Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын мәтбуат хидмәтиндән дахил олан мәлумата ҝөрә, бу ҝүн партијанын Баш Мәҹлисинин нөвбәти топлантысы олуб. Топлантыда партија функсионерләри, партијанын рајон комитә сәдрләри вә медиа нүмајәндәләри иштирак едибләр.
Баш Мәҹлисинин ҝүндәлијиндә мүхтәлиф мәсәләләр салыныб. Илк олараг чыхыш едән АИП-ин сәдр әвәзи Елчин Манафов партијанын кечән бир ил әрзиндәки фәалијјәти һаггында мәлумат вериб. Бу ҝүнә гәдәр партијанын мүхтәлиф тәзјиг вә репрессијаларла гаршылашдығыны гејд едән Е.Манафов, бу мүддәт әрзиндә партијанын фәалијјәтинин бир ан да олсун белә дајанмадығыны билдириб.
Даһа сонра чыхыш едән АИП функсионери Акиф Һејдәрли, “һазырки игтидарын идарәчилијинин сону Азәрбајҹанын гаранлыг ҝәләҹәјиндән хәбәр верир. Өлкә игтисадијјаты јалныз нефт ҝәлирләри үзәриндә гурулуб. Диҝәр саһәләрдә исә һеч бир ирәлиләјиш јохдур. Һазырда өлкә бөјүк бир мәнәвијјатсызлыға тәрәф јуварланыр”, - дејә билдириб.
АИП-ин тәшкилаты мәсәләләр үзрә мүавини Рөвшән Әһмәдли исә бу ил партијанын рәсми гејдијјатынын 20 илинин тамам олундуғуну сөјләјиб вә бу јубилејин республика сәвијјәсиндә гејд олунмасы үчүн планларын һазырланмасынын ваҹиблијинә тохунуб: “АИП фәалијјәтинә 1990-ҹи илләрин әввәлиндән етибарән башлајыб. Чалышаҹағыг ки, бу ил партијанын 20 иллик јубилејини реҝионлардан башлајараг, мәркәздә ҝениш формада һәјата кечирмәклә тамамлајаг.”
Даһа сонра АИП функсионерләринин һәбси, һиҹаб гадағасы, өлкәнин сосиал дуруму вә сон ҝүнләр Азәрбајҹан ордусунда баш верән аҹынаҹаглы һадисәләр мүзакирә олунуб. Баш Мәҹлисдә һәмчинин 20 Јанвар фаҹиәси вә 26 феврал Хоҹалы Сојгырымы ҝүнү илә бағлы бәјанат гәбул едилиб. Бәјанатда рус вә ермәни һәрби бирләшмәләринин төрәтдији бу бәшәри ҹинајәтләр писләнилиб. Баш Мәҹлис 2012-ҹи илдә нөвбәти гурултајын кечирилмәси һаггында гәрар гәбул едиб.
Гејд едәк ки, бу ил АИП-ин фәалијјәт мүддәтинин 20 или тамам олаҹаг. Бу мүнасибәтлә дә ҝениш тәдбирләр кечирилмәси Баш Мәҹлис тәрәфиндән тәклиф олунуб.
Диггәт: Хәбәрдән истифадә етдикдә мәнбәјә истинад лазымдыр
