Әһли Бејт -АБНА- хәбәр аҝентлијинин вердији хәбәрә әсасән:Мөвсүм Сәмәдов, Вагиф Абдуллајев вә Руфулла Ахундзадәнин һүгугларыны мүдафиә едән вәкил Анар Гасымлынын вердији мәлумата ҝөрә, нөвбәти апеллјасија мәһкәмәсинин артыг вахты мүәјјән олунуб. “Аппелјасија мәһкәмәси декабр ајынын 1-и Бакы Аппелјасија Мәһкәмәсиндә саат 15:00-да һаким Һәсән Әһмәдовун сәдрлији илә кечириләҹәк.”, - дејә Анар Гасымлы мәлумат вериб. Анар Гасымлы мәһкәмә просеси иҹтимаијјәт үчүн ачыг олаҹағыны билдириб.
Гејд едәк ки, Октјабрын 7-дә Бакы Ағыр Ҹинајәтләр Мәһкәмәси Мөвсүм Сәмәдовун 12 ил, Вагиф Абдуллајевин 11 ил, Фәрамиз Аббасовун 11 ил, Руфулла Ахундзадәнин 11 ил 6 ај, Дәјанәт Сәмәдов вә Фирдовси Мәммәдрзајевин исә һәр биринин 10 ил мүддәтинә һәбс верилмәсинә даир һөкм чыхарыб. Һөкмә әсасән онлар ҹәзаларыны ҹидди режимли ҹәзачәкмә мүәссисәсиндә чәкмәлидирләр. Зүлфүгар Микајылзадә 5 ил сынаг мүддәти тәтбиг олунмагла 11 ил шәрти һәбс ҹәзасына мәһкум олунуб.
Тәгсирләндирилән шәхсләр Ҹинајәт Мәҹәлләсинин 214.2.1 (Габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг); 214.2.3 (Одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг); 228.3 (Ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә); 278-ҹи (Һакимијјәти зорла әлә кечирмә вә ја ону зорла сахлама) маддәләри илә иттиһам олунурдулар.
Руфулла Ахундзадәјә Ҹинајәт Мәҹәлләсинин 283.1-ҹи (Милли, ирги, сосиал вә ја дини нифрәт вә дүшмәнчилијин салынмасына, милли ләјагәтин алчалдылмасына, һабелә милли, ирги вә ја дини мәнсубијјәтиндән асылы олараг вәтәндашларын һүгугларынын мәһдудлашдырылмасына вә ја үстүнлүкләринин мүәјјән едилмәсинә јөнәлән һәрәкәтләр, ашкар сурәтдә вә ја күтләви информасија васитәләриндән истифадә олунмагла төрәдилдикдә) маддәси илә дә иттиһам ирәли сүрүлмүшдү.
Хатырладаг ки, исламчылары мүдафиә едәнләр һесаб едир ки, бу һәбсләр сијаси характерлидир вә әсасән јанварын 2-дә партијанын Баш Мәҹлисиндә Мөвсүм Сәмәдовун чыхышы илә бағлыдыр. 2007-ҹи илдә партија сәдри сечилән Мөвсүм Сәмәдов 2011-ҹи ил јанварын 2-дә Азәрбајҹан Ислам Партијасы Баш Мәҹлисинин иҹласында чыхыш едәрәк мәктәбләрдә һиҹаба гадаға гојулмасыны кәскин писләјиб вә һакимијјәтин үнванына иттиһамлар сәсләндириб. Мәһәммәд пејғәмбәрдән “динә тәрәф бәла ҝәлсә, ҹанынызы верин, дининизи гуртарын” дејә ситат ҝәтирән АИП лидери Азәрбајҹан халгыны “ајаға галхмаға вә залым режимә сон гојмаға” чағырыб.
Диггәт: Хәбәрдән истифадә етдикдә мәнбәјә истинад лазымдыр
