Әһли Бејт -АБНА- хәбәр аҝентлијинин вердији хәбәрә әсасән Ајәтуллаһ әл-узма Мәкарым Ширазинин Ислам өлкәләринин танынмыш дин хадимләринә ачыг мәктуб үнванлајыб.
Ачыг мәктубун мәтни беләдир:
Бисмиллаһир-Рәһманир-Рәһим
Әссәламу әләјкум вә рәһмәтуллаһи вә бәрәкатуһ!
Сизин — Исламын бөјүк шәхсијјәтләринин итаәт вә ибадәтләринин гәбул олмасыны Танрыдан диләјирәм.
Сөзсүз, бу ҝүн Ислам дүнјасынын проблемләри һаггында мәлуматыныз вар. Билирсиниз ки, тарих боју мүсәлманлар арасында буҝүнкү шәклидә амансыз гырғынлар олмајыб. Аллаһ зијафәти мүбарәк Рамазанда — достлуг вә рәһмәт ајында, ҝүнаһсызлары, ушаглары вә гадынлары, гәтлә јетирмәк ҝөрүнмәмиш һадисәдир. Ирагда бир ҝүндә баш верән 16 дәһшәтли партлајышда, 300 — дән чох өлән вә јараланан вар. Белә террор актлары һәр ҝүн мүхтәлиф мигјасларла тәкрар олунур. Пакистанда, Әфганыстанда, Бәһрејндә вә ән дәһшәтлиси Суријада да ејни һадисәләрин шаһидијик. Ораја ҝөндәрилмиш Исраил, ҸИА вә бәзи Ислам өлкәләринин муздурлары, «Азадлыг ордусу» ады алтында түк үрпәдиҹи гардаш гырғыны төрәдир.
Мүхтәлиф мәзһәбә мәнсуб мүсәлман гардашлар, бир-бирләринин әлилә өлдүрүлүр. Һәр ҝүн мүсәлманлар онларын парчаланмыш вә јерә сәпәләнмиш бәдәнләрини мүшаһидә едир. Авропа, Америка вә хүсусилә дә Исраилдә олан Ислам дүшмәнләри исә севинир вә буну алгышлајыр.
Ислам дининин мәрһәмәт вә достлуг дини олдуғуну билирик. Гуран — бизим сәмави китабымыз, бүтүн мүсәлманлары һәр заман, хүсусилә дә мүбарәк Рамазан ајында мәһәббәт вә гардашлыға дәвәт едир.
Өз мүсәлман гардашларыны (пуч бәһанәләрлә) гәддарлыгла гәтлә јетирән бу груплашмалар Ислам вә Гурана да ән мүдһиш зәрбәләр ендирир. Онлар Ислам динини зоракылыг вә вәһшилик дини кими тәгдим едир, дүнјада Исламын инкишафынын гаршысыны алыр вә Исламын һејсијјәтини тапдалајыр.
Һансы дөврдә белә бир амансыз гырғынлар баш вериб? Мәлуматыныз вармы? Нә үчүн сүкут едирсиниз? Нә үчүн етираз етмир вә сәсинизи — «даһа гардаш гырғыны бәсдир» — дејә уҹалтмырсыныз?
Ислам дүшмәнләринин ‒ сионистләрин, Гәрб дөвләтләринин вә онларын муздурларынын Ислам өлкәләриндә — Ирагда, Суријада вә Әфганыстанда пәрдә архасы фәалијјәтләриндән мәлуматлыјыг. Фүрсәтдән истифадә едән Ислам дүшмәнләри Мијанмарда да мүсәлманларын ганыны төкүр. Ислам алимләринин исә сүкута гәрг олмасы даһа тәәҹҹүбүлдүр.
Сиз, Исламын бөјүк алимләри, мүфтиләри вә ҝөркәмли шәхсијјәтләри Ислам тарихиндә һазыркы нәслин адына мүтләг гара ләкә ҝәтирәҹәк бу мүдһиш вәзијјәт гаршысында сүкут етмәмәлисиниз. Өз бирмәналы фәтваларыныз илә јалныз Ислам дүшмәнләринин, Исраилин вә гәрблиләрин хејринә сонуҹланаҹаг вәһшиликләрин гаршысыны алмалысыныз. Бу мүдһиш мүһарибәнин амилинә чеврилмәсинләр дејә Ислам өлкәләринин рәһбәрләринә нәсиһәт верин! Гурани-Кәрим фәсада гуршанан бәзи кечмиш үммәтләр барәсиндә бујурур:
لَوْلاَ یَنْهَاهُمُ الرَّبَّانِیُّونَ وَالاَْحْبَارُ عَنْ قَوْلِهِمُ الاِْثْمَ وَأَکْلِهِمْ السُّحْتَ لَبِئْسَ مَا کَانُوا یَصْنَعُونَ «Нә үчүн онларын алимләри етираз етмәдиләр ?!» («Маидә» сурәси, ајә 63.)
Ислам гајнагларында дејилир: «Бидәт заһир олан вахт алимләрә өз елмләрини ашкара чыхармаг ваҹибдир, әкс һалда Аллаһын рәһмәтиндән узаг олаҹаглар?!»
Террор-интиһар актларындан даһа бөјүк бидәт нә ола биләр? Ајә, һәдис вә пак сәләфләрин һәјат тәрзиндә белә һаллар јохдур. Адамлар өзләринә бомба бағлајыр, ҝүнаһсызларын арасына далыр, һәтта мәсҹидләрә дахил олуб онлары вә өзләрини мәһв едирләр?! Бу дәһшәтли иш, бидәт дејилми?
Бу сүкут гәбуледилмәздир! Аллаһ дәрҝаһында, сүкут етмәк үчүн һәр һансы бир дәлилимиз дә јохдур. Бу дәһшәтли ҹинајәтләрә гаршы әзмлә мүбаризә апармаг үчүн бирликдә гәрара ҝәләк! Ислама вә мүсәлманлара олан борҹумузу верәк! Мәһз бу тәгдирдә Аллаһ гаршысында вәзифәмизи јеринә јетирәр, Ислам дүшмәнләрини мәјус етмиш оларыг!
Вәс-сәламу әләјкум вә рәһмәтуллаһи вә бәрәкату.
Диггәт: Хәбәрдән истифадә етдикдә мәнбәјә истинад лазымдыр
