Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасы Гадынлар Шурасынын вә «Әсҝәр Аналарына Дәстәк» Иҹтимаи Бирлијинин сәдри Нөврәстә ханым әзиз Пејғәмбәримиз Һәзрәт Мүһәммәдин мөвлуду илә әлагәдар гадынлары бир јерә топламышды.
Гадынлар Шурасынын сәдри Һаҹы Нөврәстә ханым Ибраһимова илк олараг әзиз Пејғәмбәримиз Һәзрәт Мәһәммәдин мөвлуду мүнасибәти илә һамыны тәбрик еләди: «Аллаһ-Тәаланын ҝөндәрдији бүтүн Пејғәмбәрләр әзиз олуб. Амма бу да бир һәгигәтдир ки, онларын һамысы Һәзрәт Мүһәммәдин ҝәлишини тәсдиг едәрәк, өз китабларында вә кәламларында бујурублар».
Бүтүн јаранмышларын Һәзрәт Мүһәммәдә хатир јарандығыны гејд едән сәдр даһа сонра сөзләринә белә давам етди: «Ааллаһ-Тәала Һәзрәт Пејғәмбәрә бујуруб: «Анд олсун мәним иззәт вә ҹәлалыма Сәндән әввәлкиләри сәнә хатир назил етмишәм. Анҹаг Әли олмасајды, сәни дә хәлг етмәздим. Һәзрәт Фатимеји Зәһранын өзүндән әввәл нуру вә сонра вүҹуду Мән тәрәфиндән јаранмасајды Һәзрәт Әлини јаратмаздым. Бәли бу мәсумларын әхлагы, ләјагәти барәдә тәриф еләмәјә 100 ил өмүр дә кифајәт етмәз. Әслиндә биз онлары тәрифләјә билмәрик, мәгсәдимиз онлардан илтимас, дуа истәмәкдир».
Һәзрәт Мәһәммәд (с) фил илинин рәбиүл-әввәл ајында дүнјаја ҝәлдијини билдирән Һаҹы ханым онун доғум ҝүнү һаггында ики версија олдуғуну билдирди: «Сүнни гардашларымыз Һәзрәт Мәһәммәдин рәбиүл-әввәл ајынын 12-дә, шиә алимләримиз исә рәбиүл-әввәл ајынын 17-дә ҹүмә ҝүнүндә мүгәддәс ҝөзләрини бу дүнјаја ачдығыны дејирләр. Биз дә мүсәлманлар арасында икитирәлик дүшмәмәси хатиринә вәһдәт һәфтәси кими һәр ики тарихи гејд едирик. О дүнјаја ҝәләндә бир чох мөҹүзәви һадисәләр баш вериб. Һәмин ҝүнү бүтүн абидләр горхулу јухулар ҝөрүб, Сәван ҝөлү гурујуб, атәшпәрәстләрин мин илләрдир јанан атәшҝаһы сөнүб».
«Әсҝәр Аналарына Дәстәк» ҹәмијјәтинин сәдри Пејғәмбәрин ушаглыг вә ҝәнҹлик илләриндән дә данышды: «Гәдимләрдә ушагла сүд аналарына тәслим едиләрмиш. Һәлимә ханым она дајәлик етмәк истәјини билдирәндә Әбдүл Мүтәллиб ондан һансы нәсилдән олдуғуну сорушур. О да Сәд нәслиндән олдуғуну дејир… Беләликлә дә Пејғәмбәр Һәлимә ханыма тәслим едилир. Һәзрәт Мүһәммәд бу гадыны о гәдәр чох севирди ки, артыг нечә илләрдән сонра белә Һәлимә онлара гонаг ҝәләндә дуруб өз әбасыны ханымын алтына саларды. Онун дәфн-кәфн мәсәләсини дә Пејғәмбәр өзү јеринә јетириб. Пејғәмбәримиз ҝәнҹ оланда исә тәгвасы вә һәјасы илә үн салмыш Һәзрәт Хәдиҹә илә евләнир. Бу мүбарәк издиваҹдан да Пејғәмбәрин мәсум гызы васитәсилә 12 пак сүлалә мејдана ҝәлди. Һәр ҝүн ән азындан үч дәфә намаза дуранлар Пејғәмбәр вә онун пак Әһли-бејтинә салам вә салават ҝөндәрир.».
