Әһли Бејт -АБНА- хәбәр аҝентлији әзиз Ислам Пејғәнбәринин Милад бајрамы мүнасибәти илә башда Имам Заман (әҹҹәләллаһу фәрәҹәһу шәриф) Һәзрәтләри олмагла бүтүн бәшәријјәти сәмими гәлбдән тәбрик едир вә бу мөһтәшәм бајрамла әлагәдар сајтымызын зијарәтчиләринә Әвәз Гурбанлынын шерини тәгдим едир.
Һәзрәт Пејғәмбәрә
Еј бизи јохдан Јарадан, лүтф гыл!
Јох едә аҹизлијими гүдрәтин.
Лүтфүн илә бир нәзм инша едим,
Мән әбәди рәһбәринә үммәтин.
Өјлә сәхавәтлә ки бәхш етмисән
Бир белә сөз гүдрәти Пејғәмбәрә,
Бәхш ет онун зәррәсини шеримә –
Лајиг ола Һәзрәти-Пејғәмбәрә!
Ја Рәбб! Бу чарәсиз гәләмә ихтијар вер,
Бу бигәрар көнлүмә ҝәл бир гәрар вер!
Әғјардән мән истәмәрәм, сән ки Јарсән,
Тәк дәрдимин әлаҹы ахыр сәндә вар, вер!
Сәндән нә истәрәмсә мән, әрк илә истәрәм
Бу мејвәсиз галан ағаҹа өјлә бар вер –
Ахсын көнүлдә лүтфүн илә тәб’ чешмәси,
Рәһм ет ки, тәб’дән бу көнүл бир дә дүшмәсин!
Еј бәхтимин ситарәси, бу гәлбә нурсән,
Пејғәм ҝәтирдијин бәшәр үчүн гүрурсән!
Јох мәндә бир һүнәр, сәни мәдһ ејләмәк гәдәр,
Чүн сәндә ҹә’м олуб, нә ки аләмдә вар һүнәр.
Олмаз сәнә рәва ки, десәм ҝәрчи даһисән,
Сән чүнки даһи шәхсләрин сәҹдәҝаһисән!
Еј Халигин сәмадән енән халга рәһмәти,
Гојдун бизим ниҹатымыз үчүн шәриәти.
Сәндән әзәл ҝәләнләрә вермәклә сән хитам,
Аллаһ Рәсулу һөҹҹәтини ејләдин тәмам.
Зикринлә тапды мөмин олан дәрдинә дәва,
Аллаһдан һәм дә кафәр үчүн истәдин шәфа!
Һаггында чох да чохлары јазмыш зијадә сөз,
Һагга сүвар оланлара чатмаз пијадә сөз!
Онларда сөз дәнизсә әҝәр, мәндә дамладыр,
Әфв ејлә, шә’нинә дејирәм мән дә садә сөз.
Әрз ејләдим ки, мәдһинә јох мәндә бир һүнәр,
Лүтф ејләјә илаһи, дуам ҝетмәјә һәдәр,
Сөз ҝүлшәниндә олмаја заје әзијјәтим,
Бир ҝүн һидајәтинлә ачылсын бәсирәтим.
Бади-сәба илән мәнә гылсын Худа кәрәм,
Гәдрин гәдәр дә нәзминә гадир ола гәләм!
Диггәт: Хәбәрдән истифадә етдикдә мәнбәјә истинад лазымдыр
