Әһли Бејт -АБНА- хәбәр аҝентлијинин вердији хәбәрә әсасән Мүсават Партијасы мартын 17-дә Ҝәнҹләрин Һүгугларынын Мүдафиәси Комитәсинин кечирдији разылашдырылмыш етираз аксијасы илә бағлы бәјанат јајыб.
Бјанатда дејилир:
"Мүсават Партијасынын ҝәнҹ үзвләринин дә ҝениш гатылдығы бу митинг мүстәгиллик дөнәминдә ҝәнҹләрин өзләринин кечирдији илк митинг иди. Митинг јеринин шәһәрин мәркәзиндән хејли узаг олмасына вә чәтин һава шәраитинә бахмајараг ҝәнҹләр һәвәслә митингә гатылдылар. Митинг заманы сәсләндирилмиш “Сијаси мәһбуслара азадлыг!”, “Рүшвәтсиз тәһсил”, “Бизә Гарабағ лазымдыр!” вә диҝәр шүарлар чох актуал вә ҝүнүмүзүн реаллыгларына ујғун олуб. Ҝәнҹ лидерләр чыхышларында һакимијјәти һаглы олараг тәнгид едәрәк, ону өлкәдә ислаһатлар апармаға, сијаси вә виҹдан мәһбусларыны азад етмәјә, коррупсијаја сон гојмаға, ишғал олунмуш әразиләрин гајтарылмасы үчүн тәҹили тәдбирләр ҝөрмәјә чағырыблар. Һакимијјәт ҝәнҹләрин галдырдығы мәсәләләрә вә тәләбләринә ҹидди јанашмалы, онларын һәјата кечирилмәси үчүн тәҹили тәдбирләр ҝөрмәлидир.
Мүсават Партијасы ҝәнҹләрин 17 март митингинин тәләбләрини дәстәкләјәрәк бәјан едир ки, бундан сонра да азадлыглар вә вәтәндаш ҹәмијјәти уғрунда мүбаризә апаран ҝәнҹләрин јанында олаҹаг, бүтүн имканлары илә онлары дәстәкләјәҹәк.
Мүсават Партијасынын Диваны полисин митингин сонунда рок охујан бир груп ҝәнҹин ишләтдији ифадәләрдән истифадә едәрәк митингә мүдахилә етмәсинә, ҝәнҹләри һәбс етмәсинә етиразыны билдирир. Һәмин һадисәнин ҝәнҹләрин өзләри тәрәфиндән гынандығына вә гаршысынын алынмасына бахмајараг, онларын нәинки һәбс олунмасыны, һәтта ишҝәнҹәләрә мәруз галмасыны, һәмчинин бүтөвлүкдә тәдбирә көлҝә салмаг ҹәһдләрини гынајыр".
Мүсават Партијасы һәмчинин Президент Админстрасијасынын ҝәнҹләрин һаглы тәләбләрини диггәтә алмаг әвәзинә, бу һадисәдән тәләм-тәләсик суи-истифадә етмәк ҹәһдләрини һакимијјәтин нараһатлығынын вә дәрин мәнәви бөһранынын тәзаһүрү кими гијмәтләндирир.
Диггәт: Хәбәрдән истифадә етдикдә мәнбәјә истинад лазымдыр
