Әһли Бејт -АБНА- хәбәр аҝентлијинин вердији хәбәрә әсасән: Салјанын Гарабағлы кәндиндә газ тәләби илә кечирилән етираз аксијасындан сонра ҝәрҝинлик сәнҝимир. Аксијада иштирак етмиш кәнд сакини Агил Гәдиров һәбс олунуб.
Демократијаја Јардым Иҹтимаи Бирлијинин сәдри Емил Мәммәдовун мәлуматына ҝөрә, һазырда Салјан Рајон Полис Шөбәсиндә сахланылан А.Гәдиров фактики олараг вәкилсиз, мүдафиәсиз галыб: “Чох истәрдик ки, мадди имканлары һәддиндән артыг мәһдуд олан, 3 азјашлы ушағыны вә хәстә анасыны базарда ҝөјәрти сатмагла доландыран Агили вәкил бүролары тәмәннасыз мүдафиә етсинләр. Чүнки бу инсан ҝүнаһсыздыр вә ону сындырмаг, етмәдији бир ҹинајәти бојнуна гојмаг истәјирләр”.
Е.Мәммәдов “Гафгазинфо”ја билдириб ки, бу өлкәдә горху хофу јаратмаг мәгсәди дашыјыр: “Бизим ҝөрдүјүмүз тәдбирләрдән сонра Агил барәдә һәбс гәти имкан тәдбири сечилмәјәрәк бурахылмышды. Амма сонралар дәфәләрлә рајон прокурорлуғуна ифадә верән Агил Гәдиров билдириб ки, о саһә мүвәккилини вурмајыб. Һәтта аксијаја да тәсадүфән ҝәлиб чыхыб. Чүнки евләринә та әввәлдән газ хәтти белә чәкилмәјиб. Лакин јенидән прокурорлуға чағырылан Агил барәдә ахшам саатларында мәһкәмәдә һәбс гәтимкан тәдбири сечилиб”.
Е.Мәммәдов баш верәнләрлә бағлы Салјан прокурорунун көмәкчиси Саһиб Исмајыловла ҝөрүшүб: “О мәнә деди ки, Агил өз ифадәләриндә полис ишчисинә хәсарәт јетирмәдијини јазыб. Буна ҝөрә дә мәҹбур олуб һәбс гәти имкан тәдбири сечибләр. Амма мәнҹә бу өлкәдә јенидән старт верилмиш горху хофу јаратма кампанијасы илә бағлыдыр. Чүнки Агил һәмин ҹинајәти төрәтсә дә белә бу аз ағыр ҹинајәтдир вә 3 иләдәк һәбслә ҹәзаландырыла биләр. Белә ҹинајәтләрдә исә адәтән мәһкәмәјәдәк һәбс гәти имкан тәдбири сечилмир. Онун өһдәсиндә 3 азјашлы ушағы вә хәстә анасы вар, илк дәфәдир ки мәһкум олунур. Баш верәнләрин иҹтимаиләшдирилмәси үчүн бүтүн тәдбирләр ҝөрүлүр”.
Гејд едәк ки, нојабрын 18-дә Гарабағлы кәндинин сакинләри газ верилмәси тәләби илә Ширван - Салјан автомобил јолуну бағламышды. 1 саатдан артыг давам едән аксија полисин мүдахиләси илә дағыдылмышды. Нојабрын 21-дә исә һәмин кәндин 4 нәфәр сакини полис саһә рәиси Елшән Јусифова хәсарәт јетирмәкдә шүбһәли билинәрәк Салјан РПШ-јә апарылыблар. Салјан Прокурорлуғунда Агил Гәдиров барәсиндә Ҹинајәт Мәҹәлләсинин 315.1-ҹи (һакимијјәт нүмајәндәсинә мүгавимәт ҝөстәрмә) маддәси илә ҹинајәт иши башланыб. Нојабрын 24-дән кәндә Салјан ОИЛ-ин мәдәнләриндән сәмт газынын верилмәси бәрпа олунуб. Бу исә 700 нәфәрлик абонентин јалныз јарысыны әһатә едир. «Азәригаз» тәрәфиндән исә кәндә јени газ хәттинин чәкилиши сүрәтләндирилиб. Буна бахмајараг, Салјанда газ үсјанынын гурбаны ҝөјәрти сатан, имкансыз бир кәндли олду.
Диггәт: Хәбәрдән истифадә етдикдә мәнбәјә истинад лазымдыр