Нөврәстә ханым Һәзрәт Мәһәммәдин ҝөзәл әхлагындан, ләјагәтиндән, рәһбәрлијиндән дә сөһбәт ачды: «Дүнја гуруландан бу ҝүнә гәдәр һеч бир дөвләт башчысы мүһарибәдә иштирак етмәјиб, амма Һәзрәт Мүһәммәд шәхсән 26 дөјүшдә иштирак едиб. Мүбарәк дишләри, алны парам-парча олуб. Балаҹа гызы өз көрпә әли илә она мәлһәм гојуб. Илаһи Пәрвәдиҝары бујуруб ки, Һәзрәт Мәһәммәд она ҝөрә һамыдан үстүндүр ки, о вә Әһли бејти Мәним јолумда өзләриндән кечдиләр».
Әввәлки Пејғәмбәрләрин үсулиддинин јалныз үч шәрти – Аллаһ тәкдир, нүбүввәт вә мәад ҝәтирдијини дејән АИП Гадынлар Шурасынын сәдри Һәзрәт Мүһәммәдин бу шәртләрә даһа икисини артырдығыны да дејиб: «Бу да ону диҝәрләриндән даһа үстүн едир».
Нөврәстә ханым инсанын истәдији тәгдирдә мәләкдән үстүн олаҹағыны да билдирди: «Бүнун үчүн ағаҹ формасында хүсуси схем дә верилиб. Бу јолун биринҹи будағы инсанын дүнјаја ҝәлмәси, икинҹи, Аллаһа иман ҝәтирмәји, үчүнҹү – тәгва, јәни ҝүнаһлардан пәһриз сахламасы, дөрдүнҹү – мәләк, јәни мәсумлуг рүтбәси, бешинҹи – нәби, јәни пејғәмбәр».
«Әсҝәр Аналарына Дәстәк» ИБ сәдри бу ҝүн Пејғәмбәрдән илтимаси –дуаја ҝәлдијини билдирди: «Ҝүнләримиз гара кечир, иманымыз зәифләјә биләр. Пејғәмбәримиз һәлә ҝәнҹ икән мүртәдләр Әбу Талибин һәјәтинә јығышараг дедиләр: «Ҝет, гардашын оғлуна де ки, аталарымыздан галан вә әлләримизлә јаратдығымыз аллаһлара тохунмасын. Она бу дүнја малындан нә истәсә верәрик». О заман Мәһәммәд Пејғәмбәр әмисинә деди: «Анд олсун Аллаһын иззәт вә ҹәлалына, сағ әлимә Ҝүнәши, сол әлимә Ајы гојалар, бүтүн дүнјаны мәнә тәһвил верәләр, мән јолумдан дөнмәрәм. Чүнки, Аллаһ бу јолу истәјир». Пејғәмбәр бу ҹавабы илә јашадығы дөврдән, та гијамәтә кими ибрәт гојуб ҝетди. Бәли, шејтан Гијамәтә гәдәр бизим пусгумуздадыр. Чүнки, о, инсан өвладына Гијмәтә гәдәр јолдан чыхараҹағына анд ичиб. Кимин иманы гүввәтлидир ону даһа чох јолдан чыхармаға чалышыр. Јәни ки, мүшрикләр дејәрләр, сизин аҹындан өлдүрәрик, евинизи дағыдарыг, балаларынызы һәбс едәрик, ачын һиҹабы. Биз дејәҹәјик ки, тутдуғумуз јолдан дөнән дејилик. Чүнки буну Гуран бизә ҝөстәриб. Мәним Аллаһымын, Китабынын бујурдуглары сизләрин сөзләриндән үстүндүр».
АИП Гадынлар Шурасынын сәдри Нөврәстә ханым Ибраһимова сонда Аллаһы, Гураны севән, Пејғәмбәри, онун Әһли-бејтини таныјан бүтүн мүсәлманлары бу ҝүнкү мүбарәк ҝүн мүнасибәти илә сәмими гәлбдән тәбрик едәрәк, бајрамларыны тәбрик етди.
Мәҹлис еһсан сүфрәси илә баша чатды.
Диггәт: Хәбәрдән истифадә етдикдә мәнбәјә истинад лазымдыр
