Әһли Бејт -АБНА- хәбәр аҝентлијинин вердији хәбәрә әсасән “Бәрдәнин иҹра башчысы Видади Исајев мартын 29-да ҝүнорта саатларында мәни тәһгир едиб, ахшам иҹласда исә мәлум инсидент баш вериб”. Бу сөзләри “Азадлыг”а Бәрдәнин мәдәнијјәт вә туризм идарәсинин мүдири Солтан Һәсәнов дејиб. Солтан Һәсәнов билдириб ки, гәзетимизин дүнәнки сајында онунла иҹра башчысы арасында баш верәнләр барәдә јаздыгларымыз һәгигәти әкс етдирир: “Јалныз Видади Исајевин мәнә 4 кәндин алагапысыны тәмир етдирмәји тапшырмасыны сәһв јазмысыныз. Галан нә јазылыбса, доғрудур”.
Идарә мүдири баш верәнләри вә бунун архасында дајананлары тәфәррүаты илә гәзетимизә данышыб: “Видади Исајев Бәрдәјә иҹра башчысы тәјин олунандан мәнимлә јола ҝетмир, мәнимлә ишләмәк истәмир. Онун мәнә гаршы мәнфи мүнасибәтинин архасында да мәнимлә ишләмәк истәмәмәси дајаныр. Чүнки мән һәмишә өз сөзүмү дејән адамам. Бу адама исә гул лазымдыр. Нәһајәт, мартын 29-да ҝүнорта саатларында о мәни јанына чағырды. Арамызда ҝәрҝин сөһбәт олду, о мәни тәһгир етди. Ахшам саатларында исә иҹра һакимијјәтиндә иҹласа ҝетдим. Орада баш верәнләри сиз олдуғу кими јазмысыныз. Видади Исајев орада да мәним әлејһимә данышды. Мән дә өз сөзүмү дедим. Иҹласдан сонра исә онун мүавини Видади Имангулијев мәнә кәллә атды. Лакин зәрбәдән јајына билдим. Бу һәмин Видади Имангулијевдир ки, өлдүрдүјү адамын или апрелин 19-да чыхаҹаг. Бу һадисә баш верәндә Видади Имангулијев Сосиал Мүдафиә Фондунун Бәрдә шөбәсинин мүдири вәзифәсиндә чалышырды. Сакинләрдән бирини интиһара вадар етмишди. Һәмин сакин өзүнү јандырмышды”.
Солтан Һәсәнов ону да билдириб ки, Видади Исајев рајондакы кечмиш Ленин бағыны она тәмир етдириб: “Сиз дүз јазмысыныз. Мән бу мәсәләни иҹласда да демишәм. Демишәм ки, 200 мин манат пул хәрҹләмишәм бу ишә. Бу, һәгигәтән беләдир”.
Мүсаһибимиз әлавә едиб ки, о, артыг өз әризәси илә тутдуғу вәзифәдән азад едилиб: “Әризәни бу ҝүн (дүнән-ред) јазмышам. Артыг бу адамла ишләмәк мүмкүн дејил. Мән ағсаггал адамам, онларла һәр дәфә дава едән дејиләм”.
Табе олдуғу назирлијин баш верәнләрә неҹә јанашдығына ҝәлинҹә, мүсаһибимиз дејиб: “Мән дә, Видади Исајев дә баш верәнләр барәдә табе олдуғум назирлијә мәлумат вермишдик. Амма бизим назирликдә о ҹәсарәт һаны ки, мәни мүдафиә етсин”.
Баш верәнләрлә бағлы Видади Исајев вә Видади Имангулијевин дә мөвгејини өјрәнмәјә ҹәһд етдик. Лакин ҹәһдләримиз баш тутмады. Бунунла белә, онларын да мөвгејини дәрҹ етмәјә һазырыг.
Сејид
Диггәт: Хәбәрдән истифадә етдикдә мәнбәјә истинад лазымдыр
