Әһли Бејт -АБНА- хәбәр аҝентлијинин вердији хәбәрә әсасән: Медиа Һүгугу Институту ҹинајәт мәҹәлләсинә едилән дәјишикликләри ләғв етмәјә чағырараг бәјанат вериб.
Бәјанатда дејилир: “Милли Мәҹлисин Ҹинајәт Мәҹәлләсинә әлавә етдији 167.2-ҹи маддәјә ҝөрә, бу һәрәкәтләри етмиш шәхсләри 5000 манатдан 7000 манатадәк ҹәримә вә ја 2 ил мүддәтинәдәк азадлыгдан мәһруметмә ҹәзасы ҝөзләјир. Габагҹадан әлбир олан бир груп шәхс вә ја мүтәшәккил дәстә вә ја вәзифәли шәхс белә һәрәкәтләри етдикдә, еләҹә дә һәр һансы шәхс буну тәкрар етдикдә 7000 манатдан 9000 манатадәк ҹәримә ҹәзасы вә ја 2 илдән 5 иләдәк һәбс ҹәзасы ала биләр.
Азәрбајҹанда мөвҹуд ганунлар дини тәјинатлы әдәбијјаты, әшјалары вә дини мәзмунлу башга мәлумат материалларыны өлкәјә ҝәтирмәк, чап етмәк, сатмаг вә ја јајмаг үчүн һөкумәтдән өнҹәдән иҹазә алмағы тәләб едир. Белә гајдалар ифадә азадлығы илә бағлы конститусијанын тәләбләри вә Авропа Инсан Һаглары Конвенсијасынын 10-ҹу маддәси илә тәмин едилән ифадә азадлығы һаглары илә дабан-дабана зиддијјәт тәшкил едир. Һәр һансы әдәбијјаты вә ја мәлуматы чап етмәк вә јајмаг үчүн разылығын тәләб олунмасы өн сензура анламына ҝәлир вә ифадә азадлығы һүгугунун һеч нә илә бәраәтләндирилә билмәјән позулмасыдыр”.
Бәјанатда дејилир ки, һәр һансы ифадә јалныз вә јалныз дөвләт тәһлүкәсизлији вә дөвләтин әрази бүтөвлүјү мәнафеләри үчүн, сағламлығын вә мәнәвијјатын, диҝәр шәхсләрин һүгуг вә азадлыгларынын горунмасы, ҹинајәтин, иғтишашларын гаршысынын алынмасы, иҹтимаи тәһлүкәсизлијин горунмасы, иҹтимаи гајданын тәмин едилмәси үчүн, һабелә мәхфи гајдада әлдә едилмиш мәлуматын ачыгланмасынын гаршысынын алынмасы вә ја мәһкәмәнин нүфузунун вә гәрәзсизлијинин тәмин едилмәси мәгсәдилә мәһдудлашдырыла биләр: “Белә сәрт ҹинајәт ҹәзаларыны нәзәрдә тутан, инсанларын һүгугларына вә һәјатына ҹидди мүдахилә потенсиалы дашыјан бу нормада гејри-мүәјјән мәзмунлу ифадәдән истифадә олунур. “...дини тәјинатлы әдәбијјат”, “дини мәзмунлу әшјалар” јахуд “дини мәзмунлу башга мәлумат материаллары” кими ајдын вә бәлли олмајан ифадәләрин ишләдилмәси ганунун кејфијјәти вә онун тәтбигинин ганунилији илә бағлы суаллар доғурур. Ганун јетәринҹә ајдын вә бирмәналы олмалы, ади сағлам дүшүнҹәли инсанын анлајаҹағы, өз давранышларыны она ујғунлашдыра биләҹәји дәгигликдә олмалыдыр.
Медиа Һүгугу Институту билдирир ки, мәзмунундан (истәр дини, истәрсә дә башга) асылы олмајараг һәр һансы “әдәбијјаты”, “әшјалары” вә “башга мәлумат материалларыны” чап етмә, идхал етмә, сатма вә јајма ифадә азадлығы һүгугундан истифадә етмә формаларыдыр. Садәҹә ифадә азадлығы һүгугундан јарарланмаға ҝөрә белә ағыр ҹәзаларын верилмәси һәр һансы леҝитим мәгсәдә мүтәнасиб сајыла билмәз вә бүтүн һалларда ифадә азадлығы һүгугунун позулмасы олараг ганунла горунан иҹтимаи мәнафеләрә зәрәр вураҹаг.
Медиа Һүгугу Институту бу гануну, еләҹә дә дини әдәбијјатла бағлы өн сензураны нәзәрдә тутан јанлыш ганунвериҹилији тез бир заманда арадан галдырмағы, бу саһәдәки тәнзимләмәләри Азәрбајҹан Конститусијасына, Инсан һүгуг вә азадлыгларынын тәнзимләнмәси һаггында конститусија ганунуна вә Авропа Конвенсијасынын 10-ҹу маддәсинә ујғунлашдырмағы төвсијә едир”.
Диггәт: Хәбәрдән истифадә етдикдә мәнбәјә истинад лазымдыр
