Әһли Бејт -АБНА- хәбәр аҝентлијинин вердији хәбәрә әсасән бу ҝүн руһани Һаҹы Абҝүл Сүлејмановун нөвбәти гондарма мәһкәмәси әлијевләр режиминин Бакы шәһәри Ағыр Ҹинајәтләр мәһкәмәсиндә кечирилиб.
Гондарма мәһкәмә иҹласында АТӘТ-ин Азәрбајҹандакы нүмајәндәси мүшаһидәчи гисминдә иштирак едиб.
Вәкил Анар Гасымлы мүәјјән сәбәбләрә ҝөрә мәһкәмә иҹласында иштирак етмәјиб.
Саат 15:30-а тәјин олунан мәһкәмә 16:55-дә башлады.
Гондарма һакимләр гурама мәһкәмә иҹласына ҝәләнә гәдәр руһани Һаҹы Абҝүл Сүлејманов чыхыш едиб. О чыхышында бунлары билдириб: “Бу һөкумәти нә Мүсават, нә дә АХҸП дағыдаҹаг. Бу һөкумәти һиҹаба гојдуглары гадаға дағыдаҹаг. Мән бош сөз демирәм. Сентјабр ајынын 15-и һиҹаб гадағасы һәлл олунмаса, ағылларына ҝәлмәјән шејләр олаҹаг. Мәһәммәд ордусу онларын үзәринә ҝәләҹәк. Бурда да МТН нүмајәндәси вар. О да ешитсин. 1 ил өнҹә һеч кимин ағлына ҝәлмәзди Һүснү Мүбарәк мәһкәмәјә чыхарылаҹаг вә она өмүрлүк һәбс вериләҹәк. Бүтүн силаһлар онда, ҝүҹ онда, архасында орду галыб. Һә нә олсун?! Һамысынын агибәти белә олаҹаг. Иран шаһы чадраја бүрүнүб гачды. Бунлар мәнә дејирләр сән Ирана ишләјирсән. Мән нә Ирана нә турана ишләјирәм. Мән Гурана ишләјирәм. Гуранын дедикләрини дејирәм. Мән өзүмү зинданда һисс етмирәм. Мән азадам. О кәсләр ки, һиҹабы мүдафиә етмирләр, горхурлар, онлар зиндандадырлар. Азад олсајдылар һиҹабы мүдафиә едәрдиләр.”
Бундан сонра гондарма мәһкәмә башлады.
Гондарма мәһкәмәдә 3 шаһид диндирилди.
Биринҹи шаһид Турал Һүсејнов олуб. О ифадәсиндә билдириб ки, Һаҹы Абҝүл Сүлејманову 2003-2004-ҹү илләрдән таныјыр. Савадлы алимдир. Мөмин адамдыр. “Папанин” адланан мәнтәгәдәки тәдбирдә әввәл иштирак етсәмдә сонрадан ишим чыхдығына ҝөрә мәҹлиси тәрк етмишәм. Һаҹынын моизәсини дә интернетдән изләмишәм. О чыхышында һиҹабы мүдафиә едиб. Һиҹабын диндарын гејрәти олдуғуну вә бунун үчүн горунмасы үчүн әлимиздән ҝәләни едәҹәјимизи билдирди.
Даһа сонра мәһкәмә иҹласында икинҹи шаһид, Турал Һәсәнов дәвәт олунду. О да ифадәсиндә гејд етди ки, мән Һаҹы Абҝүлү ушаглыгдан таныјырам. Мәни о истигамәтләндириб. О мәним гардашымдыр. “Папанин”дәки мәҹлисдә дә иштирак етмишәм. О чыхышында һиҹабы мүдафиә едиб, өлкәдәки ганунсузлуглардан данышыб, негатив һаллары гејд едиб. Ҹиһад руһијјәси дедикдә исә һиҹабын мүдафиәси үчүн әлимиздән ҝәләни етмәли олдуғу баша дүшүлүр. Бурда ҹиһад һакимијјәт чевирилиши анламы вермир. Һиҹаба гојулмуш гадағаја етираз аксијаларында иштирак етмәмишәм. Лакин тәәссүфләнирәм ки, ишим чыхыб иштирак едә билмәмишәм. Ҹәфәри һејәтинин бүтүн мәҹлисләриндә иштирак етмишәм.
Бундан сонра үчүнҹү шаһид, Сејмур Рзајев мәһкәмә залына чағырылыб. О МТН-дә вердији ифадәнин дәјишдирилдијини вә имза атаркән јазылан ифадәни охумадығыны билдириб. О дејиб ки, мәним ифадәм дәјишдирилиб. Ифадәмдә ҝуја демишәм ки, Һаҹы Абҝүл Һизбуллаһын Азәрбајҹандакы нүмајәндәсидир, Иранпәрәстдир, радикалдыр вә сајр бу кими һәгигәти әкс етдирмәјән ифадәләр. Лакин мән бунларын һамысыны рәдд едирәм вә ифадәмин дәјишдирилдијини билдирирәм. Мән Һаҹы Абҝүлү бир нечә дәфә тәдбирләрдә ҝөрмүшәм. Бир дәфә дә онларын офисиндә олмушам. Даһа сонра о Гум шәһәриндә тәһсил алмаға ҝетди. Ондан сонра ҝөрүшмәмишик.
Шаһидләр диндирилдикдән сонра нөвбәти мәһкәмә иҹласы ијун ајынын 25-и саат 15:30-а тәјин олунду.
Диггәт: Хәбәрдән истифадә етдикдә мәнбәјә истинад лазымдыр
