Әһли Бејт -АБНА- хәбәр аҝентлији- Саатлы рајонунун Мусалы кәнд сакини, 70 јашлы Һафизә Шыхәлијеваны динләдикҹә дәһшәтдән нә дејәҹәјимизи билмирдик. Бу сәбәбдән, Күр дашгынындан зәрәр чәкән бу нәнәнин дедикләрини сизин нәзәринизә чатдырырыг.
- Күр чајынын дашмасы илә әлагәдар рајонда чохлу сајда мәнзил пис ҝүнә галды. Јашадығым Мусалы кәнди дә дашгын фәлакәтини јашајан кәндләрдән биридир. Мәним евим дә дағылды. Евими мин бир әзијјәтлә тикиб баша чатдырмышдыг. Онун тикинтиси илә бағлы ән азы 20 дәфә Саатлы рајону Иҹра Һакимијјәтинә ҝетмишәм. Һәр дәфә дә мәни оранын ишчиләри говублар. Мән истәјирдим ки, евими тиксинләр. Тәләбим дә бунунла бағлы иди. 9 нәфәр аилә үзвүмүз вар. Анҹаг бунун әвәзиндә тамам башга вәзијјәтлә үзләшдим. 2011-ҹи илин јајында иҹра башчысынын мүавини мәни дөјдү. Мән дә һәкимдән кечдим. Сонра да полис идарәсинә шикајәт етдим. Амма бир нәтиҹәси олмады.
- Иҹра башчысынын һансы мүавини дөјдү сизи?
- Биринҹи мүавин - Илһам Гулијев. Елә ондан сонра бу голум демәк олар ки, шикәст кими олуб (сол голуну ҝөстәрир -мүәл.). Һәкимләрдән сәнәд алыб полисләрә тәгдим етсәм дә, бу адамы полисә дәвәт едиб сорғу-суал етмәдиләр.
- Дөјәндән сонра иҹра һакимијјәти нүмајәндәләри сизинлә марагландылармы?
- Бу һадисәдән бир нечә ај сонра јенидән Иҹра Һакимијјәтинин бинасына јолландым. Башга әлаҹым јох иди, чүнки евим дағылыб, јашамаға јерим јохдур. Иҹра башчысы бинадан чыханда голундан тутуб дедим ки, валлаһ галмаға евим јохдур, мәним ев проблемими һәлл един. Бундан сонра иҹра башчысы чыхыб ҝетди. О, ҝедәндән сонра көмәкчиси Сејран мәнә деди ки, “нә бағырырсан?” Мән дә ҹаваб вердим ки, данышығына фикир вер, ајы бағырар. Бу заман онун әмиси јандан чыхараг боғазымдан тутду, мәни сөјдү вә јерә чырпды. Мәним атамын үнванына сөјүшләр јағдырды. Ахы адамын атасыны сөјмәзләр. Мәним атам 1941-ҹи илдә мүһарибәдә һәлак олуб. Һеч өзүм атамын үзүнү ҝөрмәмишәм. Бундан сонра полисләр ҝәлдиләр. Мәни Иҹра Һакимијјәтинин бинасында дүз үч саат сахладылар. Сонра исә полис автомобилинә гојуб Саатлы Полис Идарәсинә апардылар. Бу һадисә мартын 1-дә баш верди. Мәни полисә апармагларындан оғланларымын хәбәри олмајыб. Өзүм дә аҹ-јалаваҹ орада сахланылдым. Һеч мәни диндирмәдиләр дә. Елә бил ки, полисә јашлы бир гадынла бир итин ҝәлмәсинин фәрги јох иди... Бир нечә саатдан сонра Полис Идарәсиндән Иҹра Һакимијјәтинә зәнҝ етдиләр. Иҹра һакимијјәтиндән ҝәлиб мәни апардылар. Адама дејәрләр ки, әҝәр сиз мәни евимә апарырсынызса, нијә оғланларыма зәнҝ етмирсиниз ки, ҝәлин ананызы евинизә апарын?
- Евә гајытдыгдан сонра нолду?
