Әһли Бејт -АБНА- хәбәр аҝентлијинин вердији хәбәрә әсасән Сулутәпә гәсәбәсиндә фыртынадан сонракы сакитлик вәзијјәтидир. Апрелин 18-дә евләринин сөкүлмәсинә етираз едән сакинләрлә Дөвләт Нефт Ширкәтинин (АРДНШ) президенти Рөвнәг Абдуллајевин гочулары арасындакы тоггушмадан сонра һәләлик һеч бир заһири ҝәрҝинлик нәзәрә чарпмыр. Неҹә дејәрләр, һамы өз гынына чәкилиб, гәсәбәдә јалныз бир нечә полис әмәкдашына раст ҝәлмәк олар. АРДНШ-ин әмәкдашлары исә арабир әразидә мүшаһидәләр апарыб гејбә чәкилирләр.
Тикинти вә етиразлар давам едир
Јерли ҹамаат исә јени һәбсләрдән еһтијатланыр. Онлар ҝүман едир ки, һакимијјәт хоф мүһити јаратмаг үчүн гәсәбәдәки ән фәал адамлары һәбс едәҹәк. Бунунла белә сакинләр евләринин сөкүлмәсинә јенә ҹәһд олунаҹағы тәгдирдә бирләшмәјә вә мүгавимәт ҝөстәриб даһа бөјүк вә мүтәшәккил етираз аксијалары кечирмәјә һазырдыр. Индисә гәсәбәдә евләрин сөкүнтү просеси дајаныб. Һәтта гәсәбәнин мүхтәлиф әразиләриндә тикинти ишләринин давам етдирилмәсинә, јени евләрин иншасына белә раст ҝәлмәк мүмкүндүр.
Амма бурада ортаја суал чыхыр: нијә һөкумәт вәтәндашларын евләрини бир тәрәфдән ганунсуз тикили ады илә учурдуғу һалда о бири јандан да тәзәдән јени тикинтијә иҹазә верир? Сулутәпә сакинләри суала чох садә изаһ вердиләр. Онларын сөзләринә ҝөрә, истәр Сулутәпә, истәрсә дә гоншу Хоҹасән гәсәбәсиндә тикинти ишләри һәмишә вар. Вәтәндашлар торпаг алыб өзләринә ев тикдирир. Һәтта апрелин 18-дә дағыдылан евләрин бир аддымлығында да јени јашајыш евләри инша олунур. Бунунла белә сакинләр бизимлә сөһбәтдә Бинәгәди Рајон Иҹра Һакимијјәтини (РИҺ) вә јерли бәләдијјәни иттиһам етдиләр. Билдирдиләр ки, тикинтијә иҹазә һәр ики органла разылашдырылмышды.
Гәсәбә сакини Вүгар Нағыјеви динләјәк: “Биз бәләдијјәни вә рајон иҹра һакимијјәтини мәһкәмәјә вериб компенсасија тәләб едәҹәјик. Әҝәр мәһкәмәләр әдаләтли гәрар чыхармаса, Авропа Мәһкәмәсинә гәдәр ҝедиб ахыра гәдәр мүбаризә апараҹағыг. Индики дөврдә бир дашы даш үстүнә иҹазәсиз гојмаг олмур. Буну демәкдән јорулмушуг. Әҝәр олурса, демәли, өлкәдә дәрәбәјликдир. Бәс һөкумәт индијә гәдәр һара бахырды? Рөвнәг мүәллим јатыб инди ајылыб ки, онун нефт торпагларында ев тикмишик? Истәнилән һалда дөвләтин борҹу бизи разы салмагдыр”.
Диҝәр сакин Надир Һәзијев исә апрелин 18-дәки һадисәдән данышды: “Әлимиздә ”купча", бәләдијјәнин сәнәдләри вар. Һөкумәт өз органларына нәзарәт едә билмир? Лап бу тикилиләр ганунсуз олса да ҹамааты зорла күчәјә төкмәк, дөјүб шикәст етмәк һеч бир ганунда, һеч бир өлкәдә јохдур. Әҝәр белә давам етсә, биз аксијалары күтләвиләшдирәҹәјик".
