Әһли Бејт -АБНА- хәбәр аҝентлијинин вердији хәбәрә әсасән: Декабрын 15-дән Ләнкәранын Нәриманабад-2 гәсәбәсиндә ҝәрҝинлик јашаныр. Һәмин ҝүн сәрһәдчиләрлә гәсәбә сакинләри арасында гаршыдурма олуб. Гаршыдурма сәрһәдчиләрин балыгчылары балыг овуна бурахмамасындан сонра башланыб.
Бир груп дәнизчи балыг овуна чыхаркән мүгавимәтә раст ҝәлиб. Онлардан 9 нәфәрини Дөвләт Сәрһәд Хидмәтинин һәрби гуллугчулары сахлајыб. Ләнкәран Рајон Полис Шөбәсинә ҝәтирилән һәмин шәхсләрдән 4 нәфәринин изаһаты алындыгдан сонра сәрбәст бурахылыб. Диҝәр 5 нәфәрә исә (Каинат Аббасов, Исмајыл Һүсејнов, Ҹаваншир Исмајылов, Фариз Мәмијев вә Халид Әләкбәров) Ҹинајәт Мәҹәлләсинин 315.1-ҹи (һакимијјәт нүмајәндәсинә гаршы мүгавимәт ҝөстәрмә вә ја зор тәтбиг етмә) вә 221.3-ҹү (хулиганлыг) маддәләри илә ҹинајәт иши башланыб.
Һазырда Дахили Гошунларын вә Сәрһәд Гошунларынын әсҝәрләри вә һәрби техникасы гәсәбәјә јерләшдирилиб. Әһали исә бундан нараһатдыр.
“Јени Мүсават” гәзетинин әмәкдашлары һадисә јериндә олуб. Гәзет јазыр ки, Нәриманабад-2 гәсәбәсиндә декабрын 15-дән башланан күтләви етиразлар сәнҝимәјиб, әксинә, бир гәдәр дә ҝенишләниб. Гәсәбәдә индијә гәдәр ҝәрҝинлик вар, полис ҝеҹә-ҝүндүз кешик чәкир, ҝәлән-ҝедәни изләјир. Үч тәрәфдән дәнизлә сәрһәд олан гәсәбәнин јеҝанә гуру јолу полис нәзарәтиндәдир. Әһали тәшвиш ичиндә һәр ан нәсә баш верәҹәјиндән еһтијат едир.
Декабрын 15-дә сахланараг сонрадан азад едилән гәсәбә сакини Галиб Әлијев “Јени Мүсават”а декабрын 15-дә баш верәнләр барәдә дејиб: “Һәмин ҝүн Сәрһәд Гошунларына мәхсус һәрби ҝәми бизим кәнддән олан балыгчылара дәниздә басгын едиб. Онлар дөрд балыгчы гајығыны тутуб өз ҝәмиләринә гојуб апарыблар. Гајыгларда оланлары да һәбс едибләр. Биз истәјирик ки, тутуланлар азад олунсун, ҹамаатымыза балыг тутуб аиләләрини сахламаға шәраит јарадылсын. Бәзиләри иддиа едир ки, ҝуја сәрһәд гошунлары наркотик алверчиләринин гаршысыны алыб вә бу заман белә һадисә баш вериб. Ағ јаландыр, Нәриманабад-2 гәсәбәсиндә 3-4 мин нәфәр јашајыр. Бурада һеч вахт наркотик алверчиси олмајыб. Олсајды, ҹәзаландырылан оларды. Биз балыгчыјыг, Сәрһәд Гошунларындан оланлар јахшы билирләр ки, наркотик алверчиләри кимләрдир”.
Јерли ҹамаат тәләб едир ки, ајын 15-дә кәндә Дахили Гошунларын бөлмәләрини јеридән, резин ҝүлләләрдән, електрошокдан, ҝөзјашардыҹы истиот газындан истифадә едән шәхсләр ҹәзаландырылсын.
Аиләсини балыгчылыгла доландырдығыны дејән гәсәбә сакини Адыширин Вәлијев билдириб ки, балыг овуна мәһдудијјәт гојулмасы сәбәбсиз дејил - балыгчылардан рүшвәт истәнилир, она ҝөрә белә вәзијјәт јараныб: “Әсас мәгсәд биздән пул гопармагдыр. Сәрһәд онлары марагландырмыр. Һәр гајыгдан пулларыны да, балыгларыны да алмасалар, әл чәкмирләр. Кишиләримиз дәниздә өлүр, аиләләри дә аҹындан гырылыр”.
Диггәт: Хәбәрдән истифадә етдикдә мәнбәјә истинад лазымдыр
