Әһли Бејт -АБНА- хәбәр аҝентлијинин вердији хәбәрә әсасән: Суријаја гаршы һәрби мүдахиләјә сәрт шәкилдә етираз едән Русија үч дөјүш ҝәмисини бу өлкәнин саһил суларына ҝөндәриб. Ҝәмиләрин Тартуса чатдығыны ачыглајан Дәмәшг рәһбәрлији «Русија донанмасынын Сурија суларында мүһафизә мәгсәдли патрул хидмәтинин һәјата кечирәҹәјини» ачыглајыб.
Сурија һакимијјәтинә гаршы бејнәлхалг тәзјигләрә бахмајараг, Бәшәр Әсәд мүмкүн хариҹи мүдахиләни өнләмәк үчүн ән бөјүк силаһ тәминатчысы олан Русијанын донанмасына саһил суларыны ачыб. Исраил кәшфијјатына јахынлығы илә танынан «Дебка» сајтынын иддиасына ҝөрә, Русијанын Сомали пиратларына гаршы Аралыг дәнизинә чыхардығы 3 дөјүш ҝәмиси дүнән ҝеҹә саатларында Суријанын Тартус лиманында лөвбәр салыб.
Ҝәмиләрдә пешәкар кәшфијјат групларынын вә модерн електрон рабитә вә динләмә һејәтинин олдуғу да гејд едилиб. Исраилин «Һааретз» гәзети дә мөвзу илә бағлы мәлуматлара јер вериб: «Русијанын дөјүш ҝәмиләринин Сурија суларына ҝәлмәси Москванын Гәрбин Дәмәшг режиминә гаршы һәрби мүдахиләсинә гәти олараг етираз етмәсинин ҝөстәриҹисидир». Русијанын «Московски Комсомолетс» гәзети исә «Русија Сурија үзүндән мүһарибәјә ҝирирми» башлыглы мәгаләсиндә бу јанашманын Москва илә Гәрбин арасында ҝәрҝинлијә јол ачаҹағыны јазыб. Бәшәр Әсәдин адынын ачыгланмасыны истәмәјән мүшавирләриндән бири Русија ҝәмиләринин Сурија саһил суларында мүһафизә хидмәти һәјата кечирәҹәкләрини билдириб. Русијанын «Риа Новости» аҝентлији Русија дәнизчиләри тәрәфиндән Тартус лиманында фотошәкилләри јајымлајыб.
Хатырладаг ки, Русија вә Сурија арасында 1971-ҹи илдә Тартус лиманында Русијанын һәрби дәниз базасы гурмасы үчүн разылашма имзаланмышды. 50 мин рус һәрбчисинин јер алдығы Тартус базасы ССРИ јыхылана гәдәр истифадә едилмишди. Амма советләр дағылдыгдан сонра игтисади чәтинликләр үзүндән арха плана кечән база Русија донанмасына јалныз мәнтиги дәстәк тәмин етмәк мәгсәдилә истифадә едилмәкдә давам едиб.
Суријаја илдә 4 милјард доллар дәјәриндә силаһ сатан Русијанын модерн радар системинә саһиб олан С-300 ракетләрини Суријаја сатаҹағы билдирилиб. «Әл Гудс Әл Әрәби» гәзетинин Суријанын Москва сәфирлијиндәки мәнбәләрә истинадән јајдығы хәбәрә ҝөрә, Дәмәшг режиминә гаршы хариҹи һәрби мүдахиләни «гырмызы хәтт» олараг ҝөрән Русија һөкумәти Сурија һава саһәсини мүһафизә етмәк мәгсәдилә С-300 ракетләрини бу өлкәдә ҹәмләшдирмәк нијјәтиндәдир. 5 дәгигә әрзиндә дөјүш һазырлығы вәзијјәтинә ҝәтирилә билән С-300 мүасир дөврүн ән инкишаф етмиш һава мүдафиә системләриндән биридир вә балистик ракетләрә гаршы да истифадә едилә билир. Бу системин радарлары ејни вахтда 100 һәдәфи изләјиб ејни анда 12 һәдәфә тушланмаг габилијјәтинә саһибдир. Сурија С-330 ракетләри сајәсиндә Инҹирлик, Исраил вә Аралыг дәнизиндәки донанмалардан атыла биләҹәк ракетләри тамамилә зәрәрсизләшдирә биләр.
Диггәт: Хәбәрдән истифадә етдикдә мәнбәјә истинад лазымдыр
