Әһли Бејт -АБНА- хәбәр аҝентлијинин вердији хәбәрә әсасән вәкил ачыгламасында билдириб ки, Милли Тәһлүкәсизлик Назирлији вә Баш Прокурорлуг ганунвериҹиликлә онлара верилмиш сәлаһијјәтләри ашараг, сијаси просесләрдә иштирак едирләр вә бунунла да өзләрини нүфуздан салырлар: “МТН-нин сон бир ил әрзиндә кечирдији әмәлијјатлара бахдыгда мәлум олур ки, бу гурум дөвләтин тәһлүкәсизлијини тәмин етмәк әвәзинә, һакимијјәтә гаршы мүхалиф мөвгедә дајанан инсанлары шәрләјәрәк һәбс етмәклә мәшғулдур. Буну сүбут едән кифајәт гәдәр мөтәбәр сүбутлар вар. Диндарларын хариҹи өлкә кәшфијјаты илә әлбир олараг, Азәрбајҹан дөвләтинә гаршы фәалијјәт ҝөстәрмәкдә иттиһам олунмасы илә бағлы ишләрә бахдыгда буну ҝөрмәмәк мүмкүн дејил”.
Е.Намазов гејд олунанларын тәсдиги кими өтән илин августунда һәбс олунан Рамин Бајрамов, Абҝүл Сүлејманов вә Ариф Гәнијев барәдә верилән бәјанаты ҝөстәриб: “Өтән илин 12 августунда МТН-лә Баш Прокурорлуг бирҝә бәјанат јајараг, Рамин Бајрамов, Абҝүл Сүлејманов вә Ариф Гәнијевин Азәрбајҹан Республикасына гаршы дүшмәнчилик фәалијјәти апардыгларына ҝөрә һәбс едилдикләрини билдирмишди. Һәмин бәјанатда ҝөстәрилирди ки, МТН вә Баш Прокурорлуг тәрәфиндән бирҝә һәјата кечирилмиш истинтаг һәрәкәтләри вә әмәлијјат-ахтарыш тәдбирләри нәтиҹәсиндә Азәрбајҹан Республикасына гаршы дүшмәнчилик фәалијјәти апармагда хариҹи дөвләтә вә онун нүмајәндәләринә көмәк етмәкдә, еләҹә дә өлкәдә иғтишашларын төрәдилмәсиндә, иҹтимаи тәһлүкәсизлијин позулмасында, инсанларын итаәтсизлијә тәһрик едилмәсиндә шүбһәли билинән Азәрбајҹан Республикасынын вәтәндашлары Сүлејманов Абҝүл Немәт оғлу, Бајрамов Рамин Ҹаһанҝир оғлу вә Гәнијев Ариф Ҝүлсувар оғлу сахланмышлар. Бунунла бағлы һәмин вахт һәтта видео кадр да һазырланараг, телеканалларда нүмајиш етдирилмишди. Гејд олунан бәјанат бу ҝүн дә МТН-нин вә Баш Прокурорлуғун веб сајтында галыр. Тәәҹҹүблүсү будур ки, адлары гејд олунан шәхсләрин һеч бири бәјанатда ҝөстәрилән һәрәкәтләрә ҝөрә иттиһам олунмајыблар. Онларын һәр үчү силаһ вә наркотик маддә сахламагда иттиһам олунур вә артыг мәһкәмә просесләри башлајыб. Сөзүҝедән бәјанатын бөһтан характерли олмасыны вахтилә биз вәкилләр исрарла билдирирдик. Лакин өлкәдә өзбашыналыг режиминин һөкм сүрмәси сәбәбиндән бизим етиразларымыза әһәмијјәт верилмәди. Буна бахмајараг, МТН сонда өз-өзүнү ифша едәрәк, һәр үч шәхси тамамилә башга иттиһамларла мәһкәмәјә верди”.
Вәкил һәмчинин гејд едиб ки, МТН-нин сијасәтдә иштиракы бунунла битмир: “Бу ҝүн МТН ганунвериҹилијин тәләбләринә зидд олараг, дәләдузлуг ҹинајәтләринин истинтагыны апарыр. Лакин бу ади инсанларын бир бирини алдатмасы илә бағлы олан ишләр дејил, Һејдәр Әлијев Фондунун ады кечән дәләдузлуг ҹинајәтләридир. МТН бу ҹүр ганунсуз ишләрлә мәшғул олмагла, фактики олараг ганунвериҹиликлә гадаған олунмуш өзбашыналыға јол верир”.
Диггәт: Хәбәрдән истифадә етдикдә мәнбәјә истинад лазымдыр