Сонра апрелин 18-дә евләри учурулан сакинләрлә ҝөрүшдүк. Әлибаба Гәрибов һәмин ҝүн оғлуна мәхсус мәнзилин Р.Абдуллајевин адамлары тәрәфиндән сөкүлдүјүнү деди: “Бурада оғлум јашајыр. Биз бәләдијјәдән сәнәд алмышыг, иҹазәсиз иш ҝөрмәмишик. Ҝәлиб дағытдылар евимизи. Бизә хејли зијан вурублар. Баша дүшмәдик нијә мәһз бизим еви сөкмәјә башладылар. Инди евими өзүм тикирәм. АРДНШ-ин ишчиләри ҝәлиб нәзарәт едиб ҝетдиләр. Еви бәрпа етмәјимизә һеч нә демәдиләр. Инди ешидирик ки, тәзәдән ҝәлиб сөкмәјә башлајаҹаглар. Аиләм кирајәдә јашајыр. Билмирәм нә едим”.
Диҝәр вәтәндаш Ҹәбрајыл Әлијев дә сөкүлән евини өзү тикирди. О, гардашы Ҹамал Әлијевин хәстәханада ағыр вәзијјәтдә олдуғуну билдирди: “Һәмин ҝүн Ҹамалы вәһшиҹәсинә дөјдүләр, евдәки гадыны-ушағы күчәјә атдылар. Ҹамал һәлә дә өзүнә ҝәлмәјиб. Ҝиҹҝаһындан вурублар. Инди тәк дуамыз, истәјимиз онун сағ галмасыдыр. Бунлардан артыг нә десән ҝөзләмәк олар. Мәнә 1000 манатдан чох зијан вурублар. Аиләмизлә кирајәдә галырыг. Еви тәзәдән тикмәјә башламышам. Имканым да јохдур ки, уста, фәһлә чағырым. Она ҝөрә дә өзүм тикирәм. АРДНШ-ин адамлары һәләлик бир сөз демәјибләр. Ҝәлиб бахыб ҝедибләр”.
Ҹинајәт иши. Кимә гаршы?
Сулутәпә гәсәбәсиндә баш верән инсидентлә бағлы артыг ҹинајәт иши башланыб. Бу барәдә АПА-ја Бинәгәди Рајон Полис Идарәсиндән (РПИ) билдирилиб. Мәлумата ҝөрә, Дөвләт Нефт Ширкәтинин Сулутәпә гәсәбәсиндә ганунсуз тикилиләрин сөкүнтүсүнү һәјата кечирән заман евләри сөкүлән сакинләрлә АРДНШ әмәкдашлары арасында баш верән гаршыдурма илә әлагәдар РПИ-нин истинтаг шөбәсиндә факта ҝөрә ҸМ-ин 221.2.1-ҹи (хулиганлыг) маддәси илә ҹинајәт иши башланыб. Һазырда һадисәдә ҝүнаһкар олан шәхсләрин мүәјјәнләшдирилмәси истигамәтиндә истинтаг апарылыр, зәрури изаһатлар алыныр.
Гејд едәк ки, Дахили Ишләр Назирлијинин јајдығы мәлумата ҝөрә, апрелин 18-дә АРДНШ әмәкдашлары тәрәфиндән Бинәгәди рајонунун Сулутәпә гәсәбәси әразисиндәки ганунсуз тикилиләр сөкүләркән 200-250 нәфәр гәсәбә сакини буна етираз әламәти олараг ширкәтин әмәкдашлары Фәган Јәһјаны, Һүсејн Әзәмини, Јалчын Мәммәдову, Рәшад Гәдимову, Илһам Шаһвердијеви, Муса Абузәрову вә Агшын Пиријеви дөјәрәк онлара хәсарәт јетириб. Бу заман сакинләрдән Идрак Аббасов вә Ҹамал Әлијев дә хәсарәт алыблар. И.Аббасов вә Ҹ.Әлијев хәстәханаја јерләшдирилиб. Даһа сонра сакинләр Бакы-Шамахы јолунун 13-ҹү километриндә автомобил јолуну бағламаға ҹәһд ҝөстәрибләр. Ҹәһдин гаршысы алыныб, онлардан 10 нәфәри Бинәгәди РПИ 40-ҹы полис бөлмәсинә апарылыб вә барәләриндә Инзибати Хәталар Мәҹәлләсинин 298-ҹи маддәси илә протокол тәртиб олундугдан сонра бурахылыблар.
Емил САЛАМОҒЛУ
Диггәт: Хәбәрдән истифадә етдикдә мәнбәјә истинад лазымдыр
