Әһли Бејт -АБНА- хәбәр аҝентлијинин вердији хәбәрә әсасән: Декабрын 15-дә ахшам саатларында Ләнкәран рајонунун Нәриманабад-2 кәндиндә сәрһәдчиләрлә сакинләр арасында инсидент баш вериб. Јүзәрлә инсан етираз аксијасы кечириб.
Сәрһәдчиләр јерли сакинләри балыг овуна бурахмадыглары үчүн тәрәфләр арасында гаршыдурма јараныб.
Һадисә илә бағлы Дахили Ишләр Назирлији мәлумат јајыб. Мәлуматда дејилир ки, бир груп сакин дәниз сәрһәдләрини позараг ганунсуз балыг овлајыб. Бу заман онлардан 9 нәфәри Дөвләт Сәрһәд Хидмәтинин һәрби гуллугчулары тәрәфиндән сахланылыб: «Һәмин шәхсләрин јахынлары, тәхминән 150 нәфәр кәнд сакини сәрһәд заставасына ҝәләрәк һәрбчиләрә тәзјиг ҝөстәриб, онларын азад олунмаларыны тәләб едибләр.
Дахили ишләр органларынын һадисә јеринә ҝәлмиш әмәкдашлары кәнд сакинләрини сакитләшдирмәјә чалышыб, асајиши позмамаға дәвәт едибләр. Амма онлардан бир групу полис әмәкдашларына мүгавимәт ҝөстәриб, мүхтәлиф дәрәҹәли бәдән хәсарәтләри јетирибләр».
Назирлијин мәлуматында бу да дејилир ки, иҹтимаи гајданы позмуш вә һакимијјәт нүмајәндәсинә мүгавимәт ҝөстәрмиш 9 нәфәр Ләнкәран Полис Шөбәсинә ҝәтирилиб. Һәмин шәхсләрдән 3-нүн изаһаты алындыгдан сонра бурахылса да, 6-сы сахланыб.
Факт үзрә Ҹинајәт Мәҹәлләсинин 315.1-ҹи (һакимијјәт нүмајәндәсинә гаршы мүгавимәт ҝөстәрмә вә ја зор тәтбиг етмә) вә 221.3-ҹү (хулиганлыг) маддәләри илә ҹинајәт иши башланыб.
Нәриманабад сакинләри «Азадлыг» Радиосуна билдирибләр ки, онлар 9 һәмкәндлиләринин бурахылмасы үчүн сәрһәд заставасынын гаршысына јығышыблар. Аз сонра кәндә Дахили Гошунларын әсҝәрләри вә һәрби техника јеридилиб. Кәнд сакинләри ҝеҹә атылан резин ҝүлләләрин галыгларыны да нүмајиш етдирибләр. Јаралананлар олса да онларын сајы мәлум дејил. Кәнд сакинләринин дедикләринә ҝөрә Раһил Вәлијев адлы сакинин вәзијјәти даһа ағырдыр. Үстүндән ПДМ кечиб. Инди о, Ләнкәранда «Бөјүк Хәстәхана» кими танынан мүалиҹә мүәссисәсинә јерләшдирилиб.
Һадисә заманы јараланан Рамиз Ханкишијевин гардашы Исраил Харкишијев билдириб ки, ону өз һәјәтиндә вурублар. «Она атылан ҝүллә дә әлимдәдир. Ҝеҹәнин бир јарысы өз халгына белә басгын олар? Белә дејирдиләр ки, сизи Хоҹалыдан бетәр едәҹәјик. Бу, президентә гаршы тәхрибатдыр. Ҹамааты верибләр ҝүлләбарана. Елә адам вар евинин ичиндә јаралајыблар. Ҝөзјашардыҹы газдан истифадә едибләр. 70 јашында ананын үрәји ҝетди».
Исраил Ханкишијев дејиб ки, Нәриманабад сакинләринин јеҝанә доланышыг јери дәниздир. Амма онлара да балыг овламаға имкан вермирләр. Дүнән дәнизә чыхан балыгчылары да буна ҝөрә сахлајыблар:
«Балыгчылар дәнизә чөрәкпулу газанмаг үчүн ҝедирләр. Дәнизчиләрин гајыгларыны тутуб батырыблар, сындырыблар. Дүнәндән әсир-јесир олмушуг. 9 нәфәр тутублар. Ҹамаат да хаһиш еләди ки, ушаглары бурахын. Бир дә ҝөрдүк ки, Дахили Гошунлар кәндә дахил олду».
