Әһли Бејт -АБНА- хәбәр аҝентлијинин вердији хәбәрә әсасән Алманијанын даһа бир мәшһур телеканалы Азәрбајҹан һакимијјәтини, башда Илһам Әлијев олмагла, тәнгид атәшинә тутуб. Һәм дә будәфәки тәнгид сатирик үслубда олуб. Өлкәнин популјар НДР телевизијасы өзүнүн “Ехтра 3” сатирик журналынын сонунҹу бурахылышыны ”Еуровисион-2012”нин Бакыда кечириләҹәјинә вә бу хүсусда Азәрбајҹандакы вәзијјәтә һәср едиб.
Сатирик сүжетдә Илһам Әлијевин үнванына “мәзәли президент”, “ихтисасҹа диктатор” вә с. бу кими ироник ифадәләр ишләдилиб, өлкәдә инсан һагларынын неҹә позулдуғуну әкс етдирән кадрлар нүмајиш олунуб.
Сүжет сатирик журналын Клаус адлы “апарыҹысынын” Азәрбајҹаны танытмасы илә башлајыр: “Азәрбајҹанда јашајан инсанлар шад-хүррәмдирләр. Чүнки онларын мәзәли президенти вар. О, ихтисасҹа диктатордур. Амма јаландан һамыны демократијанын мөвҹуд олмасына инандырмаг истәјир. Чох мәзәлидир!”.
Бундан сонра “Еуровисион” тәшкилатчылары гисминдә ики нәфәр ҝөстәрилир: ”Еуровисија" мусиги јарышмасынын тәшкилатчылары да елә дүшүнүрдү ки, нә јахшы бизим ҝөзәл маһны мүсабигәмиз белә шән өлкәдә кечириләҹәк”.
Ардынҹа Илһам Әлијевин әтрафындакылара әл еләјәрәк машына әјләшдији кадр вә бу сөзләр: “Диҝәр тәрәфдән президент Әлијев дә севинирди ки, бу јолла өз имиҹини әһәмијјәтли дәрәҹәдә гајдаја сала биләҹәк. Бу мәгсәдлә, һәтта пајтахты белә, баш-ајаг етмәјә һазырдыр. Бүтүн “чиркин” биналар сөкүлмәлидир. 20 мин чиркин бина сакини илә бирликдә”. Сонунҹу ҹүмләләри Бакыда ҝеҹә вахты инсанларын евләринин неҹә дағыдылдығыны ҝөстәрән кадрлар мүшаијәт едир.
Даһа сонра мүхаилфәтин динҹ митингләрини полисин неҹә гәддарлыгла дағытдығы, әлијалын инсанлары дәјәнәкләрлә неҹә дөјдүјү ҝөстәрилир: “Азәрбајҹанда инсан һагларыны тәпикләрлә тапдалајырлар. Амма, ахы әслиндә бу белә дејил. Әксәр вахты бунун үчүн дәјәнәкләрдән истифадә едирләр.
Вај, вај, вај! Бәс “Еуровисион” тәшкилатчылары бу барәдә нә дүшүнүр?”.
Бу мәгамда јенидән “Еуровисион” тәшкилатчылары гисминдә ики нәфәр ҝөстәрилир вә дејилир: “Әлбәттә ки, һеч нә, ахы неҹә дүшүнсүнләр? Бүтүн ҝүнү Азәрбајҹанын галиб ҝәлән нәғмәсини динләдикләриндән онлар һеч нә баша дүшә билмир. Вә бу мәшғулијјәт заманы онлары нараһат едән олмасын дејә Әлијев әми Азәрбајҹанда мүхалифәти мәһв етмәклә мәшғулдур”.
“Еуровисион” тәшкилатчыларынын Азәрбајҹанда баш верәнләри нәзәрә алмадыгларына ришхәндә мәруз галмасындан сонра дејилир: “Еуровисион” тәшкилатчылары вә Азәрбајҹан бир-биринә лап ҝөзә дәјән јумруг кими јарашыр. Вә ја даһа јахшы, әл ағыза јапышан кими. Чох ҝөзәл!!!"... Вә сүжет мүхалифәтин динҹ митингләриндән бириндә полсин сахладығы етиразчынын шүар демәсинә мане олмаг үчүн бармагларыны онун ағзына басдығы кадрла битир.
Диггәт: Хәбәрдән истифадә етдикдә мәнбәјә истинад лазымдыр
