Фаһишәлик нәдир ки? Өдәнишли секс фәалијјәти вә јахуд “гәдим пешә” нөвләриндән бири. Ишә бах е, пешә нөвү! Бәһ-бәһлә пешә нөвү дејиб, елә бәзәк-дүзәк верирләр ки... Бәрәкаллаһ! Вә ҹәмијјәтин дә аҹҝөзлүклә марағында олдуғу мөвзудур. Нәјсә, сөзүм она јох. Фаһишәлијин тарихиндән данышмаг истәмирәм. Бу мөвзуда дејиләҹәк јени бир сөзүн олдуғуна да инанмырам. Садәҹә, мән 200 кишини ГИЧС-ә јолухдуран – һәлә дејәк ки, бу рәсми рәгәмдир – вә сонра дүнјасыны дәјишән Елнурәнин ҹәмијјәтиндә баш верән һадисәләрдән ниҝаранам.
Ҹәмијјәтдән сөз ачмышкән, буну да јазмаг истәдим. Еуровисион јахынлашыр, фикир вермисинизми билмирәм, азғын, јијәсиз күчә көпәкләрини јоллардан јығышдырыблар, елә бил, һеч нә олмамышды. Ешитдијимә ҝөрә, наркотик асылылығы олан кимсәсизләри дә бәзи тибб мүәссисәләриндә јерләшдирибләр, фаһишәликлә мәшғул оланлардан хәбәрим јохдур, јәгин, онлар үчүн дә хүсуси шәраит јарадыблар ки, әҹнәбиләр өлкәмизә ҝәләндә һәр шејин ҝөзәл, абад олдуғуну дүшүнүб, шад-хүррәм ағыздолусу данышсынлар. Бу мәнә 1980-ҹи илдә ССРИ-нин Москвада кечирдији ХХII јај олимпиадасыны хатырлатды. Ејнилә совет тәфәккүрү вә фырт едиб Советин бурнундан дүшән Азәрбајҹан. Бәли, мүтләг һәр шеј сон дәрәҹә ҝөзәл ҝөрсәнмәлидир. Бир дә әҹнәбиләр гајыдандан сонрасына бахарыг, ҝөрүн һәр дашын алтындан нә иланлар баш галдырыб чыхаҹаг.
Елнурә артыг арамызда дејил, тәһлүкә совушуб
Гајыдаг әсас мөвзумуза. Елнурәнин ҹәмијјәти, елә мәним, сизләрин јашадығы ҹәмијјәт. Дүшүнәк ки, бундан сонра нә фәрги вар? Елнурә артыг арамызда дејил, тәһлүкә совушуб. Хәстәлијә јолухан јолухуб. Јахшы, дүшүнәк ки, 200 нә бөјүк рәгәмдир? Бу 200-үн архасындакы јүзләрин талеји неҹә олаҹаг бәс? Бу мәсәләнин гејри-рәсми тәрәфини, ГИЧС дашыјыҹыларынын өзләријлә нә гәдәр башга инсанлары вә өз јахынларыны, еләҹә дә, әлагәдә олдуглары диҝәр инсанлары бу хәстәлијә дүчар етдијини бирмәналы тәсәввүр етмәк асан дејил.
О ҝүн порталлардан бириндә мүзакирә мөвзусу бу иди: “Бакыда даһа бир фаһишәхана бағланды”. Алтындакы шәрһләрдә дә лаға гојуб ҝүлүрләр. “Һә, рајондан ҝәлмәләрдир дә, башга нә ҝөзләмәк олар?” Һадисәләрә анҹаг дүзхәтли траекторија үзрә бахан – онлар үчүн ән јахшы һалда буну дејә биләрәм – бу әбләһләри гынамырам. Бахыш буҹағы вә мәнтиг үст-үстә дүшүр. Биз Авропа өлкәси дејилик, јәгин ки, ағлы башында олан һеч бир гадын фаһишә олмаг, о евләрә ҝәлән һәр ҹүр бәднијјәт, ијрәнҹ, кифир кишиләрин овуна чеврилмәк истәмәзди. Һәтта буна әминәм. Фаһишәлијә гәти шәкилдә һагг газандырмырам. Амма, һәр һалда, өлкәмиздә фаһишәлијин олмасы һеч бир фәалијјәт саһәси кими өзбашына дејил. Һимајәчиси олмаса, бу саһә мәһв олуб ҝедәрди. Дејәҹәксиниз неҹә? Елә бу Еуровисион габағы күчә итләринин тез-тәләсик ортадан гејб олмасы кими.
Елнурәни иттиһам етмәк
Инди һаггымыз чатырса, Елнурәни иттиһам едәк. Јүзләрлә, бәлкә дә, даһа чох кишини бу хәстәлијә јолухдурмағы гаршысына мәгсәд гојмуш 22 јашлы өфкәли ҝәнҹ гызы. Бир инсан нә гәдәр һәјатдан безмәлидир ки, һеч дүшүнмәдән, хәстәханадан гача вә мүалиҹә олунмагдан имтина едәрәк кишиләрә олан нифрәтиндән онлара бу аҹымасыз “һәдијјә”ни бәхш етмәји өзүнә борҹ билә. Һә, мәним, бизим, сизләрин 12-13 јашлы гызҹығазы зорлајыб, ушаг евиндән фаһишәлијә итәләјән ҹәмијјәтимиз. Доғрудур, һеч ким бу мәсулијјәтдән бојун гачырмамалыдыр. Һансы 12 јашлы гыз өз истәји илә фаһишә олмаг истәјәр? Елнурәни ушаг евинә гәдәр ҝәтирән јолун мәсулијјәтини өз үзәринә ким ҝөтүрәҹәк? Валидејнләрими? Сосиал әдаләтсизлијин баш ҝөтүрүб ҝетдији ҹәмијјәтми? Һәр һалда, Елнурә бу өлкәдә нә јеҝанә ГИЧС хәстәлији дашыјыҹысыдыр, нә дә сонунҹусу...
Галаныны сиз дүшүнүн.
Ҝүнел Әһмәдова
Диггәт: Хәбәрдән истифадә етдикдә мәнбәјә истинад лазымд
