Әһли Бејт -АБНА- хәбәр аҝентлијинин вердији хәбәрә әсасән бир нечә мүддәтдир ки, Азәрбајҹан Ислам Партијасы гурултајла бағлы һазырлыг ишләри ҝөрүр. Бунунла бағлы рајон вә јерли тәшкилат комитәләриндә конфранслар кечирилиб. Ејни һалда, гурултајын кечирилмәси илә бағлы партија мүәјјән тәзјигләрә мәруз галыб. АИП-ин сәдр мүавини Рөвшән Әһмәдли партијанын гурултајы илә бағлы ФактХебер.ҹом-ун суалларыны ҹавабландырыб.
- Рөвшән бәј, һазырда гурултајла бағлы ишләр нә јердәдир?
- Әввәла гурултајла бағлы јерли тәшкилат комитәләриндә конфранслар кечирилмәлидир. Мүбарәк Рамазан ајындан әввәл бир сыра рајонларда конфранслар кечириләрәк гурултај үчүн һејәтләр мүәјјән олунуб. Лакин Мүбарәк Рамазан ајы илә әлагәдар сәфәрләр тәхирә салыныб. Рамазан бајрамындан сонра конфрансларын кечирилмәси давам едәҹәк. Ејни заманда ону да гејд едим ки, рајонлардакы јерли мәмурлар сијаси партијалар һаггында ганунда нәзәрдә тутуланын әксинә олараг, АИП-ин гурултајла бағлы кечирмәк истәдији тәдбирләрә имкан вермирләр. Һүгуг мүһафизә органлары бунунла һәм гануна һөрмәтсизлик едирләр, һәм дә ки, гануну билмәдикләрини нүмајиш етдирирләр. Үмид едирик ки, бу проблемләр арадан галдырылаҹаг. Истәнилән һалда тәдбир үчүн рајон рәһбәрлијинә мүраҹиәт едилир вә һәтта онларын да иштиракы үчүн шәраит јарадылыр. Ганунда да ҝөстәрилиб ки, јерли иҹра һакимијјәтинин нүмајәндәләри бу тип тәдбирләрин кечирилмәсинә шәраит јаратмалыдырлар. Лакин мане олмаг гануна зидд, јардым етмәк исә мүвафигдир. Тәбии ки, Рамазан ајындан сонра бүтүн конфранслар кечирилдикдән сонра гурултајын вахты мүәјјән едиләҹәк.
- Партија сәдрлији илә бағлы намизәдләр вармы?
- Партијанын гаршысында ҝөрүләси чох ҹидди ишләр вар. АИП-ин Низамнамәсиндә шәраитә вә заман ујғун олараг мүәјјән мүсбәт дәјишикликләр олуб. Мүмкүндүр ки, һәр һансы бир тәклифләр ола биләр. Һәр бир һалда партијанын бүтүн мәсәләләри гурултај нүмајәндәләринин тәклифләри вә онларын рәји әсасында һәлл едилир. О ҹүмләдән дә партијаја рәһбәрлик мәсәләсиндә дә гурултај нүмајәндәләринин рәји вә фикирләри әсас рол ојнајыр. Гурултајдан өнҹә намизәдләрлә бағлы мәсәләләр мүзакирә едилмир.
- Һәр һансы бир шәхсин партија сәдри сечиләҹәји һалда, АИП-ин һәбсдәки сәдри Мөвсүм Сәмәдова лидер статусу вериләҹәкми?
- Әввәла гејд едим ки, Мөвсүм Сәмәдов һазырда да Азәрбајҹан Ислам Партијасынын сәдридир. Онун партијаја рәһбәрлик етмәк мәсәләси мәһдудлашдырылса да, партија үзвләринин һамысы ону сәдр кими гәбул едир. Әҝәр һәр һансы бир шәраит олса, Мөвсүм Сәмәдов тәбии ки, партијаја өз мәсләһәтләрини верәҹәк. Мөвсүм Сәмәдовун партија лидери олмасы һамы тәрәфиндән гәбул едилән бир мәсәләдир. Партијанын һансы формада идарә едилмәсиндән асылы олмајараг, һәр бир һалда Мөвсүм Сәмәдов нәинки АИП-ин, үмумиликдә Азәрбајҹандакы Ислам һәрәкатынын лидери кими гәбул едилир.
Хәјал Шүкүр
Диггәт: Хәбәрдән истифадә етдикдә мәнбәјә истинад лазымдыр
