Әһли Бејт -АБНА- хәбәр аҝентлијинин вердији хәбәрә әсасән мартын 1-дә Губа рајонунда баш верән халг үсјаны иҹра башчысы Рауф Һәбибовун истефасы илә нәтиҹәләнди. Дөвләт рәсмиләринин ишә гарышмасы вә әһали илә компромисин әлдә олунмасындан сонра сакитләшдији ҝүман едилән просес јенидән гызышмаға башлајыб. Һадисәләри јенидән аловландыран исә һакимијјәтин нашы вә репрессив сијасәтидир.
Губа мүһасирәдә
Рајонда баш верән аксијалардан ҹидди шәкилдә нараһат олан һакимијјәт әввәлҹә компромисә разылашса да, сонрадан әнәнәви тактикасыны ишә салыб. Рајон сакинләринин вердији мәлумата ҝөрә, бу ҝүн Губада јенидән аксија кечирилмәси ҝөзләнилир. Бунун сәбәби исә даһа 16 нәфәрин мүәммалы шәкилдә һәбс едилмәсидир.
Мәлуматда дејилир ки, срағаҝүн ҝеҹә 16 нәфәрин евиндән апарылдығы билдирилир вә дүнән һәмин инсанларын јахынлары полисә мүраҹиәт етдикдә Полис Идарәләри бу адамларын онларын идарәсиндә сахландығыны тәкзиб едибләр. Рајон әһалиси исә бәјан едир ки, һәбс едиләнләрин бурахылмадығы вә репрессијаларын артаҹағы тәгдирдә Губада тәкрар митингләрә старт вериләҹәк.
Гејд едәк ки, губалылар артыг бәзи гәрарлар чыхарыблар. Мәлуматларда дејилир ки, бу ҝүн Губада јенидән нүмајишләр башлајаҹаг. Мәсәләдән хәбәр тутан һакимијјәт исә шәһәри мүһасирәјә алыб. Илкин мәлуматлара ҝөрә, 1000-дән артыг хүсуси тәјинатлы дәстәләр Губанын мәркәзинә јерләшдирилиб. Дахили Гошунларын зиреһли машынлары исә шәһәрин бүтүн күчәләрини нәзарәти алтына алыб вә давамлы олараг һәрәкәт едирләр.
Бакы вә Хачмаздан Губаја дәстәк
Алдығымыз мәлуматлара ҝөрә, артыг гоншу рајонлар вә Бакыдан да инсанлар Губада башламыш просесләрә дәстәк вермәк үчүн һәрәкәтә кечибләр. ТИА.АЗ-а чатан мәлуматлара ҝөрә, илк дәстәк Хачмаздан ҝәлиб. Бу рајонун бир груп сакини нөвбәти аксијалара гатылмаг үчүн губалыларла бир олдугларыны бәјан едибләр.
Диҝәр бир дәстәк исә Бакыдан ҝәлиб ки, артыг Маштаға вә Новханы кәндләриндән Губаја хејли сајда инсанын јола дүшдүјү билдирилир. Бу барәдә верилән мәлуматларда дејилир ки, Губа ҹамаатына дәстәк вермәк истәјән шәһәр вә рајонларын сајы јени аксијалардан сонра даһа да артаҹаг.
Баш верәнләри диггәтлә изләјән ҝүҹ структурлары Губа автовағзалына нәзарәти ҝүҹләндирмәјә башлајыб. Һәтта бу мәгсәдлә шәһәрин мәркәзинә әли силаһлы хејли сајда полис гүввәси јеридилиб вә онлар орада мүтәмади олараг нөвбә чәкирләр.
Даһа бир хәбәр Загаталадан ҝәлди
Гејд едәк ки, артыг өлкәнин һәр јериндән ингилаби просесләрлә бағлы јени-јени хәбәрләр ҝәлмәјә башлајыб. Сосиал шәбәкәләрдә јајылмыш мәлуматлара ҝөрә, бу ҝүн Загаталада да бир груп инсан јерли һакимијјәт органларынын истефасы тәләби илә күчәләрә ахышмаға һазырлашыр.
Һәмин мәлуматлара ҝөрә, Губада баш верәнләрдән һәвәсләнән загаталалылар илк ҝүнләрдә аз гүввә илә тәмсил олуна биләҹәкләриндән нараһат олсалар да, давамлылығы тәмин етдикдән сонра күтләвилијин артаҹағына әминдирләр. Онлар дејирләр ки, рајонда сосиал-игтисади вәзијјәт дәһшәтли шәкил алмагла јанашы, һәм дә мәмур өзбашыналығы да онларын һәјатыны пуч едир. Елә бу сәбәбдән дә һагларыны тәләб етмәк үчүн сонадәк мүбаризә апармағы мәгсәдәујғун билибләр.
Салјан мартын 10-на һазырлашыр
Мараглы хәбәрләрдән бири дә Салјан рајонундан ҝәлмәкдәдир. Артыг јерли мәтбуат бунунла бағлы мүхтәлиф хәбәрләр јајыблар. Артыг сосиал шәбәкәләрдә Салјанда етираз аксијасына чағрышлар едилир. Һәмин чағырышларда дејилир ки, рајонун иҹра башчысы Таһир Кәримовдан наразы салјанлылар мартын 10-да Салјанын мәркәзинә топлашаҹаглар.
Етираз аксијасына минләрлә инсан гатылмасы ҝөзләнилир. Тәшкилатчылара рајондакы орта вә ири иш адамлары да дәстәк вермәкдәдирләр. Онлар мартын 10-да Салјанда Губадан да издиһамлы бир митинг тәшкил едәҹәкләрини бәјан едирләр. Һүгуг-мүһафизә органлары исә митингин баш тутмамасы үчүн Салјанда күтләви һәбсләрә башлајыб.
Диггәт: Хәбәрдән истифадә етдикдә мәнбәјә истинад лазымдыр