- Евә гајыданда өвладларымын һеч нәдән хәбәрләри јох иди. Мәнзилә чатан кими дәрһал Дахили Ишләр Назирлијинин “гајнар хәтти” олан 102 нөмрәсинә зәнҝ ачдым. Дедим ки, мәни өлдүрүрләр, һәбс едирләр, ҝәлин мәни бу адамларын әлиндән алын. Бу зәнҝимдән сонра чох ҝүман ки, рајон полис идарәси илә әлагә сахлајыблар. Зәнҝимдән аз сонра гапымыза 5-6 полис әмәкдашы ҝәлди. Онлара дедим ки, евимә нәјә ҝәлмисиниз ки, бајаг сизин идарәдә идим, елә диндирән идинизсә, орада диндирәрдиниз дә. Нә исә јаздылар-поздулар. Һәтта голумун сындырылмасыны тәсдиг едән сәнәди онлара вердим. Амма јенә дә мәним шикајәтимә бахмадылар. Бурада һөкумәт вар, амма орада јохдур. Истәдикләрини едирләр.
- Полисдә олдуғунуз мүддәтдә сизи дөјмәдиләр ки?
- Хејр! Анҹаг оғлумла мәни бир ҝүн полисдә сахладылар. Биз билдирдик ки, президент Илһам Әлијевә вә биринҹи ханым Меһрибан Әлијеваја мүраҹиәт едәҹәјик ки, бизә бахмырсыныз, шикајәтләримизә гулаг асмырсыныз. Бу һадисә отагда баш верди. Оғлумун белә данышдығыны ҝөрән иҹра башчысынын мүавини Илһам мүәллим өвладыма пис сөјүш сөјдү. Бу заман оғлум онун үстүнә ҹумду вә деди ки, аналар мүгәддәсдир, онлары сөјмәк ејиб вә алчаглыгдыр. Тәсәввүр елә ки, иҹра нүмајәндәси, һөкумәтин мәмуру белә сөјүш сөјүр. Бу һадисәдән сонра мәни вә оғлуму полис идарәсинә апардылар. Бир сутка полисдә галмышыг. Һәтта иддиа етдиләр ки, оғлум иҹра һакимијјәтиндә уҹадан данышыб вә полисин дедикләринә гулаг асмајыб. Сабаһы ҝүнү исә мәни вә оғлуму мәһкәмәјә апардылар.
- Мәһкәмә ны гәрар чыхарды?
- Ҝуја оғлумун уҹадан данышмасына вә полисә гулаг асмамасына ҝөрә, бизи 100 манат ҹәримәләдиләр. Белә гәрар вердиләр ки, һәр ај 50 манат өдәјәк. Инанын ки, мән дә һәр ај алдығым тәгаүдүмдән 50 манат мәһкәмәјә өдәдим. Тәсәввүр един ки, инди иҹра башчысынын мүавини мәни сөјүб, оғлум буна етираз етдији үчүн, биз ана-баланы бир ҝүн полисдә сахлајыб, сонра да мәһкәмә јолу илә 100 манат ҹәримәләјибләр. Бу һансы әдаләтә, һагга ујғундур?
- Инди тәләбиниз нәдир?
- Мәнә гаршы һагсызлыг едән мәмурлар ишдән чыхарылмалыдыр. Иҹра һакимијјәтинә дә, јекә бир төһмәт верилмәлидир. Бунун башга јолу јохдур. Тәсәввүр елә ки, иҹра һакимијјәтиндә мәним үрәјим ҝедиб. Бунлар да башыма бир ведрә су төкүб ајылдыблар. Мәним назир Рамил Усубова чағырышларым вар. Хаһиш едирәм ки, мүвафиг ҝөстәриш версин. Мәни дөјдүкләринә гәдәки шикајәтимә бахсынлар. Илһам Әлијевә, Меһрибан Әлијеваја јазмышам. Мәни дөјдүкләринә, атамы сөјдүкләринә ҝөрә, бу адамлар ҹәзаландырылмалыдыр.
Диггәт: Хәбәрдән истифадә етдикдә мәнбәјә истинад лазымдыр
