Әһли Бејт -АБНА- хәбәр аҝентлијинин вердији хәбәрә әсасән өлкәнин иҹтимаи-сијаси хадимләри Президент Администрасијасы (ПА) иҹтимаи-сијаси шөбәсинин мүдири Әли Һәсәновун мајын 31-дә Авропа Иттифагынын, гәрб дөвләтләринин, бејнәлхалг һүгуг- мүдафиә тәшкилатларынын, бејнәлхалг медианын вә мүхалифәтин үнванына сәсләндирдији кәскин бәјанатлары гәбул етмир. Бир чох хадимләр Ә. Һәсәновун чыхышыны реаллыгдан узаг, истерик, емосионал, милли мараглара ҹаваб вермәјән бәјанат кими дәјәрләндириб.
Иҹтимаи-сијаси хадимләр Президент Администрасијасынын шөбә мүдиринин бәјанатыны Туран аҝентлијинә белә шәрһ едибләр: “Бу, истерик чыхыш иди”, - АХҸП сәдри Әли Кәримли билдириб.
Онун фикринҹә, бу чыхыш һөкумәтин өзү үчүн кифајәт гәдәр фәсадлар јарада биләҹәк чыхышдыр. Ә.Һәсәновун чыхышыны игтидарын мәсулијјәтсиз сијасәтинин нәтиҹәси сајан АХҸП сәдри һөкумәтин әсас вәзифәсинин вәтәндашын азад, фираван, тәһлүкәсиз һәјатыны тәмин етмәк олмасыны хатырладыб. “Мөвҹуд сијасәт өлкәни дүнјадан тәҹирд етмәјә сәбәб олуб”, - о вурғулајыб.
Ә.Кәримли дүнјанын ҝүҹ мәркәзләриндән олан Авропа Иттифагы илә гаршыдурмаја ҝетмәји мәсулијјәтсизлик адландырыб.
Ә.Һәсәновун һакимијјәтә ҝәлмәк истәјәнләрин халгын ганы үзәриндән кечмәли олаҹағы бәјанатыны АХҸП сәдри мөвҹуд игтидарын һакимијјәти сахламаг үчүн дүнјаја саваш ачаҹағы, һакимијјәтин сивил јолла дәјишмәси нијјәтиндә олмамасы кими дәјәрләндириб.
Ә.Кәримлијә ҝөрә, игтидар “Гарабағ проблеми”ни чиркин сијасәтинә аләт едир. “Гарабағы дүшүнән, проблеми һәлл етмәк истәјән игтидар өлкәни дүнјадан тәҹрид етмәли дејил. Әҝәр бу проблем дүнја бирлијинин ҝүҹү илә һәлл олаҹагса индики сијасәт Гарабағы Азәрбајҹандан даһа да узаглашдырыр”, - о гејд едиб вә игтидары јаланчы вәтәнпәрвәрликдә иттиһам едиб.
Ә.Һәсәновун чыхышынын мүхалифәтә аид һиссәсини Ә.Кәримли әсассыз адландырыб. Онун фикринҹә, “Еуровисион” мүсабигәси чәрчивәсиндә Бакыја ҝәлән хариҹи журналистләрин өлкәнин проблемләриндән јазмасы игтидары ҹидди нараһат едиб. “Амма дүшүнәк, өлкәни коррупсија батаглығына мүхалифәт салыб? Јохса коррупсијаја уғрамыш һаким аилә мүхалифәтчи аиләсидир, ја сијаси вә виҹдан мәһбусларыны мүхалифәт һәбсдән азад етмир?”- Ә.Кәримли билдириб.
АХҸП сәдринин фикринҹә, игтидар бејнәлхалг бирликдән алдығы зәрбәләрдән мүвазинәтини итириб вә бу чыхыш һәмин дајаныгсызлыгдан доғуб.
Тәдбирин ГҺТ-ләрин иштиракы илә кечирилмәсинә диггәт чәкән АХҸП сәдри бу мәгамы игтидарын “өз ГҺТ-ләрини ифшасы” адландырыб. Ә.Кәримлијә ҝөрә, игтидарын бу аддымы малијјәләшдирдији ГҺТ-ләри өз мүдафиәсинә сәфәрбәр етмәси, рәсми Бакыја тәнгиди мүнасибәт ифадә едән бејнәлхалг гурум вә мәркәзләрә иҹтимаи нифрәт јаратмаг командасынын верилмәси кими дәјәрләндирилиб.
Зијалылар Форумунун һәмтәсисчиси Елдар Намазов Ә.Һәсәновун бәјанатларыны ҹидди шәрһ етмәјә еһтијаҹ дујмајыб. О, садәҹә иронија илә дејиб: “Күл Авропанын башына, ҝөр онун үстүнә кимләр ҝедир”.
Политолог Зәрдүшт Әлизадә Ә.Һәсәновун бәјанатларынын Азәрбајҹанын уғурсуз хариҹи сијасәтиндән хәбәр вердијини билдириб. “Азәрбајҹан Авропаны, Ираны рәдд едир, Русија илә мүнасибәтләр ҝәрҝиндир, Ермәнситанла исә мәлум сәбәбләрдән мүһарибә вәзијјәтиндәдир. Бүтүн бунлар Азәрбајҹанын “уғурлу хариҹи сијасәтинин” нәтиҹәсидир”.
Милли Мәҹлисин депутаты, политолог Расим Мусабәјов Президент Администрасијасынын шөбә мүдиринин бәјанатларына шәрһ вермәјиб. “Мән Әли Һәсәновун бәјанатларына шәрһ вермәк фикриндә дејиләм. Амма Азәрбајҹанын Авропа илә әмәкдашлығы давам етдириләҹәк. Чүнки бунун үчүн һәр ики тәрәфдән објектив мараглар вар”, - о гејд едиб.
Шәрг-Гәрб Арашдырмалар Мәркәзинин рәһбәри Әрәстун Оруҹлу һесаб едир ки, Ә.Һәсәновун бәјанатлары бир гәдәр емосионал шәкилдә ифадә едилсә дә, хејли гәзәб вә нифрәтлә јанашы, һәм дә бир сыра һәгигәт вар. “Әввәла, Әли мүәллим илк дәфә аз гала ачыг етираф еләди ки, һакимијјәт чох ағыр дурумдадыр вә һәм дә онун бүтүн потенсиал тәрәфдашлары илә мүнасибәти позулуб. Икинҹиси, о билдирди ки, һакимијјәтин һеч бир диалог вә ислаһат апармаг нијјәти јохдур, чүнки белә истәји оланлар ән азы Әли мүәллимин риторикасындан истифадә еләмирләр”.
Политологун фикринҹә, нәһајәт, бир мәсәләдә ҹәнаб Һәсәновла разылашмамаг мүмкүн дејил. “Хариҹдән тәјин олунан һакимијјәт һеч заман халгын ирадәсини ифадә еләмир вә едә билмәз. Азәрбајҹан халгы буну артыг 20 илә јахындыр ки, әјани олараг ҝөрүр. О ки галды ачыгламада сәсләндирилән һәдәләрә, мәнҹә мүасир дүнјада бунун ән уғурлу технолоҝија олмадығы елә сон бирҹә илдә бир нечә әрәб өлкәсинин тимсалында әјани шәкилдә сүбута јетирилди”, - о гејд едиб.
Диггәт: Хәбәрдән истифадә етдикдә мәнбәјә истинад лазымдыр
