Әһли Бејт -АБНА- хәбәр аҝентлији: Артыг нечә илләрдир ки, өлкәдә ислами дәјәрләрә вә инанҹлы шәхсләрә гаршы тәзјигләр вә басгылар баш галдырыб. Лакин бу тәзјигләрин ән пик нөгтәси 2011-ҹи илә тәсадүф еләди. Белә ки, бу ил һиҹаб гадағасы, 40-а јахын инанҹлы шәхсин өз һаглары уғрунда һәбс едилмәси вә дини гадағалары еһтива едән ганун лајиһәләринин парламентдә тәсдиг олунмасы өлкәдә ислами дәјәрләрә гаршы тәзјигләрин мөһүрүнү вурду. Мөвзу илә бағлы ачыглама верән АИП-ин сәдр мүавини Рөвшән Әһмәдли, 2011-ҹи илин инанҹлыларын ән чох репрессијаја мәруз галдығы дөвр кими јадда галдығыны билдирди.
“2011-ҹи ил өлкәнин сијаси-иҹтимаи һәјатында фәал олан шәхсләрин сифаришли һәбсләри илә јадда галды. Чүнки илин әввәлләриндә АИП сәдри Мөвсүм Сәмәдов партијанын баш мәҹлисиндә етдији чыхышына ҝөрә һәбс олунду. Бу просес, диҝәр нүфузлу иҹтимаијјәт нүмајәндәләринин вә илаһијјатчы алимләрин азадлыгларынын әлләриндән алынмасы илә давам етди. 2011-ҹи ил исламчыларла бағлы кечирилән гәрәзли вә сифаришли мәһкәмә просеси илә јадда галды.“
Дөвләтин үмдә вәзифәсинин халгы мүдафиә етмәк вә онун рифаһынын јахшылашдырмаг олдуғуну гејд Рөвшән Әһмәдли, һүгуги дөвләтдә вәтәндашларын ганунла бүтүн һагларынын горундуғуну билдирди.
“Үмид едирик ки, 2012-ҹи илдә ганунсуз һәбсдә јатан инсанлар азад олунаҹаг. Дөвләтин белә бир аддым атмасы чох актуал бир мәсәләдир. Азәрбајҹанын проблемләри ичәрисиндә ән ағрылы Гарабағ мәсәләси дә вар. Бу проблеми јалныз вәтәндаш вә дөвләт һәмрәјлији илә һәлл етмәк мүмкүндүр. Үмид едирик ки, 2012-ҹи илдә дүз сөзләринә ҝөрә һәбсә атылан инсанлар азад олунаҹаг вә дөвләт вәтәндаш бирлији илә Гарабағ мүнагишәси өз һәллини тапаҹаг”.
Диггәт: Хәбәрдән истифадә етдикдә мәнбәјә истинад лазымдыр