Исраил Ханкишијев дејир ки, сахлананлар арасында еләси вар јемәкханадан чыхыб евинә ҝедирмиш: «Елә адам вар јолда тутублар. Еләси дә вар јемәкханадан чыханда, ичкили һалда тутублар. Ағлы башында олмајан адамы апарыблар ки, ҝуја дөвләт әлејһинә чыхыб...».
Нәриманабад сакини Тамилла Ағајева һәјәҹандан чох даныша билмир:
«Балаларымызы өлдүрүрләр. Дүнән бизим кәндимизи ҝүлләбаран етдиләр. 20 јанвар 15 декабрла әвәз олунуб».
Диларә Ејвазова исә бунлары дејиб: «Гәһрәман анајам, 20 ушағым вар. Сабаһ мүһарибә олса, биринҹи мәним ушагларым ҝедәҹәк. Бизим ушагларымызы тутурлар. Әлимиздә автоматдан төкүлән ҝүлләләр вар. Ушагларымызы дәрјада тока вериб тутдулар. 71 јашым вар, мүһарибәдә белә шеј ҝөрмәдим. Ушагларымыз хәстәханададырлар. Һејдәр баба сағ олсајды, бизә зүлм етмәздиләр».
Кәнд сакинләри дејирләр ки, һәбс олунанлар бурахылмасалар, Бакыја ҝәләҹәкләр. Јаралананлардан јалныз 1 нәфәр Ләнкәран Мәркәзи Хәстәханасына јерләшдирилиб. Бу да Нәриманабад сакини Раһил Вәлијевдир. О, «Азадлыг» Радиосунун мүхбиринә дејиб ки, һадисә заманы зиреһли техниканын алтында галыб. Нәтиҹәдә сыныглары вар.
Хәстәханадан да билдирибләр ки, Р.Вәлијевин голунда вә ајағында 2 јердән сынығы вар.
Прокурорлугда изаһат верән балыгчы Фәдаил Оруҹов исә билдириб ки, һүгуг-мүһафизә органлары балыгчыларын 3 гајығыны мүсадирә едиб. Бир гајыг исә һадисә заманы батыб. Һәрби ҝәми гәфилдән гајығын үстүнә һүҹума кечибмиш. Нәтиҹәдә гајыг батыб. Гајыгдакылар исә ҹанларыны биртәһәр гуртарыблар.
Һазырда Нәриманабад полис машынлары илә әһатә олунуб, полис кәндә нәзарәт едир. Кәнд сакинләри дејирләр ки, тутулан 6 нәфәр бурахылмаса, Бакыда етираз аксијасы кечирәҹәкләр. Онлар президент Илһам Әлијев вә онун ханымы Меһрибан Әлијевадан јардым истәјирләр.
Масаллыда нәшр олунан «Ҹәнуб хәбәрләри» гәзетинин редактору Заһир Әмәнов исә Нәриманабадда балыгчылара гојулан мәһдудијјәтләрдән данышыб:
«Һансы гурулуш олур-олсун, бурда доланышыг мәнбәји балыгчылыгдыр. Балыг јохдурса, бу онлары дири-дири мәһв етмәкдир. Биз дә вахташыры јазырыг. Онлары дәниздән узаглашдырмаг үчүн мин ҹүр мәһдудијјәт фикирләширләр. Ҝаһ дејирләр ки, 2 км узаға чыхмаг олмаз, балыг да о мәсафәдән узагда олур, ҝаһ да мин ҹүр квоталар гојулур. Нәзарәтчиләрин дә өз һаггы вар. Онлара пул верәндә, балыгчылара һеч нә галмыр. Ҹамаатын гајығыны ашырырлар, адыны да гәза гојурлар. Белә шајиәләр дә ҝәзир ки, наркотик алверчиләринә ҝөрә онлары дәнизә бурахмырлар». З.Әмәновун фикринҹә, ҝөрүнүр, сон һадисәләр ҹамаатын сәбир касасыны дашырыб. Ләнкәран Шәһәр Иҹра Һакимијјәти башчысынын Нәриманабад инзибати әрази даирәси үзрә нүмајәндәси Ағамирзә Ағајев АПА-ја сахланылан гәсәбә сакинләриндән Габил Надир оғлу Әлијевин сәрбәст бурахылдығыны, галан беш нәфәрин дә јахын саатларда бурахылмасынын ҝөзләнилдијини дејиб.
Диггәт: Хәбәрдән истифадә етдикдә мәнбәјә истинад лазымдыр
