Нахчыванда «Н» сајлы һәрби һиссәдә мүддәтли һәгиги һәрби хидмәтдә олмуш әсҝәр Исмајыл Рафиг оғлу Ибајев 31 ијул 2012-ҹи ил тарихдә гаровул хидмәтиндә оларкән хидмәти истифадәсиндә олан автомат силаһдан өзүнүн алын наһијәсинә атәш ачараг хәсарәт јетирмиш вә «башын алын наһијәсиндән сыјрылыб әнсә наһијәсиндән чыхан одлу силаһ, ҝүллә јараланмасы» диагнозу илә һәрби һоспитала јерләшдирилмишдир. Апарылмыш мүалиҹә тәдбирләринә бахмајараг һәмин ҝүн әсҝәр Исмајыл Ибајев алмыш олдуғу ҝүллә јарасындан вәфат етмишдир. Ганунвериҹилијин тәләбләринә мүвафиг олараг мәһкәмә-тибби експертләрин иштиракы илә һәрби прокурорлуғун әмәкдашлары тәрәфиндән мәрһум Исмајыл Ибајевин мејитинин хариҹи вә дахили мүајинәси кечирилмиш, мүвафиг експертизаларын апарылмасы үчүн һәрби тибби експерт тәрәфиндән нүмунәләр ҝөтүрүлмүшдүр.
Әсҝәр Исмајыл Ибајевин өлмәси фактына ҝөрә 31 ијул 2012-ҹи ил тарихдә Нахчыван Мухтар Республикасы Һәрби прокурорлуғу тәрәфиндән Азәрбајҹан Республикасы ҸМ-нин 125-ҹи маддәси илә ҹинајәт иши башланмыш, мүвафиг експертизалар тәјин едилмишдир.
ИСТИНТАГ ДАВАМ ЕДИР
Һал-һазырда баш вермиш һадисәнин бүтүн һалларынын там, һәртәрәфли арашдырылмасы истигамәтиндә зәрури истинтаг һәрәкәтләринин иҹрасы давам етдирилир».
Республика Һәрби прокурорлуғунун Мәтбуат хидмәти әлавә олараг билдирир ки, Мүдафиә Назирлијинин Мәһкәмә-Тибби Експертиза вә Патоложи Анатомија Мәркәзинин рәиси мејитин мүајинәси заманы ганунвериҹилијин тәләбләринә мүвафиг олараг һәјата кечирилән тәдбирләр барәдә күтләви-информасија васитәләринә кифајәт гәдәр әтрафлы мәлумат версә дә, әсҝәрләрин дахили органларынын чыхарылыб сатылмасы барәдә һәгигәтә ујғун олмајан јазылар һәлә дә бәзи информасија васитәләриндә биләрәкдән вә ја билмәјәрәкдән чап едилир.
Республика Һәрби прокурорлуғу бир даһа билдирир ки, күтләви информасија васитәләриндә реаллығы әкс етдирмәјән бу ҹүр мәлуматларын дәрҹ едилмәси јолверилмәздир».
Диггәт: Хәбәрдән истифадә етдикдә мәнбәјә истинад лазымдыр
