Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Силаһлы Гүввәләри Академијасынын гәрарҝаһ хидмәти кафедрасынын рәиси, ҝенерал-мајор Ләнкәран Әлијев Мүдафиә Назирлијинин ону мәһкәмәјә вермәсинә мүнасибәт билдириб. Л.Әлијев АПА-ја ачыгламасында Мүдафиә Назирлији Тәлим Тәдрис Мәркәзинин рәиси вәзифәсиндән узаглашдырылдыгдан сонра барәсиндә башланмыш ҹинајәт иши, јашадығы евин онун әлиндән алынмасы илә бағлы Мүдафиә Назирлијинин иддиасы әсасында кечирилән мәһкәмә просеси вә диҝәр мәсәләләрдән данышыб.
Ҝенерал билдириб ки, 3 ил әввәл - 2009-ҹу илин апрелиндә Тәлим Тәдрис Мәркәзинин рәиси вәзифәсиндә чалышаркән назирлик тәрәфиндән она гаршы гәрәзли мүнасибәт башлајыб: “Һәмин ил мәни вәзифәдән узаглашдырмаг мәгсәдилә Тәлим Тәдрис Мәркәзиндә гәрәзли јохламалара башланды, јохламаларын нәтиҹәси олараг мәнә гаршы сахта ҹинајәт иши галдырылды. Мәни дөвләтә күлли мигдарда зијан вурмагда ҝүнаһландырырдылар. Бу әдаләтсизлијә дөзмәјән, мәним табечилијимдә олан бир мајор үрәк тутмасындан өлдү. Мәнимлә јанашы, бир полковник-лејтенант ишдән чыхарылды. Узун мүддәт давам едән истинтаг тәдбирләри нәтиҹәсиндә ҝүнаһсыз олдуғум сүбута јетирилди вә ҹинајәт ишинә хитам верилди”.
Л.Әлијев дејиб ки, ҹинајәт ишинә хитам верилдикдән сонра Мүдафиә Назирлији онун јашадығы евдән чыхарылмасы илә бағлы Јасамал Рајон Мәһкәмәсинә мүраҹиәт едиб: “Өтән илин март ајында мәни вә аилә үзвләрими јашадығымыз евдән чыхармаг мәгсәдилә назирлијин иддиасы әсасында мәһкәмә башлады. Мәһкәмәдә мәлум олду ки, һәмин мәнзили мәнә назирлик өзү вериб вә орда гануни јашајырам. Буна ҝөрә дә Јасамал Рајон Мәһкәмәси Мүдафиә Назирлијинин иддиасыны тәмин етмәди. Лакин еви әлимдән алмагда иддиалы олан Мүдафиә Назирлији Бакы Апелјасија Мәһкәмәсинә мүраҹиәт етди. Сөзүҝедән мәнзилдә гануни әсасларла јашадығымы әсас ҝәтирән мәһкәмә апелјасија шикајәтини дә тәмин етмәди”.
Јашадығы мәнзилин она гануни шәкилдә верилдијини гејд едән Л.Әлијев һазырда да һәрби хидмәтини давам етдирдијини, ҝенерал-мајор һәрби рүтбәси дашыдығыны билдириб: “Рүтбәм ҝенерал олса да, полковник сәвијјәсиндә олан вәзифәдә ишләјирәм. Бунунла белә, Мүдафиә Назирлијинин мәнә гаршы гәрәзли мүнасибәти давам едир. Билирсиниз ки, гардашым оғлу Емин Әлијев өтән ил ҹәбһә бөлҝәсиндә шәһид олуб. Онун атасы 1998-ҹи илдә автомобил гәзасында дүнјасыны дәјишдији үчүн Емин мәним һимајәмдә, мәһкәмә мөвзусуна чеврилән һәмин мәнзилдә бөјүјүб, аиләмин бир үзвү олуб. О, өтән илин јајында һәрби тәһсилини баша вурдугдан сонра дөјүш бөлҝәсиндә хидмәтә башлады. Ону демәлијәм ки, һәрби мәктәби јени битирмиш мәзунлар һеч вахт бирбаша дөјүш бөлҝәсинә, өн хәттә ҝөндәрилмирләр. Мәзунлар ән азы алты ај еһтијат һиссәләрдә хидмәт апармалы олдуғу һалда, Мүдафиә Назирлији бир даһа мәсәләјә гәрәзли јанашараг, Емини өн хәттә ҝөндәрди. Нәтиҹәси дә мәлумдур. Өтән илин нојабр ајында Емин шәһид олду. Мәним һимајәмдә олан Емин шәһид олдугдан ики һәфтә сонра Мүдафиә Назирлији јенидән мәни евдән чыхармаг иддиасы илә касасија шикајәти верди. Али Мәһкәмә шикајәтә бахараг, иддианы тәмин етмәдән иши Бакы Апелјасија Мәһкәмәсинә ҝөндәриб”.
Л.Әлијев бу ҝүн јашадығы еви чох бөјүк чәтинликлә әлдә етдијини билдириб: “Мән һәлә советләр иттифагы дөврүндән һәрбичи кими чалышырам. Әввәлләр Ҝәнҹәдә хидмәт едирдим, орда евим варды. Бакыја, Тәлим Тәдрис Мәркәзинә рәис тәјин едиләндән сонра Ҝәнҹәдәки евими тәһвил вердим вә бу ҝүн јашадығым еви алмаг үчүн нөвбәјә дајандым. Аиләмдә әлил ушаг ола-ола, узун мүддәт ев нөвбәсиндә галдыгдан сонра мәнә ев вердиләр. Там гануни әсасларла мәнә верилән бу еви инди ганунсуз һесаб едәрәк әлимдән алмаг истәјирләр. Сәбәб исә ону ҝөстәрирләр ки, ҝуја мәним јашадығым евин јерләшдији әразини ганунсуз зәбт еләмишәм. Назирлик иддиасында билдирир ки, һәмин әразидә јатагхана тикиләҹәк. Лакин һәмин јатагханада мәнә мәнзил верилмәјәҹәк. Али Мәһкәмә дә мәһз буна ҝөрә иши јенидән Бакы Апелјасија Мәһкәмәсинә гајтарыб. Мәһкәмә үчүн дә мараглыдыр ки, неҹә олур, узун мүддәт һәрбчи олан шәхс јашадығы евдән чыхарылыр, әвәзиндә она мәнзил верилмир”.
Л.Әлијев бу ҝүн Азәрбајҹан һәрбчиләринин мәнзил тәминаты илә бағлы чох ҹидди проблемләринин олдуғуну дејиб, бунда мүдафиә назири, ҝенерал-полковник Сәфәр Әбијеви ҝүнаһландырыб. Гаршылашдығы әдаләтсизликләр вә һәрбчиләрин проблемләрлә бағлы февралын 1-дә Али Баш командан, президент Ылһам Әлијевә рапортла мүраҹиәт етдијини гејд едән ҝенерал, рапортунун артыг Али Баш командана чатдығыны дејиб, мүраҹиәтә мүсбәт реаксија вериләҹәјинә үмидвар олдуғуну вурғулајыб.
Диггәт: Хәбәрдән истифадә етдикдә мәнбәјә истинад лазымдыр
